JOSHUA 8 - Sumi Naga CL (Re-edited) Bible (BSI)

Ai Ikiqive

¹ Ampeu no Joshua vilo pi, “Msa kevi eno amlosa kevilo. Ithulo, Ghüshimi kümtsü o gholo sasü Ai lo iqholo. I no Ai kükau eno paw timi, mishighüna ngo yeghi o u lo süve tsüae.

² Nongu no Jericho eno tile akükau lau kiu shi keno, Ai lau ghi tishilo, ikemu ishi ye nongu no tile anhemgha eno lhoxüqo lulu nani. Ai phughi züleno azübou no lenike kutolo.”

³ Ikehu Joshua ngo ghüshimi kümtsü Ai lenike kutove. Eno pa no paw ghüshimi dolo 30,000 kishephe no putho lono puwuve.

⁴ Pa no hitoi azah tsü, “Julo, nongu ye züleno azübou no lenike kutolo. Aphughi lono putosü lomu wu kevilo ikemu nongu kümtsü kutope ngolo.

⁵ Ni eno I gholo chekeqo no aphughi lo ipeni. Eno kughou panongu no püzüu toi ipeghi no ningu haighini keno, ningu no shothisü panongu zülono pochile ighiveni.

⁶ Panongu no ningu hasü khalau ipeghi nani eno ningu no panongu müsü sasü aphughi lono kushuo lo wuveni. Panongu no ishi pi nani, ‘Panongu ye püzüu toi ishi ghi ningu launo pocheae.’ Ikehu ningu no panongu zülono alau poni.

⁷ Tishi kemtsa nongu no aküghütshü-a lono ipeghi no aphughi botha luvelo kughengu Ampeu nongu Lhou no nongu tsü nani.

⁸ Nongu no aphughi leluve kemtsa Ampeu no Azah tsüke toi ami süvelo. I no azah nongu tsüvae.”

⁹ Tishino Joshua no panongu puwuve eno panongu no Ai kulolau, Ai ngo Bethel küma dolo itshüve. Joshua ye tipaji apusho lo timiqo gholo ngove.

¹⁰ Thanau inaqhe itheno Joshua no ghüshimi kukütsü eno pa ngo Israel sakiphemi no Ai lo wu.

¹¹ Pa gholo ghüshimi kümtsü aphughi phivilo iqho eno ahuu küdau apusho shi, akhila lakhi no panongu eno Ai dolo ake.

¹² Pa no timi 5,000 sawo Ai ngo Bethel küma dolo aphughi kulola küdau küghütshüpe qhive.

¹³ Titoi panongu no ghüshimi kutope qhive; ti ye ghüshimi khami no aphughi ahuu ngovepe eno athiu sükushomi no kulolau ngovepe. Ikemu Joshua ye tipaji akhila lo ngove.

¹⁴ Ai kükau no ti ithive kemtsa pa eno aphughi lo paw timiqo kümtsü akimighi shi Arabah küdau a-a kuto püakeu lono Israelmi sasü aghü shiniye wue. Ikemu pa ye aphughi zübou, ghüshimi itshüpe ngokhe akeu mthae.

¹⁵ Joshua ngo paw timiqo no tipaqo zülo msano shothive keshi yenguyi ke-a küdau pove.

¹⁶ Ikehu panongu hawuni ke aphughi lo timi kümtsü kukütsü no panongu no Joshua hache kelaye panongu ye aphughi lono putosü wuve.

¹⁷ Ai ngo Bethel lo timi lakhimu qhimono Israelmi hasü wuve. Eno panongu ye aphughi khaqhipe qhive no Israelmi hawuve.

¹⁸ Tishi akelono Ampeu no Joshua vilo pi, “O u lo angu pesü Ai küdau chhopuwo lo, kughengu I no aphughi pesü o tsüveni.” Eno Joshua no pa u lo angu pesü Ai küdau chhopuwo.

¹⁹ Pa no pa u peqhe kemtsa timi itshü akemi kümtsü no ilhethu aphughi lo poilo no botha luve. Panongu no mtazü aphughi lo ami süvetsü.

²⁰ Kughou Aimi no athiu jupuwo keno, amchhi no atsütsü tove aghi. Panongu ye pokulupu laghi kühave, kughengu Israelmi khunoqo yenguyi ke-a küdau pove keno, tipaqo no idechile panongu sasü kumjouve.

²¹ Kughou Joshua ngo Israelmi no itshü akeqo no aphughi leluve keu eno aphughi lo amchhi no kunguu ikughi keu ithulu keno, panongu no ideighi no Aimi ghiqhi thuve.

²² Eno kütami no aphughi lono ipeghi no panongu lethuve kelo panongu ye Israelmi dolo ngove, khami no hi küdau eno khami no hu küdau shi botha luve. Tishino Israelmi no kümtsü ghiqhi khave no lakhimu püxümo momu pupomoe.

²³ Ikemu Ai kükau ye küghape Joshua lau saghi.

²⁴ Israelmi no yenguyi ke-a khile panongu no haighi keno, tile no panongu no Aimi kümtsü azütakikihi pesü ghiqhi khave eno lakhimu püxümo, tishino idewo Ai phughi lo ilo no kümtsü ghiqhi pithi khave.

²⁵ Tipa tsalani kiptimi, totimi kümtsü küqha kelo, Aimi 12,000 thive.

²⁶ Joshua no pa ngupa Ai küdau chhopuwo auve eno tile küami kümtsü pithive moke kutolo piqimoe.

²⁷ Israelmi no Ampeu no Azah tsüke toi Ai phughi lo tinhemgha jeli eno lhoxü jeli luve.

²⁸ Joshua no Ai pitive no ayeghi kümsa shivetsü eno ishi kutolo tishi aphi.

²⁹ Pa no Ai kükau asü lono tshüqhive eno avela kutolo tishi püave. Khetsünhe ilove kemtsa Joshua zakütsü lono pa kumo ikhiqhive eno pesü aphughi khagho lo vepheve no atu kutomo kiche kumqope pa kumo shou bevetsü, ishi kutolo tishi acheni.

Joshua no Puloshoqhi Shikithe

³⁰ Tipa ghuloki lo Joshua no Ebal naghuto lo Ampeu Israel Lhou ghenguno akümlla-khache lakhi mla.

³¹ Ampeu qeu Moses no Israelmi azah tsükeu Moses Yezah Kaku lo yepüake toi, “Akiptia tipau ye ayi nhemgha no hetha pukumo keu tu no mlalo.” Tishino panongu no tipau shouno Ampeu lau akipti kümllagho ngo külakishi kümllagho pesü mllae.

³² Tileno Israelmi nhethe lono pa no Moses Yezah yepüa keu atu lo yepuku.

³³ Israelmi kachenami eno aghakütsami kümtsü, sakiphemi, hiyampemi ngo xaküthami panongu kümtsü puthughope, Levi chinemi Ampeuw Puloshoqhi bohu peche keqo zülo hula hila ngoe. Timi tüxa no Gerizim naghuto zülo eno tüxa no Ebal naghuto zülo ngo; ti ye Ampeu qeu Moses no abothu lono Israelmi kümgha tsüniye azah tsükeu kiqi lonoke.

³⁴ Tithiu Joshua no Ayezah kümtsü phisü, Ayezah Kaku lo yepüa keu kiqi lono kükümgha ngo angusü phisü.

³⁵ Ahoho lo Israelmi akemi, totimi eno itimi ngo kachenami kümtsü lau Moses no azah tsükeu lakhimu qhimono Joshua no kümtsü phisüe.