JOSHUA 20 - Sumi Naga CL (Re-edited) Bible (BSI)

Süshokulupu Phughi

¹ Tithiu Ampeu no Joshua vilo pi,

² “Israelmi vilo pilo, I no Moses vecheo nongu vilo pike toi, ‘Itshükulupu phughi kishephe lo,

³ eno timi khuana no shipimipe kütami pithive aye, pa pelo tilau powulu peni. Tino nongu ghenguno amkhü kulumi zülono süshokulu-a shipeni.

⁴ Pa ye mishighüna tipaqo lakhi lo powulu nani eno aphughi khagho lo puthugho no pa vehu lhepe aphughi tipau lo layemi vilo pilu nani. Tishino panongu no pa sasü aphughi lo ilo nani eno pa ye tilau ngolu nani.

⁵ Tsala amkhü luniye hakicheu no pa hasü ighi aye, panongu ye pa küghape tsümo nani kughengu pa ye mthano pa kisüghüu pithive eno püzüu nomu mithi cheke kumoe.

⁶ Pa ye mishi zülono pa tsa kügha mphi kutolo eno tipa ghuloki lo achinetou shi akeu no thimoke kutolo, tipa phughi lo ngo anani. Tithiu no timi huye pa kilo, eno pa phughi lo idewolu nani.’”

⁷ Tighenguno panongu no Naphtali toghi ghakhu lo Galilee lo Kedesh, Ephraim toghi ghakhu lo Shechem lo, eno Judah toghi ghakhu lo Kiriath-arba (ti ye Hebron) kophelu.

⁸ Eno Jericho kipelau Jordan kukuu, Reuben shiaye yeghi lo atoqa lo Bezer, Gad shiaye yeghi lo Gilead lo Ramoth, eno Manasseh shiaye yeghi lo Bashan lo Golan kishelu.

⁹ Süshokulu phughi hipaqo no Israelmi eno inami pano gholo xüküqha akemi kümtsü ghenguno kishepe qhive. Eno timi khuu no mthano kütami pithiveni keno, pa ye tilau posü wulu nani, tishianguno hoho no pa tsa kügha mphi züu pa ye amkhü kulumi u lono thimo nani.