JOSHUA 22 - Sumi Naga CL (Re-edited) Bible (BSI)

Kipela Shiayeqo no Idewove

¹ Tipa ghuloki lo Joshua no Reuben, Gad eno Manasseh shiaye tüxa kukütsü,

² eno panongu vilo pi, “Ampeu qeu Moses no nongu vilo shilopi keqo kümtsü nongu no shivae, nongu no I no azah tsükeu kümtsü agholue.

³ Atsala hijeje dolo nongu no nongu thiküzümi phevemoe, eno nongu Lhou Ampeu zakütsü kutokupui papevae.

⁴ Eno itehi ye Ampeu nongu Lhou no Pa no piqhive ketoi no thiküzümi kulhoqhive tsüae. Tighenguno itehi ye Ampeu qeu Moses no Jordan kukuu nongu tsükeu yeghi lo nongu pusho lo idewove lo.

⁵ Nongu no shinikeu ye hi likhie, Moses no azah tsükeu kutokughoi papelo; ti ye, nongu mlo kümtsü eno angulho kümtsü pesü Ampeu nongu Alhou kimiye lo, Pa laghi lo chelo, Pa zakütsü papelo, Pa phe kevilo eno Pa huthu alo.”

⁶ Joshua no panongu kümgha tsüno puwove eno panongu no pano pusho lo idewove.

⁷ Manasseh shiaye tüxa lo kikije lakhi lau Moses no Bashan tsüve eno kikije lakhiu lau Joshua no Jordan kulolau pano thiküzümi phivilo ayeghi tsüve. Kughou Joshua no panongu kümgha tsüno aki lo puwo keno,

⁸ pa no panongu vilo pi, “Nongu pusho lo kinimi shi idewolo, akini eno pichepighi kütsasa shilo, ameshoyi, ghükayi, alazayi, ayi ngo aphimini kutomo pewolo. Nongu ghümi launo ithulu keu pewo nongu thiküzümi sasü küsaje lo.”

⁹ Tishino Reuben, Gad eno Manasseh shiaye tüxa no aki lo idewove. Panongu ye Israelmi kütami sasü Canaan lo Shiloh lono kütüta shive no chesü pano yeghi lo wuve, ti ye Ampeu no Moses vecheo qhasü luve lopi azah tsükeu-a Gilead yeghi lo wuve.

Kipelau Shiayeqo Kiptia

¹⁰ Kughou Reuben, Gad eno Manasseh shiaye tüxa no chewo Canaan yeghi Jordan kupunu keno panongu no tile akiptia kije lakhi mla.

¹¹ Israel shiaye kütami no ishi chiluve, “Julo, Reubenmi, Gadmi eno Manasseh shiaye tüxa no Canaan yeghi lughi lo Jordan lo, eno Israelmi yeghi küdau akiptia mla anie.”

¹² Kughou Israelmi no ti chilu keno, Israel shiaye kümtsü Shiloh lo kumqo eno kipelau shiayeqo sasü aghü shinike kutove.

¹³ Tileno Israelmi no achineu Eleazar nu Phinehas hape Gilead yeghi lo Reuben, Gad eno Manasseh shiaye tüxa lau puwu.

¹⁴ Phinehas gholo ashiaye lo timi lakhikhi kishepe sakiphemi chighi puwu.

¹⁵ Panongu no Gilead yeghi lo Reubenmi, Gadmi eno Manasseh shiaye tüxa lau ighi no pi,

¹⁶ “Ampeu qoaho kümtsü no ishi pi ani, ‘Hi aküpülü hephove akeu kümla ye kiu kiqi kea eno kushiye Ampeu hebide ghi nongu sala akiptia mlakeu vecheo Israel Lhou launo tsüghüsü wuve no Pa pape move ani kea?

¹⁷ Ningu no Peor lo axine shive keu itehi kutolo mu ningu ampi shikimthe lumphi eno tipau xine ghenguno püsa Ampeuw timiqo shou ikughi ke tinomu lukümkha ke kumo keshea?

¹⁸ Imaye, atsala hipau lono Ampeu launo tsüghüsü wuveni keshea? Tsala nongu no ishi pa hebideve aye, thoghiu Pa ye Israelmi shou aloghu ide nani.

