JOSHUA 10 - Sumi Naga CL (Re-edited) Bible (BSI)

Khetsünhe no Itha move

¹ Jerusalem kükau Adoni-zedek no Joshua no Ai phughi leluve no kütsavetsü eno Jericho ngo tile akükau lau shi ketoi, Ai kükau shou mla keu chiluve eno Gibeonmi no Israelmi sasü visho shive no pano gholo xüuve keu chilu kemtsa,

² pa ye shishe msave kughengu Gibeon ye mishighüna kije eno kükami phughi lakhi toike, eno ti ye Ai nguno akijeu, tile kiptimi xüküami kümtsü ghüshimi ke.

³ Tighenguno akükau Adoni-zedek no hitoi yesü yepe Hebron kükau Hoham, Jarmuth kükau Piram, Lachish kükau Japhia, eno Eglon kükau Debir lau puwu.

⁴ “I lau iqhoghi lo eno Gibeon lenike I kuphulo kughengu tile timiqo ye Joshua eno Israelmi sasü visho shivae.”

⁵ Ikehu Amorimi yeghi lo kükami pungu: Jerusalem kükau, Hebron kükau, Jarmuth kükau, Lachish kükau, eno Eglon kükau ishi panow ghüshimi küqhano Gibeon le thuve.

⁶ Tileno Gibeonmi no Gilgal ghazü lo Joshua lau asütsa puwu, “No ye ni kughucho kevilo. Mtazü ighi no ni kuphu eno xaphe tsülo, kughengu Amorimi yeghi lo kükami naghuto lo küami kümtsü küqhano ni sasü aghüshi ani.”

⁷ Joshua eno paw ghüshimi kivimi kümtsü küqhano Gilgal lono cheve.

⁸ Ampeu no Joshua vilo pi, “Panongu msa kevilo, I no panoqo pesü o u lo süve tsüae. Panongu lakhimu o zülo puthugho lumo nani.”

⁹ Ikehu Joshua ngo paw ghüshimi no puthotsü chesü Gilgal lono Gibeon lo ighi eno züleno Amorimi leve.

¹⁰ Ampeu no Israelmi nhethe lono pano shithüghüive no Israelmi no Gibeon lono kutomo ghiqhive tsü eno hasü Beth-horon naghuto la kuto iqive no Azekah ngo Makkedah kutolo hawu.

¹¹ Panongu no Israelmi zülono posü iqi Beth-horon ikuqho küdau cheke lono Ampeu no mürasü kuloghi Azekah laghi kutolo ghuqhi no panongu pithive. Israelmi no heqhive tsükeu nguno akichiu no mürasü no veqhive.

¹² Ampeu no Amorimi shou tokulu pe Israelmi tsüke tsala lo Joshua no Israelmi nhethe lono Ampeu pütsae, “Khetsünhe, no ye Gibeon shou ngolo, eno aqhi no Aijalon khila shou ngolo.”

¹³ Ikelo pano shiye no aghümi shou amkhülu moke kutolo khetsünhe no ngove eno aqhi no itha move. Jashar Kaku lo hi yepüani ke kumo keshea? Khetsünhe no atsütsü mta lo ngove eno ilove mono tsala kupuju ngove.

¹⁴ Ampeu no timi sütsa chilu tsüno Israelmi züqhushi aghüshi tsükeu, azüu mu momu ishi kutolo mu atsala hitoi keu khilemu shimphie.

¹⁵ Tishino Joshua ngo paw ghüshimi kümtsü Gilgal ghazü lo idewove.

Amorimi Kükami Pungu Pithive

¹⁶ Amorimi kükami pano pungu ye pojosü Makkedah tuki lo itshü luve.

¹⁷ Eno Joshua lau ishi asütsa pi, “Kükami pano pungu hu Makkedah tuki lo itshü aghike phuluvae.”

¹⁸ Joshua no pi, “Atuki kichi lo atu kije kulu sawo qhive no tile ghukhemi khami qhivelo,

¹⁹ ikemu nongu ye tile ngo kevilo. Aghümi hasü wuno pano thiu ghüshimi chekeqo lelo. Panongu pelo panow mishighüna lo ilope kevilo, kughengu Alhou no panongu shou tokulu pe nongu tsüvae.”

²⁰ Joshua ngo Israelmi no ighono akumto shi panongu kümtsü ghiqhi pithive, ikemu khami ye aphughi liwo alou ilove no xüluve.

²¹ Tishino timi kümtsü no Joshua lau Makkedah ghazü lo ideighive. Tipa yeghi lo khunomu Israelmi shou kiumu pipuku move.

