JOSHUA 5 - Sumi Naga CL (Re-edited) Bible (BSI)

Tiqhelimi Phighüyiko Kügha

¹ Jordan ghoki kulolau Amorimi kükami eno azüghi mkülo Canaanmi kükami kümtsü Ampeu no Israelmi no Jordan kathalu mphi kutolo Ampeu no qhaive tsükeu sütsa chilu kemtsa, panongu mlo hauve eno Israelmi ghili kümsüpe aghungu aphi ije move.

² Tipa ghuloki lo Ampeu no Joshua vilo pi, “Azütachi iqilo eno Israel nuliqo phighüyiko akiniu ghave tsülo.”

³ Ikehu Joshua no azütachi pesü Israel nuliqo Gibeath-haaraloth lono aphighü yiko ghavetsü.

⁴ Joshua no aphighü yiko ghavetsü keu ye hi ghenguno ke: Egypt lono ipeghi kemi kiptimi, ghüshimi thaqhü Egypt lono ipeghive kethiu asayeqha lono thikhave.

⁵ Egypt lono ipeghi keqo kümtsü aphighü yiko ghave kemi, ikemu ala lo asayeqha lono punu keqo ye aphighü yiko ghamo keqoke.

⁶ Kughengu Israelmi no ampe 40 asayeqha lo cheke lono Egypt lono ipeghi kemi shiye kümtsü eno aghükishimi kümtsü püghave ke, ti ye panongu no Ampeu tsa pemove ke ghenguno ke; tileno Ampeu no akichhizü ngo akhingozü no qole akeu yeghi, ningu tsüni kepi pano puasüqo lau tushoqhi püakeu hu, Ampeu no panongu pelo khilemu ithulu pemoe pi ashoqhi shive.

⁷ Tighenguno panongu nuli, khunoqo Ampeu no pano züqhulo ipeghipe keno, Joshua no tipaqo phighü yiko ghatsü ke. Panongu ye aphighü yiko ghamo kemi kughengu pano ye izüche kelono aphighü yiko ghatsü moveke.

⁸ Kughou shiye kümtsü no aphighü yiko ghaluve keno, kümtsü no azaku vimphi kutolo pütüta pusho lo ngove.

⁹ Ampeu no Joshua vilo pi, “Ishi no I no nongu launo Egypt lo aqemi shi akeu mlo ghime ikhive tsüae. Tighenguno tipa-a je pesü Gilgal kuvetsü, eno ishi kutolo ani.”

Canaan lo Hechekulu Atüghüu

¹⁰ Kughou Israelmi no Jericho qalo Gilgal lo aghazü shi akeno, panongu no tipa qhi chighiabidini ji Hechekulu ikhilue.

¹¹ Hechekulu ghulhu shiwo thoghiu, tipa tsalani no panongu no Canaan yeghi lo ipeghi keu kholaqhi sümo keu sho eno qhaive keu thi ishi chue.

¹² Eno panongu no tipa yeghi lo pekighi chuve kethiu Manna ye iqighi move ikemu tipa mpe lo panongu ye Canaan yeghi lo pekighi xathiqo chulue.

Ampeu Ghüshimi Zatsüu

¹³ Kughou Joshua no Jericho kupunu ighi keno, pa no ju kelaye timi lakhi azütakikihi pa u lo pesü aghi keu ithulu. Joshua no pa lau wuno pi, “No ye ni laumi keo, ni ghümi laumi kea?”

¹⁴ Timi huno khochile, “Moe, Ni ye Ampeuw ghüshimi zatsüu ke.” Joshua no ikiqi pa gi no ayeghi dape mlla no pi, “I mpeu ye pa qeu pelo kiu shipenishi ani kea?”

¹⁵ Ampeuw ghüshimi zatsüu no pi, “O pukhu kuqho ikhive lo, kughengu nono puthugho akeu ye akimthe-a ke.” Joshua no tishive.