JOYIL 1 - Sumi Naga CL (Re-edited) Bible (BSI)

¹ Ampeu tsa Pethuel nu Joel lau ighi:

Tülhaquqo no Ghale Ighi

² Hi inilo, nongu layemiqo; akini xükholo, küxümi kümtsü! Nongu momu no puasüqo ghuloki lo hitoi keu shipüani kema?

³ No tianuliqo vilo hipau pilo, eno no tianuliqo no pano tianuliqo vilo pipelo, eno pano tianuliqo no pashelo tiqhelimi vilo pipelo.

⁴ Amthsü no chukhakumo qhive keu tülhaqu loji no chuvae. Tülhaqu loji no chukhakumo qhive keu tütüghü no chuvae eno tütüghü no chukhakumo qhive keu ningami no chuvae.

⁵ Ithu qalo, nongu shokümzümi, igha qalo nongu aji kushomi, kughengu nongu kichi lono atsaiji kungo ikhi süwuve tsüae.

⁶ Kughengu shiye kumto lakhi eno kihikümla no I yeghi leniye ighivae paw ahu ye abongshuu hu, eno abongshuu aqu hu kütsüghae.

⁷ Tipau no I tsaibo kütsave tsüno Iw mububo hechheve tsüae; tipaqo kola lhave no peve tsüae; alokaqo pesü metsüghoive tsüae.

⁸ Ililhothe lakhi no liw külapuu ghenguno yeqhiyephi pusü mloqa keshi mlolo.

⁹ Athi eno atsaizü kümllagho ye Ampeu ki lono süwuvae. Ampeu chinemi eno hukuthumi no mloqa anie.

¹⁰ Aluzaqo ye kütsavae, ayeghi no mloqa ani, kughengu athi ye kütsa khavae, atsaiji no qhaivae, thazü no hailovae.

¹¹ O alukichimiqo, kujoqhiyi lo; O atsailu kichimiqo, ashothi eno barleythi ghenguno mloqa lo, kughengu alu lo ghile ye hauvae.

¹² Atsaibo no qhaivae; mububo no kimghoivae. Khaghatu, amsa, eno apple süboqo, aluza lo asübo kümtsü qhaivae, eno timi nuliqo launo alokivi ye qhoi chekhavae.

Xaide penike Ku

¹³ Yeqhiyephi pepu no mlolo, O achinemiqo; igha qalo, O akiptia lo hukuthumiqo. Ilolo, puthotsü yeqhiyephi u lo, O I Lhou qemiqo! Kughengu athi eno atsaizü kümllagho ye nongu Lhou ki lono süchile luvae.

¹⁴ Kümvü kepu do kophelo; akimchi hoho kusülo. Layemi eno aghakhu lo küxümi kümtsü Ampeu nongu Lhou kilo hekütsüpe Pa lau ighamku lo.

¹⁵ Tipa tsala ghenguno ahae! Kughengu Ampeu tsala ye kupunuvae, ti ye Akughushuu launo kütsakungo ighi ketoi nani.

¹⁶ Ningu nhethe lono achuqupu süwuve, eno Ampeu ki lono alokivi ngo amloqi qhiyi keu ikhipe wuve tsüake kumo?

¹⁷ Apiti no ayeghi lono qhaivae; pekükütsü ki no yenguyi; eno abi-aleqo no ixapinyivae kughengu athi kühave ake.

¹⁸ Tüghashiqo no kishi aküsü ghügha shi ani kelae! Amishi loji no avehu izüvae kughengu panoqo ghenguno achu kümza-a kühavae; ambe lojiqou ghi ime auvae.

¹⁹ O Ampeu, I no O ku anie. Kughengu ami no yenguyike-a lo achu kümza-a pitive tsüae, eno ami mili no aluza lo asübo kümtsü pitileve tsüae.

²⁰ Aluza lo tüghashiqo ghi O khekulho shi ani kughengu aghokitiqo lo azü hailovae, eno ami no yenguyike-a lo achu kümza-aqo pitive tsüa ke.