JOSHUA 4 - Sumi Naga CL (Re-edited) Bible (BSI)

Kümsümamo keu Tu Chighikini

¹ Kughou shiye kümtsü no Jordan katha luve keno, Ampeu no Joshua vilo pi.

² “Ashiaye chighikini dolono timi lakhikhi kishelo,

³ eno panongu azah tsülo, ‘Jordan mta lo achinemi no puthugho ake-a lono, atu chighikini pesü ighi no itiji nongu no khile aghazü shini keno tilehi qhilo.’”

⁴ Ikehu Joshua no Israelmi dolono pano chighikini, ashiaye lo lakhikhi kishe püakeqo kuno,

⁵ panongu vilo pi, “Ampeu nongu Lhouw Puloshoqhi Bohu züuno Jordan lo wulo eno nongu lakhikhi no nongu bighi lono atu pelulo, ti ye Israelmi shiaye lakhikhi kiqi lono,

⁶ eno hi no nongu gholo amchipu shipenie. Hithiu nongu tianuliqo no ‘Hi atuqo ye kiu kiqi kea?’ ipi nongu vilo ighiju aye,

⁷ nongu no panongu vilo Ampeu Puloshoqhi Bohu zülo, kishi Jordan ghoki no qowu move keno pilo. Kughou ti huno Jordan ghoki katha keno, Jordan züghi no kotha kütüta shive. Tighenguno atu hipaqo no alholo kümsüchile kepu michike.”

⁸ Timiqo no Joshua zakütsü pape, eno Ampeu no Joshua azah tsü ketoi, Israel shiaye kiqi lono, panongu no atu chighikini azü mta lono khapewo panongu ghazü lo qhive.

⁹ Eno Joshua no atu chighikini pesü Jordan mta lo achinemi no Puloshoqhi Bohu pesü puthughoke-a lo shosüve; atu tipaqo ye ishi kutolo achephi.

¹⁰ Ampeu no Joshua vecheo timiqo vilo shilopi keqo kuchopu shikha mphilo achinemi ye Jordan mta lo puthughope ngo eno ti ye Moses no Joshua vilo pikeu kiqi lono ke. Timiqo no akimighi shi katha ikuve.

¹¹ Kughou timi kümtsü no katha luve keno, Puloshoqhi Bohu ngo achinemi no timiqo züu wuve.

¹² Reuben ngo Gad lagha eno Manasseh shiaye tüxa no aghüshi nhemgha kutope Moses no panongu vilo pike toi, Israelmi züu shive.

¹³ Ampeu nhethe lono timi 40,000 toike no aghü shinike Jericho kupunu lo aqa lo ngove.

¹⁴ Tipa tsalani no Ampeu no Israelmi kümtsü zülono Joshua süqhe eno Moses qhoqhü cheke toi panongu no Joshua küxü kupuju pa qhoqhüe.

¹⁵ Tithiu Ampeu no Joshua vilo pi,

¹⁶ “Puloshoqhi Bohu kipemi achinemi vilo Jordan lono ipeghive lopi azah tsülo.”

¹⁷ Ikehu Joshua no achinemi vilo azah tsü, “Jordan lono ipeghive lo.”

¹⁸ Kughou Puloshoqhi Bohu kipemi achinemi no Jordan mta lono ipeghi no panongu pukhu no amkü tove keno, aghoki no thosülo toi qowuve, eno ghulo kütau toi amkü kuchopu qochilive.

¹⁹ Timiqo no aqhi atüghüu lo atsala achighini no Jordan lono ipeghi eno Jericho lughi kipelau Gilgal lo aghazü shive.

²⁰ Tile Joshua no atu chighikini Jordan lono peighi keu shosüve.

²¹ Eno pa no Israelmi vilo pi, “Hithiu no tianuli no ‘Hi atuqo ye kiu michipu kea?’ ipi ighiju aye,

²² nongu no nongu tianuliqo vilo, ‘Israelmi no ayeghi qhai keu lono Jordan kathae’ ipi ithi pelo.

²³ Kughengu Ampeu nongu Lhou no ningu no kathalu moke kutolo, Akuhu Züghi qhaivepe ketoi, nongu no kathalu moke kutolo Jordan ghoki qhaive peke,

²⁴ tishikeu lono ayeghilomi kümtsü no Ampeu küka ye akumto kepi ithi eno nongu pelo Ampeu nongu Lhou alhokuthu sümsache peniye ke.”