JOSHUA 23 - Sumi Naga CL (Re-edited) Bible (BSI)

Joshua Kikini

¹ Ampeu no Israelmi pano hokümxa lo aghümi launo akulho qhitsü keu ado kushuo thiu, Joshua ye ighono kitemi shive.

² Ikehu pa no Israelmi sakiphemi, kichimi eno akütsüqo, atsa küküghami eno hiyampemi kümtsü kusü no pi, “Itehi ni ye ighono kitemi shivae.

³ Nongu Lhou Ampeu no nongu ghenguno shiye hi kümtsü lau kiu shi keno nongu no ithuluvae, kughengu Ampeu nongu Lhou no nongu züqhushi aghüshi tsüke.

⁴ Julo, I no nongu shiaye ghenguno khipaqo achili aghi keno pesü amheghi shive tsüae, tinguno alau aghakhu I no lelu kepu shiye kothape püakeqo kümtsü, ti ye Jordan lono Azüghi Akijeu kuto pesü nongu tsüvae.

⁵ Ampeu nongu Lhou no panongu pelo shothive penani eno panongu hapheve nani. Nongu Lhou Ampeu no nongu lau piqhive ketoi, nongu no pano yeghi leluve nani.

⁶ Tighenguno ighono mtotoi lo eno Moses Kaku lo yepüa keu kümtsü papelo, tipau lono ajeumu piyiumu tsüghüve kevilo,

⁷ tishianguno nongu gholo shiye xüküqha akeqo sasü kitekungo monani, eno pano lhou je kumo nani, momu pano lhou vecheo tushoqhi monani, momu pano lhou huthumo nani, momu pishiqho mllamo nani.

⁸ Ikemu ishi kutolo shi aketoi, nongu ye nongu Lhou Ampeu süijepe ngolo.

⁹ Kughengu nongu nhethe lono Ampeu no kije eno akumto shiyeqo haphevae. Eno ishi kutolo khunomu nongu zülo puthugho lumphie.

¹⁰ Nongu dolo milakhi no timi qhethonhe haleve, kughengu piqhi püake toi Ampeu Alhou no nongu ghenguno aghüshi tsüke.

¹¹ Tighenguno Ampeu Alhou qhuivü nike kutokupui lo.

¹² Tsala nongu no idewove no hi ghüluve kemi shiye nongu dolo küghüna akeqo sasü kütshükungo luve, pano sasü külakupu shikileve, eno tishikeu lono nongu ngo panongu kitekungo xüuve aye,

¹³ mtsüqheino hi ithilo, Ampeu nongu Lhou ye khilemu shiye hipaqo nongu zülono hapheve tsümo nani. Ikemu panongu ye alichhe momu aqo lakhi toi, amqa lo aqhe no heke toi momu anhethi lo asahu toi Ampeu nongu Lhou no tsükeu yeghi kivi lono kühave moke kutolo nongu ghenguno aküighüpu shive nani.

¹⁴ “Itehi ni ye ayeghi lo kümtsü no wuve chekeu laghi lo wunike kutovae, eno nongu kümtsü, nongu mlo eno angulho no ithi anike Ampeu nongu Lhou no nongu ghenguno akivi tsa piqhi keu lakhimu tomove moe. Thokha shikupuvae; lakhimu tomove moe.

¹⁵ Ikemu Pa no nongu ghenguno akivi piqhi keu kümtsü shikupu ketoi, Ampeu no nongu kütsakhave moke kutolo Pa no alhoksa kümtsü nongu shou puku nani,

¹⁶ tsala nongu no kütau lhouqo lau wuve no tipaqo qeuve eno pishiqhope tipaqo mllauve no Ampeu nongu Lhou sasü puloshoqhi shikeu hebideve aye, Ampeu loghu no nongu shou ikughi nani eno nongu ye Pa no ayeghi kivi nongu tsükeu lono paikhavi no püghave nani.”