JOSHUA 11 - Sumi Naga CL (Re-edited) Bible (BSI)

Canaan Ahuu Leluve

¹ Kughou Hazor kükau Jabin no chilu keno, pa no kükamiqo lau aghinimi puwu, Madon kükau Jobab, Shimron kükau, Achshaph kükau,

² ahuu ato yeghi lo kükamiqo, Chinneroth lono apeu Arabah lo naghuto pukhu philo, eno kulolau Naphoth-dor lo,

³ kipelau ngo kulolau Canaanmi lau, Amorimi, Hittimi, Perizimi, Jebusimi ato lo küami, eno Mizpah yeghi lo Hermon lo Hivimi, kümtsü lau puwu.

⁴ Panongu no azüghimkü lo asaye toi ghüshimi kihi khakümla gholo khurshi ngo khurkulu kutomo amqo shishe kije shi saghi.

⁵ Eno kükami kümtsü küqhano Israelmi sasü aghü shiniye Merom ghoki phivilo aghazü shive.

⁶ Ampeu no Joshua vilo pi, “Panongu jumsa kevilo, thoghiu hipa ghuloki lo I no panongu kümtsü pithive no Israelmi tsüveni. No ye panow khurshiqo pukhu micheve tsü eno khurkuluqo pitive tsülo.”

⁷ Tighenguno Joshua ngo paw ghüshimi kümtsü no züleno Merom ghoki lo ighi no panongu lethuve.

⁸ Ampeu no panongu pesü Israelmi lau phesüve tsüno Israelmi no panongu hasü Sidon Akijeu eno Misrephoth-maim, eno kipelau Mizpah khila kutolo wuve. Panongu no tipaqo lakhimu ghümono kütsave.

⁹ Ampeu no azah tsüke toi Joshua no tishive: pa no khurshiqo pukhu micheve tsüno khurkulu pitive.

¹⁰ Tishino Joshua no idewo Hazor leluve eno azütakikihi pesü akükau pithive, Hazor no kükaqha hi kümtsü shou akütsü shi acheke.

¹¹ Panongu no azütakikihi pesü tile xüküami kümtsü pithive eno kütsave; tile küami lakhimu atuthu shemove eno pa no Hazor phughi pitive tsü.

¹² Joshua no kükami tipaqo phughi kümtsü leluve no azütakikihi pesü ghiqhi khave eno tipaqo kütsave tsü, eno ti ye Ampeu qeu Moses no azah tsükeu kiqi lono tishive.

¹³ Ikemu Hazor phughi Joshua no pitive tsükeu nguno alau ye mishighüna alughi shou shipüaghi keqo ye pititsü move.

¹⁴ Israelmi no amekusho nhemgha ngo lhoxüqo aphughi tipaqo lono süwuve eno panow shive. Ikemu panongu no azütakikihi pesü timi kümtsü ghiqhive eno lakhimu atuthu she ghi qhimove.

¹⁵ Ampeu no Pa qeu Moses lau azah tsüke toi, Moses no Joshua azah tsü eno Joshua no tipatho shie. Pa no Ampeu no Moses azah tsükeqo lakhimu vezü mono pekupu ke.

¹⁶ Joshua no tipa yeghi kümtsü lukhave, ato yeghi lo aghakhuqo, qhaike yeghi, Goshen yeghi, naghuto pukhu lo akeqo, Arabah, eno Israelmi no ato yeghi lo ngo akeqo ngo tipaqo pukhu philo akeqo,

¹⁷ Seir küdau kujosü iqho akeu, Halak naghuto lono Hermon nguno apeu Lebanon khila lo Baal-gad kutolo. Pa no tipaqo lo kükami kümtsü küghaluve no ghiqhi pithi khave.

¹⁸ Joshua ye ado kushuo kutolo tipa yeghi lo kükamiqo sasü aghüshi.

¹⁹ Israelmi sasü visho shive keu phughi, Gibeon lo xüküami Hivimi kumo aye lakhimu kühae. Tinguno alau ye panongu no aghüshi lono lelu keqo ke.

²⁰ Kughengu ti ye Ampeu no kughu keu kiqi lono Pa no tipaqo mlo shikümkave tsüno panongu pelo Israelmi sasü aghüshi peniye ke, tishianguno Ampeu no Moses azah tsüke toi panoqo kipimi qhitsü mono kütsave peniye ke.

²¹ Tipa ghuloki lo Joshua no ighi no Anakim pesü naghuto lo aghakhu akeqo launo eno Hebron, Debir, Anab eno Judah lo naghuto ghakhuqo eno Israel lo naghuto ghakhu kümtsü launo kütüta shivetsü. Eno Joshua no tipaqo ngo panow mishighünaqo kütsave tsü.

²² Israel yeghi lo Anakimi qhoi kühave ikemu Gaza, Gath, eno Ashdod lo khami qhive.

²³ Ampeu no Moses azah tsüke toi Joshua no ayeghi kümtsü leluve. Pa no ti kümtsü pesü Israelmi pelo amheghi shilu penike ashiaye kiqi lono kijeve tsü. Tishino tipa yeghi ye aghükishi lono akulho qhiluve.