JOSHUA 3 - Sumi Naga CL (Re-edited) Bible (BSI)

Israelmi no Jordan Katha

¹ Thanau inaqhe Joshua ngo Israelmi no ithughi no Shittim lono chesü Jordan lo ighi eno katha ikumphi lo tilehi aghazü shia.

² Atsala küthü thiu kijemiqo no aghazüqo lo wuno

³ timiqo azah tsü, “Kughou achinemi no Ampeu nongu Lhouw Puloshoqhi Bohu pechekeu nongu no ithuluni keno, nongu ye apusho qhive no ti papesü wuni.

⁴ Tishikeu lono nongu no khipa la wukepu keno ithi nani, kughengu nongu ye püzüu hipa la ighi mphike. Ikemu Puloshoqhi Bohu kupunu wumono nongu dolo kilometer lakhi toike qhino wulo.”

⁵ Tishino Joshua no timiqo vilo pi, “Nongu shikimtheve lo, kughengu Ampeu no thoghiu nongu gholo akümzapu kümla mla nani,”

⁶ Tithiu Joshua no achinemi vilo pi, “Puloshoqhi Bohu pesü timiqo züu wulo.” Ikehu panongu no ti pesü timiqo züuno chewu.

⁷ Ampeu no Joshua vilo pi, “Ishi no huthu no I no Israelmi zülo o süqhe niae tishikeu lono panongu pelo I no Moses gholo acheke toi o gholo anipi ithi peni.

⁸ No ye achinemi Puloshoqhi Bohu peche keqo azah tsülo, ‘Kughou nongu no Jordan mkü toveni keno, nongu ye tile puthugho ngovelo.’”

⁹ Tileno Joshua no Israelmi vilo pi, “Hila ighi no nongu Lhou Ampeu tsa inilo.”

¹⁰ Joshua no pi, “Aküxüpu Lhou no nongu gholo ani kepi hileno ithi nani, ti ye Pa no nongu zülono Canaanmi, Hittimi, Hivimi, Perizimi, Girgashimi, Amorimi eno Jebusimi hapheve tsü nani.

¹¹ Julo, ayeghiqha MPEUw Puloshoqhi Bohu no nongu züuno Jordan lo wucheni.

¹² Tighenguno Israel shiaye chighikini dolono timi lakhikhi kishelo.

¹³ Eno kughou Puloshoqhi Bohu kipemi no azü lo apukhu nesüni keno, ayeghiqha Mpeu no Jordan zülo ngoluve nani, eno Jordan zü huno qowu move nani, eno qoiqi chekeu züno kuchope kunguu ikuve nani.”

¹⁴ Ikehu kughou timiqo no apushoqo qhive no Jordan putha nike wu keno, achinemi no panongu züu Puloshoqhi Bohu pesü che

¹⁵ eno achinemi Puloshoqhi Bohu peche keqo no Jordan tove no panongu pukhu azü lo nesü kemtsa (ti ye ghile tusho shia eno aghoki ye amkü kutolo qoa),

¹⁶ azü lashou no qoiqighi akeqo no qomono kuchove. Zarethan phivilo Adam mishighüna kutolo azü choluve eno Arabah Züghi ngo Amti Züghi lo qowu akeu ghi lakhave tsüe. Tishino timiqo no kathasü Jericho ghüngü lo ikuve.

¹⁷ Israelmi kümtsü no aghoki katha iku moke kutolo, eno shiye kümtsü no Jordan kathalu moke kutolo achinemi no Ampeuw Puloshoqhi Bohu pesü Jordan mta lo qhaike yeghi lo puthughoe.