¹⁹ Itehi nongu yeghi no mithemo no aghi aye Ampeu yeghi lo ikughive lo, tile Pa phiki ani, eno ningu gholo nongu ghi ayeghi ighi luvelo. Ikemu Ampeu hebide kevilo momu Ampeu kiptia nguno kütau no kiptia shiqhe keu vecheo, ningu pesü hekibidemi toivepe kevilo.

²⁰ Zerah nu Achan ye aghümi nhemgha kütsave kepu shi akeu luve kelono aküpülü hephove ke kumo? Eno pa likhi pithive ke kumo keshea?’”

²¹ Ikelo Reuben, Gad eno Manasseh shiaye tüxa no Israel shiaye khochile,

²² “Akughushu Lhou Ampeu! Akughushu Lhou Ampeu! Pa no ithi ani eno Israelmi ampi no ithilo. Tsala hino hekibide momu Ampeu shou aküpülü hephove aghi aye, ningu kipimi qhitsü kevi,

²³ ti ye nino Ampeu gholu moveno ni kütashi akiptia mlave ke. Momu nino akipti kümllagho tsünike, tüxatini gho mllani ke momu külakishi gho mllani ke hi mla aghi aye, Ampeu pelo ni ghime peni.

²⁴ Ikemu ti kumoe, nino hi mla keu ye ghulo kütau no tianuli no ni tianuliqo vilo hitoi pini keu msake ghenguno ke, ‘Nongu ye Israel Lhou lau kiu shikepu ani kea?

²⁵ Kughengu Ampeu no ningu dolo Jordan pe alughi shive tsüae, nongu Reubenmi eno Gadmi, nongu ye Ampeu lau nongu saje kiumu kühae.’ Tishikeu lono no tianuli no ni tianuli pelo Ampeu mlla pemoni ke lakha luvi.

²⁶ Tighenguno ningu no pike, ‘Ningu akiptia lakhi shiqheni, ikemu ti ye akipti kümllagho momu aghakishi piti nike ghenguno kumono

²⁷ tipa züqhulo no timi eno ni timi ghenguno eno ni thiu tiqhelimi ghenguno thopi shini, eno ti ye ningu ghi akipti kümllagho, aghakishi kümllagho eno külakishi kümllagho pesü Ampeu hukuthu kümla mla chekeu michipu shinie. Tishianguno ghulo kütau mu nongu tianuliqo no ni tianuliqo vilo, “Nongu ye Ampeu lau asaje kühae” ipilu pemo niye ke.’

²⁸ Ningu no kümsü keu no, ‘Tsala ni vilo momu ighini keu lo ni tianuliqo vilo, atsa hitoi pi aye, ningu no ishi pilu nani, “Julo, Ampeu kiptia julho, ni puasüqo no mla püakeu ani eno ti ye akipti kümllagho momu aghakishi kümllagho ghenguno kumono nongu ngo ningu dolo thopi shiniye ke.”’

²⁹ Ampeu ni Lhou kiptia, Pa kimthe-a zülo ghopüa keu nguno akiptia kütau mlape akipti kümllagho, athi kümllagho eno aghakishi kümllagho piti keu vecheo ningu ye Ampeu hebideve no Pa launo tsüghüsü wuvae pikeu ye khilemu kumoe!”

³⁰ Kughou achineu Phinehas ngo pa gholo Israelmi akütsüqo no Reuben, Gad eno Manasseh shiaye tüxa no atsa hipaqo pikeu chilu keno, panongu nhethe lo achipishi ithuluve.

³¹ Achineu Eleazar nu Phinehas no panongu vilo pi “Atsala hipau lono, Ampeu ye ningu gholo anie pi nino ithivae kughengu nongu ye Ampeu hebide püamoe. Tighenguno nongu no Ampeu u lono Israel xaphe luvae.”

³² Tishino Phinehas ngo pa gholo sakiphemiqo ye Reuben, Gad eno Manasseh shiaye tüxa qhive no Canaan lo Israelmi lau idewo no panongu piputove.

³³ Ikelo asütsa tipau no Israelmi nhethe lo achipishi ithuluve. Eno Israelmi no Alhou sheqhe no Reuben, Gad eno Manasseh shiaye tüxa no küghüna akeu yeghi kütsave tsüni keu khilemu pimove.

³⁴ Reubenmi ngo Gadmi no akiptia tipau je Thopi kuvetsü, panongu no pi, “Kughengu Ampeu ye Alhou kepi hi no ningu dolo thopike.”