JOSHUA 9 - Sumi Naga CL (Re-edited) Bible (BSI)

Gibeonmi Pishikiqhi

¹ Jordan kulolau naghuto lo eno aqa lo Azüghi Kije mkü lono Lebanon küdau kutolo kükami kümtsü no ti chiluve; ti ye Hittimi, Amorimi, Canaanmi, Perizimi, Hivimi, eno Jebusimi kükamiqo ke.

² Panongu kümtsü küqhano Joshua ngo Israelmi sasü kumjoni ke kutove.

³ Ikemu Gibeon lo xüküami no Joshua no Ai eno Jericho lo kiu shikeno chilu kelo

⁴ panongu ye mqümgha shino achuqupu kutope khurha xapipe, eno tipaqo shou yeqhiyephi tachu ngo ashiyiko hughi ixüve keqo pesü jida pukukeu beve,

⁵ aphi küixü pepu, eno pukhokeu pukhukuqho xapuve no panongu chuqupuqo ghi qhai amuno shivepe.

⁶ Tishino panongu no Gilgal lo Joshua lau wuno Joshua ngo Israelmi vilo pi, “Ningu ye aghakhu kushuo lono chenike nongu pelo ni sasü visho shi penishi ani.”

⁷ Ikemu Israelmi no Hivimi vilo pi, “Nongu ye ni phivilo xüküami shi aghi luvike ningu ye kishino nongu sasü visho shini kea?”

⁸ Panongu no Joshua vilo pi, “Ningu ye no qemike.” Ikehu Joshua no panongu iniju, “Nongu ye khuno kea eno khilano ighi kea?”

⁹ Panongu no pa vilo pi, “Ningu ye aghakhu kushuo lono cheni, kughengu ningu ye no Lhou Ampeu ghili chiluvae. Pa no Egypt lo kiu shikeno ti kuchopu chiluvae,

¹⁰ eno Pa no Jordan kipelau Amorimi kükami pama lau shikeu, Heshbon kükau Sihon eno Bashan lo Og, ti Ashtaroth lo achekeu akükau pama shou kiu shive keno chilue.

¹¹ Tighenguno niw sakiphemi eno ni ghakhu lo küami kümtsü no ningu vilo pi, ‘Achuqupu kutope wulo eno panongu sasü kusho no pilo, “Ningu ye no qemiqo ke. Ighilo, ni sasü visho shitsülo.”’

¹² Ni chuqupu julo, nino hi pusü ni ki lono ipeke tsalani ye lüvüi akemu itehi ye qhaive no amuno shivae.

¹³ Hi ashiyiko hughiqo ye ningu no lesü akelo ye akitheshi akemu itehi ye ixüvae. Eno kushuo lono cheighi kehu ni phimini ngo apukhuqho ye ixü pinyivae.”

¹⁴ Ikehu Israelmi no panongu chuqupu hami ikhiluve, ikemu tipau ghili Ampeu lau iniju move.

¹⁵ Joshua no panongu sasü külashive no visho shive, eno tipau kiqi lono panongu pithi moni keu shive eno sakiphemi kümtsü no tishi ashoqhi shive.

¹⁶ Ikelo visho shive no atsala küthü thiu Israelmi no kuchou no timi tipaqo ye pano kupunu lo achenie pi ithive.

¹⁷ Tighenguno Israelmi no chesü tipaqo no küghüna akeu mishighünaqo lo ighi kelo atsala küthü shive. Mishighüna tipaqo ye Gibeon, Chephirah, Beeroth, eno Kiriath-jearim.

¹⁸ Ikemu Israelmi ye panongu lemove kughengu panow sakiphemi no pano sasü Ampeu Israel Lhou je lono visho shiveke. Tighenguno timi kümtsü no pano sakiphemi shou nhenheshiu khave.

¹⁹ Ikemu sakiphemi kümtsü no khochile, “Ningu no Ampeu Israel Lhou je lono panongu lau ashoqhi shivae. Itehi ningu ye panongu sapüsa mlae.

²⁰ Ningu shoqhi ghenguno panongu pelo xüape masae, tishimo aye, ningu shou müghamo keu ikughi nosae.”

²¹ Tishino sakiphemi no pi, “Panongu pelo xü apelo.” Tighenguno timi tipaqo ye Israelmi kümtsü ghenguno asü kighemi eno azü kupumi shi penike sakiphemi no azah tsüve.

²² Joshua no tipaqo kusü no panongu vilo iniju, “Nongu ye kushiye ni phivilo küghüna animu ni pishiqhi no ni vilo, ‘Ningu ye nongu launo ighono kushuo lo ani’ ipi kea?

²³ Tighenguno itehi nongu ye angusüpu shivae eno nongu gholo khami ye khilemu kiumu shilu moae ikemu I Lhou kilo asü kighemi eno azü kupumi shiniae.”

²⁴ Panongu no Joshua khochile, “Nino tishiveke, kughengu Ampeu o Lhou no Pa qeu Moses vecheo Azah tsükeu no ayeghi hi kümtsü nongu tsüni eno hipa yeghi lo küghüna akemi kümtsü nongu nhethe lono kütsavelo pike.

²⁵ Itehi ningu ye o u lo ani. O zülo kiu no akiviu eno achipiu keno ni lau shilo.”

²⁶ Tighenguno Joshua no hitoi shino Israelmi pelo panongu pithi pemo nike süsholuve.

²⁷ Ikemu Joshua no panongu pesü Israelmi kümtsü ghenguno eno Ampeu kümlla-a ghenguno asü kighemi eno azü kupumi shivepe, ishi kutolo Ampeu no khileno Pa mllalo pini keno tile tishi acheni.