JOSHUA 13 - Sumi Naga CL (Re-edited) Bible (BSI)

Ayeghi Le kepushi Akeu

¹ Joshua ye ighono kitemi shive eno Ampeu no pa vilo pi, “No ye ighono kitemi shivae, ikemu ayeghi kutomo qhasülu kepu aphi.”

² Ayeghi hipaqo aphi: Philistia ngo Geshur yeghi kümtsü

³ (Egypt kipelau Shihor lono ahuu küdau Ekron ghuthu kuto, ti ye Canaanmiw kepi kihi cheni; tipa qhalo Philistiami kükami pungu no hipaqo shou ka che, Gaza, Ashdod, Ashkelon, Gath eno Ekron), eno apeu Avvim yeghi lo akeqo,

⁴ Canaanmi yeghi kümtsü, Sidonmi yeghi Meerah lono Aphek kuto, eno Amorimi ghuthu kuto,

⁵ Gebalmi yeghi, Lebanon kuchopu, khetsünhe kipelau Hermon Toghi philo Baal-gad lono Lebo-hamath kuto,

⁶ Lebanon naghuto ghakhu lo akeqo lono Misrephoth-maim kutolo küxümi kümtsü eno Sidonmi kümtsü ishi. I no Israelmi nhethe lono hi kümtsü hapheveni. Ikehu I no azah o tsüke toi ayeghi kijepe Israelmi mheghi shive tsülo.

⁷ Tighenguno itehi ye ayeghi hipau pano shiaye toku eno Manasseh shiaye tüxa lau amheghi shi penike kijeve tsülo.

Jordan Kipela Yeghi Kikije

⁸ Reuben eno Gad shiaye ngo Manasseh shiaye tüxa no Ampeu qeu Moses no püzüu no kijeve tsüke toi, Jordan kipela yeghi pesü amheghi shiluve:

⁹ ti ye Arnon Khila cheku Aroer eno tipau mta lo akeu mishighüna, ngo Medeba yeghi lono Dibon kuto;

¹⁰ Eno Heshbon lo Amorimi kükau Sihonw mishighüna kümtsü, ti ye Ammonmi ghuthu kuto;

¹¹ Gilead, Geshur ngo Maacath hokümxa kümtsü, Hermon Toghi kümtsü, Bashan yeghi kümtsü lono Salecah kuto;

¹² Bashan lo Og kükaqha kümtsü, pa ye Ashtaroth eno Edrei shou ka cheke (akükau Og ye Rephaimmi gholono ghülu kemi dolo pa likhive); Moses no panongu theqhive no hapheve ke.

¹³ Tishinamu Israelmi no Geshurmi ngo Maacathmi haphe move eno ishi kutolo panongu ye Israel dolo tishi xü achephi.

¹⁴ Levi shiayemi likhino Moses no amheghi kiumu tsümove. Pa no panoqo vilo pi keu ye Ampeu Alhou lau akipti kümllagho tsükeqo no panongu mheghi ke.

¹⁵ Moses no Reuben shiaye lo ali kiqi lono ayeghi kijetsü.

¹⁶ Panongu yeghi no Arnon Khila cheku Aroer eno tipau mta lo akeu mishighüna, ngo Medeba yeghi;

¹⁷ Heshbon eno tipau qalo mishighüna kümtsü; Dibon eno Bamoth-baal eno Beth-baal-meon,

¹⁸ Jahaz ngo Kedemoth, Mephaath,

¹⁹ Kiriathaim, Sibmah, eno akhila toghi lo akeu phu Zereth-shahar,

²⁰ Beth-peor eno Pisgah naghuto phi eno Beth-Jeshimoth,

²¹ ti ye atoqa lo mishighüna kümtsü eno Heshbon lo Amorimi kükau Sihon kükaqha kümtsü, khuu Moses no leluve keno, eno Midian yepemi Evi, Rekem, Zur, Hur, eno Sihon kükapuu Reba shou ghi toluve.

²² Israelmi zütakikihi no ghiqhive kemi gholo asakiqhimi Beor nu Balaam ghi ae.

²³ Eno Jordan no Reuben shiayew kulolau ghuthu ke. Mishighüna hipaqo ngo aphu hipaqo pesü Reuben shiaye, ali kiqi lono, amheghi shivetsü.

²⁴ Moses no Gad shiaye lo ghi, ali kiqi lono amheghi kijeve tsü.

²⁵ Panongu yeghi no Jazer eno Gilead lo aphughi kümtsü, Ammonmi yeghi tüxa, Rabbah kipelau Aroer kuto,

²⁶ Heshbon lono eno Ramath-mizpeh ngo Bethonim kuto, Maha-naim lono Debir lughi kuto,

²⁷ akhila lo Beth-haram, Beth-nimrah, Succoth ngo Zaphon, Heshbon kükau Sihon kükaqha khami, Jordan no aghuthu shino Chinnereth Züghi apeu kuto eno Jordan kukuu kipela küdau kuto.

²⁸ Mishighüna hipaqo ngo aphu hipaqo pesü Reuben shiaye, ali kiqi lono, amheghi shivetsü.

²⁹ Moses no Manasseh shiaye tüxa lau amheghi ishi tsü. Manasseh shiaye tüxa lau ghi, ali kiqi lono amheghi kijetsü.

³⁰ Pano yeghi no Mahanaim lono Bashan qha kümtsü, Bashan kükau Og kükaqha kümtsü, Bashan ghakhu qholo Jairw mishiphu lhotsügho kümtsü;

³¹ Gilead tüxa, Ashtaroth ngo Edrei, Bashan lo Og kükau qholo mishighünaqo. Hipaqo pesü Manasseh nu Makhir limi kikije kini lo lakhi pelo amheghi shi penike ali kiqi lono tsüve.

³² Jordan kukuu eno Jericho kipelau Moab qa yeghi, Moses no kijetsü.

³³ Ikemu Moses no Levi shiaye lau amheghi kiumu tsümoe. Pa no panongu vilo pike toi, Ampeu Israel Lhou no panongu mheghi ke.