JOSHUA 6 - Sumi Naga CL (Re-edited) Bible (BSI)

Jericho Ikiqive

¹ Israelmi kümsano Jericho ye khalau eno alou ghi khathape ngove.

² Ampeu no Joshua vilo pi, “Julo, I no Jericho ngo tile akükau eno aghütomi pesü o u lo süvae.

³ No eno ow ghüshimiqo no mishighüna hipau ghuthu lakhi homxalo. Eno titoi atsala tsügho dolo ghuthu lakhikhi homxalo.

⁴ Achinemi tsüni no afuko lakhikhi pesü Puloshoqhi bohu züu chewulo. Atsala akütsüniu loye, nongu no ghuthu tsüni homxani, tishino achinetomi no afuko ighani.

⁵ Kughou panongu no ambetsü kibo lono kushuo ighani keno, eno nongu no ti afuko ghügha chilu keno, timi kümtsü no aghügha kije lono ighamku lo. Tishino mishighüna liwo ye ilaqive nani eno nongu no pütüta-a lono müzüchoi aphughi lo chesü iloni.”

⁶ Ikehu Nun nu Joshua no achinemi kuno pi, “Puloshoqhi bohu peluve lo, eno achinemi tsüni no Ampeuw Puloshoqhi bohu züu ambetsü kibo no mlakeu fuko pesü chewulo.”

⁷ Eno pa no timiqo vilo pi, “Azüu chesü wulo, mishighüna homxalo, ghüshimiqo no Ampeuw Puloshoqhi bohu züu shino chewulo.”

⁸ Joshu no azah tsüke toi, achinemi tsüni no ambetsü kibo no mlakeu fuko pesü Ampeuw Puloshoqhi bohu züu chewu; panongu no afuko ighasü chewu eno Ampeuw puloshoqhi bohu no panongu pape.

⁹ Ghüshimi no achinemi afuko igha akeqo züu cheche, eno Puloshoqhi bohu thiu ghi ghüshimi no khesasü che. Eno afuko tamono igha ae.

¹⁰ Ikemu Joshua no timiqo ishi azah tsü, “Nongu ye igha kevilo momu nongu sütsa chilu pe kevilo. I no nongu vilo igha lopi azah tsü moke kutolo, atsa lakhimu nongu kichi lono ipeghi kevilo. Eno azah tsüke tsalani no nongu no ighamku lo.”

¹¹ Titoi pa no Ampeuw Puloshoqhi bohu pelo ghuthu lakhi mishighüna homxape. Eno kijiliu ye idewo aghazü lo ngovepe.

¹² Tishino Joshua no thanau itheno ithuve eno achinemi no Puloshoqhi bohu peluve.

¹³ Achinemi tsüni no afuko tsüni pesü Ampeuw Puloshoqhi bohu züu chesü afuko tamono igha. Eno ghüshimi no panongu züu cheche, Puloshoqhi bohu thiu ghi ghüshimi no khesasü che eno tamono afuko igha ae.

¹⁴ Atsala akiniu lo ghi panongu no ghuthu lakhi mishighüna homxave no aghazü lo ideighive. Panongu no titoi atsala tsügho homxave.

¹⁵ Akütsüniuni panongu no inaqhe küvü ipeghi kemtsa mishighüna tipau ghuthu tsüni homxave. Tipa tsala lo likhino panongu no ghuthu tsüni homxae.

¹⁶ Eno ghuthu akütsüniu homxave kemtsa achinemi no afuko ighave kethiu, Joshua no timiqo vilo pi, “Ighalo, kughengu Ampeu no mishighüna hipau nongu tsüvae.

¹⁷ Mishighüna ngo tile akeqo jeli kümtsü Ampeu mlla keu kiqishi kütsave niae. Kütüqhaliu Rahab eno khunoqo li gholo li kilo ani keno tipaqo likhino xü nani kughengu li no niw pukujumi küsü tsüke.

¹⁸ Ikemu nongu ye kütsave keu nhemgha lakhimu lumoni, nongu no kütsave keu nhemgha luve aye, tino Israel ghazü lo kütsakungo keu eno shiluküsa süghi nosae.

¹⁹ Ikemu ghükayi ngo ameshoyi thaqhü, eno alazayi ngo ayi no mlakeu bohuqo ye Ampeu ghenguno akimtheshi qhilo. Tipaqo ye Ampeu kini pekükütsü-a lo qhini.”

²⁰ Ikehu achinemi no afuko igha eno timiqo no ighamku kelo aliwo no ilaqive. Tishino timiqo no pütüta no ngo akeu lono müzüchoi aphughi lo chesü ilo leluve.

²¹ Panongu zütakikihi pe aphughi lo kiptimi, totimi, kichimi, itimi, amshitsü, ambe eno khurhaqo kümtsü ghiqhive.

²² Ikemu Joshua no pukujumi mishighüna tipau lo wukeu pama vilo pi, “Hu kütüqhaliu kilo wulo, eno li lau tushoqhi püake toi li eno li kibolomi saghi lo.”

²³ Ikehu pama no wuno Rahab eno li puaza ngo li pelimi ngo kibolomi kümtsü saghi. Pama no li kibolomi kümtsü sasü Israel ghazü lo ighive.

²⁴ Tishino panongu no mishighüna lo ami süvetsü no thime jeli kümtsü pitive tsü. Ikemu ghükayi ngo ameshoyi thaqhü, eno alazayi ngo ayi no mlakeu bohuqo ye panongu no Ampeu kini pekükütsü-a lo qhive.

²⁵ Joshua no kütüqhaliu Rahab eno li papu kibolomi eno li kibolomi xaluve. Li no Jericho lo pukujumi puwu keu pama pe küsü tsü kehu li je ye ishi kutolo Israel yeghi lo acheni.

²⁶ Tile Joshua no ashoqhi lakhi shi, “Khuu no Jericho phughi hipau shiqhe kithe nike ithughini keno, Ampeu no angusü pa shou apeniu. “Aboqha tu ye pa nu anoghiu küxü shouno shosü peni, khaghoqo ye pa nu anipau küxü shouno süqhe peni.”

²⁷ Ampeu no titoi Joshua gholo ae eno pa jekipi no ayeghiqha kümtsü lo acheke.