JOSHUA 18 - Sumi Naga CL (Re-edited) Bible (BSI)

Achili Yeghi Kikije

¹ Israelmi no ayeghi qhasü luve kethiu kümtsü no Shiloh lo kumqo eno kuposhukulu phiki mlave.

² Israelmi dolo ashiaye tsüni ye pano saje ayeghi tsümono ae.

³ Ikehu Joshua no Israelmi vilo pi, “Nongu ye no puasü Lhou Ampeu no nongu tsükeu yeghi ighi luni keu ado khitohi süpushu ani kea?

⁴ Ashiaye lakhi lo timi küthüthü kishelo, eno I no panongu pelo ayeghi kümtsü lo wupe no panongu no lunishi keu yeghi julho shisüpe ideighi peni.

⁵ Panongu no tipau saje tsüni shi kijetha peni, Judah no pano yeghi apeu tishi ngolo eno Joseph no ahuu pano yeghi lo tishi ngolo.

⁶ Nongu no ti saje tsüni kije püakeu ghili kishekulu yepe I lau süghilo. Tithiu no I no nongu ghenguno Ampeu ni Lhou zülono asaqhi tsüni.

⁷ Levimi ye nongu kütami gholo asaje kühae, kughengu pano saje ye Ampeu chinemi shikeu no pano mheghi ke. Gad ngo Reuben shiaye eno Manasseh shiaye tüxa ye Jordan kukuu kipelau küdau pano yeghi ithuluvae; ti ye Ampeu qeu Moses no panongu tsüke.”

⁸ Tishino timiqo no ayeghi xüwu penike Joshua no hitoi kichepiye keu kiqi lono wuve, “Ayeghi kümtsü xüwulo eno ayeghi julho yepe I lau ideighi lo. Eno hile Shiloh lono I no Ampeu zülono nongu ghenguno asaqhi tsüni.”

⁹ Tighenguno timiqo no ayeghi kümtsü lo iqhoiqi wuno aphughi kiqi lono kikije tsüni shi kaku lo yeve. Tishino panongu no Shiloh ghazü lo Joshua lau ideighi.

¹⁰ Joshua no panongu ghenguno Ampeu zülono asaqhi tsü. Tishino pa no ayeghi kijepe pütüta saje shi Israelmi achili akeqo tsüve.

Benjamin Tsükeu Yeghi

¹¹ Benjamin shiaye, ali kiqi lono asaqhi kelo pano yeghi ye Judah shiaye ngo Joseph shiaye küma dolo ipeghi.

¹² Ahuu pano lughi ye Jordan lono huthu eno tileno iqho Jericho nguno ahuu atoghi kutolo, tishino iqho atoghi ghakhu kulolau küdau kuto, eno Beth-aven sayeqha lono kishekhave ani.

¹³ Tileno alughi hu apeu küdau iqi Luz (ti ye Bethel) kikime kuto, tishino iqi Beth-horon nguno chhiliu naghuto Ataroth-addar kuto iqi ani.

¹⁴ Alughi ye tsüghüsü kütau wuve ani, naghuto tipau lono kulola küdau no idesü apeu küdau wuve no Judah shiayew mishighüna Kiriath-baal (ti ye Kiriath-jearim) lono kishekhave ani. Tino kulolau lughi.

¹⁵ Eno apeu lughi ye Kiriath-jearim shekha lono huthusü Ephron eno Nephtoah ghokiti kutolo ani.

¹⁶ Alughi ye iqi Hinnom Nu Khila lo jupiqilu chekeu eno Rephaim Khila sholo akeu naghuto kuto, eno tileno Jebusimi kikime apeu, Hinnom Khila lo iqi ani eno tino iqi En-rogel kuto.

¹⁷ Tileno idesü ahuu En-shemesh lono Adummim iqho chekeu ghüngüu Geliloth kuto. Tishino alughi ye Bohan, Reuben nu tusho kuto iqi no,

¹⁸ tileno Beth-arabah kikime ahuu kathasü Arabah lo iqive ani.

¹⁹ Tileno alughi ye ahuu Beth-hoglah kikime küdau iqho no Amti Züghi ahuu küdau eno Jordan apeu lono kishekhave ani. Tino apeu lughi.

²⁰ Jordan no kipelau lughi. Hipaqo no ali kiqi lono Benjamin shiaye yeghi.

²¹ Ali kiqi lono Benjamin shiaye no küghüna chekeu mishighüna ye hipaqo ke: Jericho, Beth-hoglah, Emek-Keziz,

²² Beth-arabah, Zemaraim, Bethel.

²³ Avvim, Parah, Ophrah,

²⁴ Chephar-ammoni, Ophni, Geba—mishighüna chighikini eno tipaqo gholo aphuqo;

²⁵ Gibeon, Ramah, Beeroth,

²⁶ Mizpeh, Chephirah, Mozah,

²⁷ Rekem, Irpeel, Taralah,

²⁸ Zela, Haeleph, Jebus (ti ye Jerusalem), Gibeah eno Kiriath-jearim—mishighüna chighibidi eno tipaqo gholo aphuqo. Hi no ali kiqi lono Benjamin shiaye yeghi saje.