²² Tithiu Joshua no pi, “Atuki khaqhilo eno tile kükami pungu I lau saipeghi lo.”

²³ Panongu no tishive eno Jerusalem, Hebron, Jarmuth, Lachish ngo Eglon kükamiqo khalau saipeghi no

²⁴ Joshua lau ighi, Joshua no Israelmi kümtsü kukütsü no pa gholo wukemi ghüshimi shou atomiqo vilo pi, “Hilau kupunu ighilo, nongu pukhu no kükami hipaqo kuo lo nepuku lo.” Panongu no titoi shive.

²⁵ Tishino Joshua no panongu vilo pi, “Msa momu amlo tülalo kevilo ikemu amlo loghilo kughengu Ampeu no nongu ghümi kümtsü shou titoi shi nani.”

²⁶ Tithiu Joshua no kükami pano pungu ghiqhi pithive eno avela kutolo asübo pungu lo tshüqhipe qhive.

²⁷ Ikemu khetsünhe iloke ghuloki lono Joshua zakütsü lono panongu ghiqhive no panongu no itshü akeu tuki lo vesüve. Eno panongu no atu kijeje pe atuki kichi lakhape qhive, ti ye ishi kutolo tishi acheni.

²⁸ Joshua no tipani Makkedah leluve eno akükau küghaluve. Pa no azütakikihi no timi kümtsü ghiqhive; tile mi lakhimu püxü move. Eno pa no Jericho kükau lau shi ketoi, tile akükau lau ghi tishive.

Canaan Apeu Leluve

²⁹ Joshua eno Israelmi kümtsü no Makkedah qhive no Libnah lo wuve eno panoqo sasü aghüshi.

³⁰ Ampeu no tipa phughi eno akükau pesü Israelmi tsüve. Panongu no lakhimu ghümono kümtsü pithive, panongu no Jericho kükau lau shike toi tipau kükau lau shive.

³¹ Tithiu Joshua ngo Israelmi kümtsü no Libnah kathasü Lachish lo wuve eno aphughi tipau homxa luve eno leluve.

³² Eno Ampeu no Lachish pesü Israelmi u lo süvetsü eno thoghiu ye pa no aphughi tipau leluve eno Libnah lo toi timi kümtsü azütakikihi pesü ghiqhive.

³³ Tithiu Gezer kükau Horam no Lachish kuphuni ke ighi ikemu Joshua no pa eno paw timi lakhimu qhimono kümtsü pithive.

³⁴ Tithiu Joshua ngo Israelmi kümtsü no Lachish kathasü Eglon lo wuve eno aphughi tipau homxa luve no leluve.

³⁵ Tipani no aphughi tipau leve eno azütakikihi pesü kütsave. Lachish lo shi ketoi pa no timi kümtsü pithive.

³⁶ Joshua ngo Israelmi kümtsü no Eglon lono Hebron lo iqhove eno pano sasü aghüshi

³⁷ eno tighi leluve no azütakikihi pesü tile akükau ngo aphughiqo eno timi kümtsü kütsave. Pa no Eglon lau shi ketoi timi lakhimu qhimono pithive.

³⁸ Tithiu Joshua ngo Israelmi kümtsü no idesü Debir lo ighi no ti leve.

³⁹ Pa no tile akükau eno paw hokümxa lo aphughi kümtsü leluve. Eno panongu no azütakikihi pesü timi kümtsü kütsave; pa no timi lakhimu qhimono pithive. Pa no Hebron ngo Libnah shou shi ketoi, Debir eno tile akükau shou ghi tishive.

⁴⁰ Ikehu Joshua no tipaqha kümtsü leluve; ato lo aphughiqo eno qhaike yeghi, naghuto pukhu qha eno akhila ngo tipaqha lo kükami kümtsü leluve. Pa no timi lakhimu qhimono, atuthu she akeqo thaqhü pithive; ti ye Ampeu Alhou no azah tsükeu kiqi lono ke.

⁴¹ Eno Joshua no Kadesh-barnea lono Gaza kutolo, eno Goshen qha kümtsü Gibeon kutolo leluve.

⁴² Joshua no ghuthu khavino kükami hipaqo eno pano yeghi kümtsü leluve, kughengu Ampeu Israel Lhou no Israel züqhushi aghüshi tsüke.

⁴³ Ti kümtsü shive kethiu, Joshua ngo Israelmi kümtsü no Gilgal ghazü lo ide ighive.