JOSHUA 14 - Sumi Naga CL (Re-edited) Bible (BSI)

Jordan Kulola Yeghi Kikije

¹ Achineu Eleazar, Nun nu Joshua, eno Israel shiaye ali tomiqo no Canaan yeghi pesü Israelmi lau hitoi amheghi shi kijetsü.

² Ashiaye toku no tüxa ghenguno, Ampeu no Moses lau azah tsüke toi, panongu mheghi ye asaqhi no kije.

³ Kughengu ashiaye kini no tüxa ye Moses no Jordan kukuu yeghi pesü tsüveke. Ikemu Levi shiaye ye amheghi tsümoe.

⁴ Kughengu Joseph shiaye no kini, Manasseh ngo Ephraim. Levi shiaye ye amheghi kiumu tsümoe ikemu panongu pelo küghüna penike mishighünaqo eno lhoxü pighilu penike aluza tsüe.

⁵ Israelmi no Ampeu no Moses azah tsüke toi ayeghi kijeluve.

Caleb no Qhüiniju

⁶ Tithiu Judah shiaye lono timi khami Gilgal lo Joshua lau ighi. Kenizimi Jephunneh nu Caleb no pa vilo pi, “Kadesh-barnea lo Ampeu no kiu nikujo ghenguno Alhou timi Moses vilo pi keno, nono ithi ani.

⁷ Kughou Ampeu qeu Moses no Kadesh-barnea lono I hape tipa yeghi puju peniye puwu keno, ni ye apunu mpe lhobidi shiae eno I no, I mlo lo aketoi, kuchou tsa pesü pa lau ideighi.

⁸ Ikemu I sasü wukemi athiküzümi no ni timiqo mlo shikümsave tsü; tishimu, ni ye amlo kuchopu no Ampeu I Lhou papeke.

⁹ Eno Moses no tipa tsalani no piqhie, ‘Nono o pukhu pe khipa yeghi lo nesü keno, tipau pesü alhokuthu ghenguno no eno o tianuli mheghi shive tsüni, kughengu nono amlo kuchopu no Ampeu Alhou papeke.’

¹⁰ Itehi julo, Ampeu no pike toi, Israelmi no asayeqha lo cheke lono Pa no Moses vilo hipa tsa pikeu ishi kutolo ampe lhobidi pungu shivae eno I pelo xü aghipe. Eno itehi ni ye ampe lhotache pungu shivae.

¹¹ Ni ye Moses no I puwuke tsala lo toi itehimu mtotoi aphi; ni ye tipa ghuloki lo toi itehimu aghüshi lo wuno ighilu kepu küka aphie.

¹² Tishiaye itehi, tipa tsalani Ampeu no piqhikeu yeghi hu I tsülo, kughengu Anakimi no kishi aliwo kumto no mishighüna bothasü keu lo ache keno, tipa tsalani no ghi chilue. Ikemu Ampeu no I gholo ngono I no hupaqo haphe luve nanie pike.”

¹³ Ikehu Joshua no Jephunneh nu Caleb kümgha tsüno Hebron pesü Caleb mheghi shitsü.

¹⁴ Tighenguno ishi kutolo, Hebron ye Kenizimi Jephunneh nu Caleb mheghi shive, kughengu pa no amlo kuchopu no Ampeu Israel Lhou papeke.

¹⁵ Tipa züu Hebron ye Kiriath-arba ipiche. (Arba ye Anakimi gholo akighicheu ke.) Eno tipa yeghi ye aghükishi lono akulho qhilue.