JOSHUA 17 - Sumi Naga CL (Re-edited) Bible (BSI)

¹ Joseph nu anoghiu Manasseh laghami lau ayeghi tsü. Manasseh nu anoghiu Makhir, Gilead papu lau Gilead ngo Bashan tsü, kughengu pa ye aghütomi ke.

² Manasseh laghami kütami ali kiqi lono ayeghi hitoi tsü, Abiezer, Helek, Asriel, Shechem, Hepher eno Shemida. Hipaqo no Joseph nu Manasseh kughuko kiptimiqo eno panongu no ali lo akütsüqo ke.

³ Manasseh nu Makhir, pa nu Gilead, pa nu Hepher, pa nu Zelophehad ye anu kiptimi küha, ikemu totimi likhi ke eno panoqo je Mahlah, Noah, Hoglah, Milcah, eno Tirzah.

⁴ Panoqo no Eleazar achineu eno Nun nu Joshua ngo sakiphemiqo lau wuno pi, “Ampeu no ayeghi kothape ni bolomi kiptimi tsükeu gholono, ningu ghi tsü penike Moses lau azah tsüvae.” Tighenguno Ampeu no azah tsüke toi, ayeghi pe pano bolomi kiptimiqo gholono tsüve.

⁵ Tishike ghenguno Manasseh ye Jordan kipelau saje chighi ithulu eno Jordan kukuu ghi Gilead ngo Bashan ithulu,

⁶ kughengu Manasseh kughuko lo totimi ye kiptimi gholono amheghi ithulu ke. Gilead yeghi ye Manasseh kughuko lo kütami lau kijevetsü.

⁷ Manasseh yeghi ye Asher lono Shechem kipelau Michmethath kuto. Tishino aghuthu ye apeu iqi En-tappuahmi kutolo.

⁸ Tappuah yeghi ye Manasseh sala kemu Tappuah phughi no Manasseh lughi lo akehu Ephraim laghamiw shiae.

⁹ Tishino aghuthu ye Kanah ghoki kutolo iqi. Mishighünaqo dolo hi aghoki peu mishighüna akeqo ye Ephraimmi sala. Manasseh ghuthu no aghokiti ahuu no huthusü azüghi lono kishekhave,

¹⁰ apeu no Ephraim, eno Manasseh no ahuu eno azüghi no aghuthu shie. Ahuu no Asher kutolo eno kipelau no Issachar kutolo.

¹¹ Issachar ngo Asher yeghi bocho lo ghi, Manasseh ye hipaqo ae: Beth-shean eno tile aphuqo, Ibleam eno tile aphuqo, Dormi eno tile aphuqo, En-dormi eno tile aphuqo, Taanachmi eno tile aphuqo, Megiddomi eno tile aphuqo; aküthüu no Naphath.

¹² Tishimu Manasseh timiqo ye mishighüna tipaqo qhasü mlave, kughengu Canaanmi no tile küghüna nike mjochile auve.

¹³ Ikemu Israelmi no akumto shiuve kethiu panongu no Canaanmi pelo anguka lono pano qepe ikemu haphe move.

¹⁴ Tishino Joseph laghami no Joshua vilo pi, “Ampeu no ningu kümghatsü no ningu ye kutomo shive akeghi, no ye kushiye ayeghi leqhi lakhi likhi pesü niw shitsü kea?”

¹⁵ Joshua no khochile, “Tsala nongu no kutomo shive aghi aye eno Ephraim yeghi no nongu ghenguno tülalove aghi aye, Perizimi ngo Rephaimmi yeghi ghasü lo iqholo eno nongu ghenguno a-a ghephelo.”

¹⁶ Panongu no khochile, “Hi ato yeghi ye ni ghenguno lukümkha kumovae, ikemu Canaanmi aqa yeghi lo akemi ye ayi no shikeu khurkuluqo ani, hu Beth-shean eno tipau hokümxa lo aphu akeqo eno Jezreel khila lo akeqo ghike.”

¹⁷ Ikehu Joshua no Joseph laghami, Ephraim ngo Manasseh shiaye vilo pi, “Nongu ye ighono kutomo eno aküka küamiqo ke, nongu lau saje lakhi likhi ye tsümo nani,

¹⁸ hu ato yeghi ye nonguw shiniae. Ti ye aghasü shi aghi namu ghepheve no ashekha lono ashekha kutolo pe nonguw shilo. Kughengu Canaanmi no ayi khurkulu aghi namu eno akumtomi shi aghi namu, nongu no panongu hapheve nani.”