JOSHUA 2 - Sumi Naga CL (Re-edited) Bible (BSI)

Rahab no Pukujumi küghütshü

¹ Tithiu Nun nu Joshua no pukujumi kini Shittim lono puwu eno pama vilo pi, “Wulo, ayeghi pujulo eno akhoto no Jericho pujulo.” Ikehu pama no wuve eno chesü kütüqhaliu Rahab kilo ighi eno tile ngove.

² Ikelo Jericho lo akükau lau asütsa ishi tove, “Julo, Israelmi itiji hilau ayeghi puju nike ighi ani.”

³ Tileno Jericho kükau no Rahab lau asütsa puwu, “Timi o lau ighi no o kilo ilove keqo sasü ipeghilo kughengu panongu ye ayeghi kuchopu pujuni ye ighi ani.”

⁴ Ikemu atotiu no timi pama sawo küghütshüve. Eno li no pi, “Iyei, timiqo I ki lo ighi kemu panongu ye khilano ighi keno ni ye mthae.

⁵ Eno kughou aküzü shive no khagho khaveni ye akeno panongu ye ipeve. Panongu ye khila wuve keno ni ye mthae. Mtazü panongu hajulo, kughengu nongu ye panongu haluni aphi.”

⁶ Ikemu li no pama sasü aki kütsüqa lo ikuno asü kozaqo kithipe püakeqo dolo küsüve.

⁷ Ikehu akükau timiqo no hasü Jordan laghi lo Azü kakütha-a ipikeu kutolo wuve. Hache keqo no khagho vechesü ipeve kemtsa khagho khaluve.

⁸ Tipaji timi pama no zümphi lono, li no aki kütsüqa lo pama lau ikughi

⁹ eno pama vilo pi, “I no ithivae Ampeu no hipa yeghi pe nongu tsüvae, nongu msakeu no ningu shou ikughivae eno ayeghi lo küxümi kümtsü no nongu zülo ikiqive ani.

¹⁰ Kughengu nongu no Egypt lono ipeghi kelo, Ampeu no kishi Akuhu Züghi pelo qhaivepe keno, nino chiluvae eno Jordan kipelau Amorimi kükau Sihon ngo Og pama kishi nongu no pithive keno chiluvae.

¹¹ Nino ti chilu kemtsa ni mlo hauve eno nongu kümsa no timi khumu aghungu aphi ije move, kughengu nongu Mpeu Alhou no kunguu atsütsü lo ngo aqhou ayeghi lo Alhou ke.

¹² Tishiaye, I no nongu lau akivi kümla mlave ketoi, nongu ghi I pu kibolomi lau akivi kümla mlani kepi tushoqhive lo, eno tishi nanie pikeu michipu tsülo,

¹³ ti ye nongu no I pu, I za, I pelimi, I tsünipulimi eno pano kibolomi süsholu eno akithi lono ningu küxü xaphe tsüni kepi kimchi tsülo.”

¹⁴ Timi pama no khochile, “Ni küxü ye no ghenguno akithi kutolomu tsüveni! Tsala nono ni vehu hipau piphe tsümo aye, kughou Ampeu no ayeghi ni u lo phesüve tsüni keno, nino akivishi eno piqhi püakeu kiqi lono nongu tucho nani.”

¹⁵ Li ye aphughi liwo lo shipuku püakeu kilo ache kehu, li no alashe lono akighi tshüqhi no pama piqive.

¹⁶ Tishino Li no pama vilo pi, “Atoghi küdau wuvelo, tikumo aye nokujo hache keqo sasü kusholu nani, eno panongu no ideighi moke kuto, atsala küthü tilau itshüve lo. Tithiuno nokujo lalo wuvelo.”

¹⁷ Pama no li khochile, “Nono ni pelo tushoqhive pekeu shou, nikujo ye khilemu akipimi shimoe.

¹⁸ Julo, kughou nino hipa yeghi lo iloghini keno, nono ni piqi keu lashe tipau lono hi huchuyi keu kighi pesü tshüqhilo tishino no ye o kilo, o pu, o za, o pelimi eno o pu kibolomi kümtsü hekütsü lo.

¹⁹ Tsala khuana no o hukikha hechesü alaghi lo ipeve aye, pa ji ye pa kütsü shou ake thono ningu kipimi kumoae. Ikemu o ki alou akeqo shou khuana shoumu au beve aye, pa ji ye ni kütsü shou ikughi penie.

²⁰ Ikemu nono ni vehu kütami vilo pive aye, nono ni pelo ashoqhi shipe keu ye kümsa shiniae.”

²¹ Li no pi, “Nono pive keu kiqi lono, tishi peniu.” Tishino li no pama puwuve eno pama ye cheve. Tithiu li no huchuyi keu kighi alashe lo tshü pukuve.

²² Pama no atoghi küdau wuve no pama hache kemi no ideighi moke kutolo atsala küthü itshüve. Hache kemi no alaghi kümtsü phu kemu phumlave.

²³ Tithiu pama ye idewove. Pama no atoghiqo lono iqighi no kathasü Nun nu Joshua lau ighi no pa vilo thokha kishekulu shi pi.

²⁴ Pama no Joshua vilo pi, “Kuchou no Ampeu no ayeghi kuchopu pesü ni tsüvae. Eno tile küami kümtsü no ningu msa auvae.”