JOSHUA 7 - Sumi Naga CL (Re-edited) Bible (BSI)

Ai lo Israelmi Theqhive

¹ Ikemu Israelmi ye thime kiumu lu kevilo pikeu yezah hebideve kughengu Judah shiaye lo, Zerah nu, Zabdi nu, Carmi nu, Achan no Ampeu no kütsave penike pephe tsükeu lono thime hami luve. Tino Ampeu no Israelmi shou Pa loghu pukuve.

² Joshua no Jericho lono timi khami Beth-aven kupunu lo Bethel kipelau Ai lo puwu no pi, “Iqho no ayeghi pujulo.” Ikehu panongu no iqho no Ai puju.

³ Eno panongu no Joshua lau ideighi no pi, “Timi kümtsü Ai lo iqhope kevilo, ikemu 2,000 momu 3,000 likhi puwu no leve pelo. Aghüshi penike ghüshimi kümtsü puwu kevilo kughengu panongu ye aghulo likhi ani.”

⁴ Tighenguno pano 3,000 toike iqho ikemu panongu ye Aimi zülono küsakiphi pove.

⁵ Aimi no pano 36 pithive tsü eno aphughi khagho lono hasü Shebarim kutolo wuno atuxu lono panongu pithive. Ikelo timiqo mlo ye pitikümlave keu zü toive.

⁶ Tileno Joshua ngo Israelmi sakiphemi no amlo küsashi pano kuuphi süxüve no Ampeuw Puloshoqhi bohu zülo ikiqi avela kutolo ihi auve. Panongu no ayeghimkhu pesü pano kütsü lo lepuku.

⁷ Tishino Joshua no pi, “Aha, O Ampeu Alhou, No ye kushiye Amorimi u lono timi hipaqo kütsaveni keghi sasü Jordan katha ighipe kea? Ningu ye Jordan kukuu mu küghüna aniche keghi lae.

⁸ O Ampeu, ni ye kiu pini kea? Israelmi no aghümi zülono shothi ighivae.

⁹ Kughengu Canaanmi eno hipa qhalo küami no ti chilunia eno panongu no ni botha luve no ningu je ayeghi hipau lono pühave tsüniae. O je kije ghenguno kiu shini akea?”

Achan Xine

¹⁰ Ampeu no Joshua vilo pi, “Ithulo, no ye kushiye o gi pishiqhope ani kea?

¹¹ Israelmi no pimivae; panongu ye I no azah tsükeu Iw puloshoqhi hephovae. Panongu no shipüsave kepu nhemgha luvae. Panongu no püka luve no mikivae eno pano nhemgha gholo qhivae.

¹² Tighenguno Israelmi ye pano ghümi zülo puthugho mlavae. Panongu no aghümi launo shothivae kughengu panongu ye pano ampi kütsaveni keu lo tsüvae. Nongu no kütsave kepu nhemgha kütsa moke kutolo Ni ye nongu gholo ngomae.

¹³ Ithulo, timiqo shikimthe no pilo, ‘Thoghiu ghenguno nongu ampi kishekimtheve lo; kughengu Ampeu Israel Lhou no ishi piani, “Nongu gholo kütsave lopi keu nhemghaqo ani, O Israel. Nongu no anhemgha tipaqo ikhive moke kutolo nongu ye aghümi zülo puthugho lumo nani”

¹⁴ Tighenguno thanau inaqhe nongu shiayeqo azüu saghi no Ampeu no khuno shiaye shou asaqhi beni keno, pano shiaye no ali kiqi lono azüu ipeghini. Ampeu no khuno limi shou asaqhi beni keno, pano limi no akibo kiqi lono azüu ipeghini. Ampeu no khuno kibo shou asaqhi beni keno, pano kibo no lüthü kiqi lono azüu ipeghini.

¹⁵ Eno timi khuu no anhemgha luve keu shi kiche pheni keno, pa eno pa no akeu kümtsü ami no pitiveni kughengu pa no Ampeuw puloshoqhi hebideve eno Israel lo akukujopu kümla pa no shiveke.’”

¹⁶ Ikehu thanau inaqhe Joshua no Israelmi ashiaye kiqi lono saghi eno Judah shiaye kichephe.

¹⁷ Pa no Judah shiaye lo ali kiqi lono saghi kelo, Zerah lagha kichephe. Eno pa no Zerah li lo timi lakhikhi saghi kelo, Zabdi kichephe.

¹⁸ Tishino pa no Zabdi kibolomi timi lakhikhi kuphe kelo, Judah shiaye lo Zerah nu, Zabdi nu, Carmi nu, Achan kichephe.

¹⁹ Tile Joshua no Achan vilo pi, “I nu, Ampeu Israel Lhou Ampeu juküvüpu shilo eno Pa sheqhelo. Eno I vilo no ye kiu shive akeno pilo; I zülo küsü kevilo.”

²⁰ Achan no khochile, “Kuchou no I no Ampeu Israel Lhou zülo axine shivae eno I no hi shivae:

²¹ aghüshi lono hakholu keqo gholo Shinar lono mlakeu hebephi jukivi lakhi, ghükayi ahu kini, eno ameshoyi ahu tüxa qhemi I no ithulu no püka luve. Tipaqo ye I pusho alou chhuqho püani eno ghükayi no aqhoshi no püanie.”

²² Tileno Joshua no aghinimi puwu no panongu no apusho lo powu kelo kuchou no apusho lo ghükayi no aqhoshi no qhopüaghi keu phulu.

²³ Panongu no apusho lono pesü Joshua ngo Israelmi lau ighi. Eno Panongu no tipaqo pesü Ampeu zülo qhive.

²⁴ Tishino Joshua ngo Israelmi kümtsü no Zerah limi Achan eno ghükayi, hebephi, ameshoyi, pa tianuli, amshitsü, khurha, ambeqo, pa pusho ngo pa no kiu akeno kümtsü sasü Achor khila lo ighi.

²⁵ Eno Joshua no pi, “No ye kushiye aghime ni lau süghi kea? Ishi tsala lono Ampeu no o lau aghime süghi ani.” Eno Israelmi kümtsü no atu pesü Achan veqhi pithive. Panongu no atu pesü veqhive eno ami lono pitive.

²⁶ Panongu no pa shou atu kümzapu gheqhepe qhive eno ti ye ishi kutolo acheni. Tithiu no Ampeu no pa xukighide iqüve. Tighenguno ishi kutolo a-a tipau pesü Achor khila ipi cheni.