JOSHUA 24 - Sumi Naga CL (Re-edited) Bible (BSI)

Shechem lo Puloshoqhi Shikithe

¹ Joshua no Israel shiaye eno sakiphemi, kichimi ngo ali lo akütsü, atsa küküghami eno hiyampemi kümtsü Shechem lo kukütsü. Panongu no Alhou zülo ighi.

² Joshua no timi kümtsü vilo pi, “Ampeu Israel Lhou no hi pi ani, ‘Khaghi nongu puasü Terah, Abraham ngo Nahor pama papu no Euphrates ghoki kukuu xüche eno alhou kütau mlache.

³ Tileno I no nongu papu Abraham sasü Aghoki kukuu no Canaan yeghi lo ighi no pa tianuli kutomo kughukotsü. I no Isaac pa tsüe.

⁴ Isaac lau I no Jacob ngo Esau kughukotsü. Esau lau I no Seir lo ato ghakhuqo amheghi shitsü, ikemu Jacob ngo pa tianuliqo ye Egypt lo iqive.

⁵ Tishino I no Moses ngo Aaron pama puwu no Egypt lo püsa süghitsü, tithiu no I no nongu saipeghi.

⁶ “‘Tishino I no nongu puasüqo Egypt lono saipeghi eno nongu no azüghi lo ighi. Egyptmi no khurkulu ngo khurghüshimi sasü nongu puasüqo Akuhu Züghi kuto haighi.

⁷ Ikemu kughou panongu no Ampeu lau ighamku keno, Pa no Egyptmi ngo nongu dolo aküzü süvetsü eno azüghi no Egyptmi shou ikuvepe eno panongu küzüluve peke; eno nongu nhethi no I no Egypt lo kiu shi keno ithulue. Nongu ye asayeqha lo ado kushuo xüche.

⁸ Tithiuno I no nongu sasü Jordan kukuu Amorimi yeghi lo ighi. Panongu no nongu sasü aghüshi, ikemu I no nongu pelo panongu shou toluvepe. Nongu no pano yeghi luvetsü eno I no nongu nhethe lono panongu kütsave.

⁹ Tithiu Zippor nu Balak Moabmi kükau no ithu Israelmi sasü aghüshi. Pa no nongu ghusho peniye Balaam kupuwu.

¹⁰ Ikemu I no Balaam tsa initsü moe. Eno kuchou loye pa no nongu kümgha tsüke. Tipa ghola lono I no Balak launo nongu xaphe.

¹¹ Tishino nongu no Jordan kathasü Jericho lo ighi, eno Jericho lo sakiphemi no nongu sasü aghüshi, tihutoi Amorimi, Perizimi, Canaanmi, Hittimi, Girgashimi, Hivimi eno Jebusimi ghi nongu sasü aghüshi. Ikemu I no panongu kümtsü nongu u lo süvetsü.

¹² I no nongu züuno akhighi puwu no Amorimi kükau kini nongu nhethe lono hapheve; ti ye azütakikihi momu shexilika no kumoe.

¹³ Nongu no imasümo keu yeghi pesü I no nongu tsü eno mishighüna nongu no shiqhemo keqo lo nongu pelo küghünape. Nongu no shosümo keu tsailu ngo mububo ghutu xathi nongu pelo chupe.’

Khuu Qeni keno Kishelulo

¹⁴ “Tighenguno itehi Ampeu sümsa eno amlo tsüqhiyi aküpülü lono Pa qelo. No puasüqo no Aghoki kukuu eno Egypt lo mlla chekeu lhouqo phevelo eno Ampeu qelo.

¹⁵ Ampeu qekeu no o ghenguno axine shive aghi aye, nono khuu qeni keno ishi tsala lono kishelu lo, nongu puasüqo no Aghoki kukuu qe chekeu lhouqo qeni keo, Amorimi khuno yeghi lo itehi nongu no küghüna ani keno pano lhouqo qeni kea? Ikemu ni eno I kibo ye Ampeu qeni.”

¹⁶ Tileno timiqo no khochile, “Ningu no kütau lhouqo qeniye ni Mpeu phevenie pikeu ye khilemu shimoe,

¹⁷ kughengu Ampeu no Egypt lo aqü-axe lono ni puasüqo eno ningu saipeghi eno Pa no akümzapu kümla ni nhethe lono piyeke. Nino khile wu keno momu khuno timi katha keno, ti kümtsü lo ni süshope qhie.

¹⁸ Eno ni nhethe lono Ampeu no ayeghi hipa qhalo xüche kemi, Amorimi kümtsü hapheve tsü. Tighenguno ningu ye Ampeu qeni, kughengu Pa no ni Lhou ke.”

¹⁹ Ikemu Joshua no timiqo vilo pi, “Nongu ye Ampeu qelumo nani, kughengu Pa ye akimthe Lhou ke. Pa ye anhekushu Lhou; Pa ye nongu no hebideve keqo momu nongu xineqo qhitsümo nani.

²⁰ Tsala nongu no Ampeu qhive no inami lhou qeuve aye, Pa no nongu lau akivi kümla shive akemu ideighi no nongu ghüza nani eno püghave nani.”

²¹ Ikelo timiqo no Joshua vilo pi, “Moe, ningu ye Ampeu qeni.”

²² Joshua no panongu vilo pi, “Nongu no Ampeu qenike kishe keu lo, nongu ampi no now thopiae.” Panongu no pi, “Ningu no thopimie.”

²³ Tileno pa no pi, “Tishiaye inami lhouqo nongu gholo akeu pevelo eno Ampeu Israel Lhou lau nongu mlo tsüqhiyi lo.”

²⁴ Timiqo no Joshua vilo pi, “Ampeu ni Lhou ningu no qeni, eno Pa zakütsüqo nino gholuni.”

²⁵ Tighenguno Joshua no timiqo sasü tipa tsala lo Shechem lono puloshoqhi shino pape kepu khuayeqo kithipe qhitsü.

²⁶ Joshua no Alhou Yezah Kaku lo atsa hipaqo yesüve. Tithiu pa no atuqu kije lakhi ikhilu no Ampeuw akimthe-a lo aphisübo qholo shosüve.

²⁷ Pa no timi kümtsü vilo pi, “Julo, atu hipau no ninguw thopiae, kughengu hi no Ampeu no ningu vilo pikeqo tsa kümtsü chiluvae. Tighenguno nongu no nongu Lhou hebideve nosa kehu, hi no nongu shou thopi shini.”

²⁸ Tithiu Joshua no timiqo kümtsü pütüta yeghi lo idewovepe.

Joshua Kithi

²⁹ Hi kümtsü thiu Ampeu qeu Nun nu Joshua ye ampe 110 shino thive.

³⁰ Panongu no Ephraim ato ghakhu lo, Gaash naghuto ahuu pa yeghi Timnath-serah, lo qhove.

³¹ Joshua no xüake tivilo eno sakiphemi Joshua nguno akushuu xükeqo küxü tivilo, Israelmi no Ampeu qeche, kughengu panongu ye Ampeu no Israelmi ghenguno shitsü keu kümtsü ithi cheke.

³² Joseph saghi Israelmi no Egypt lono pesü ighikeu ye panongu no Shechem lo qhove, tipa yeghi ye Jacob no Shechem papu Hamor nuliqo launo ghükayi 100 pesü qhükeu yeghi ke. Tipau yeghi ye Joseph tianuli mheghi shive tsüe.

³³ Aaron nu Eleazar ghi thive eno Ephraim ato ghakhu lo pa nu Phinehas mheghi shi tsükeu phughi Gibeah lo qhove.