JOSHUA 1 - Sumi Naga CL (Re-edited) Bible (BSI)

Alhou no Joshua Süsü

¹ Ampeu qeu Moses thive kethiu, Ampeu no Moses kukuphuu, Nun nu Joshua vilo pi,

² “I qeu Moses ye thivae. Tighenguno itehi ye no eno Israelmi kümtsü ithu no Jordan kathasü I no panongu tsü akeu yeghi lo ilolo.

³ I no Moses lau piqhi püake toi, nongu pukhu no nepuku keu yeghi kuchopu pesü I no nongu tsüvae.

⁴ O ghuthu ghiphi ye apeu asayeqha lono ahuu Lebanon naghuto kuto eno kipelau Euphrates ghoki lono kulolau Hittimi yeghi kümtsü vechesü Azüghi Kije kutolo ke.

⁵ Nono xüake tivilo timi khunomu o theqhimla nani. I no Moses gholo acheke toi o gholo anani. Ni ye khilemu o qhivemo momu o phevemo nani.

⁶ Akumto shilo eno amlo kuloghi shilo, kughengu I no panoqo puasü tsünike piqhi püakeu, nono sakipheu shino panongu pelo ayeghi tipau hu amheghi shi ighilu penani.

⁷ Qeti akumto shilo eno shishe amlo kuloghi shilo, eno I qeu Moses no azah tsükeu kümtsü kutokupui shi pekupu lo. Tipau lono ajeu momu piyiu tsüghüwu kevilo, tishikeu lono nono khila khila wumu, no ye akivishi tokulu shinani.

⁸ Ayezah kaku hipau ye o kichi lono ikhive kevilo ikemu no ye tile yepüa keqo pekupu lunike ghenguno, putho pucho tipau shou kümsüputho alo.

⁹ Akumto shilo eno amlo kuloghi shilopi azah o tsüve ake kumo keshea? Msa kevi momu amlo tülalo kevilo kughengu ni Ampeu o Lhou ye nono khilekhile chemu, o gholo che nani.”

Joshua no Sakipheu Shive

¹⁰ Tishino Joshua no ghüshimi kijemi azah tsü,

¹¹ “Aghazü mta kathasü wuno timiqo kütüghü lo, ‘Nongu chuqupu kutoluve lo, kughengu atsala küthü dolono nongu ye hi Jordan katha iku Ampeu nongu Lhou no nongu tsü akeu yeghi qhasü luniae.’”

¹² Joshua no Reuben ngo Gad, eno Manasseh shiaye tüxa vilo pi,

¹³ “Ampeu qeu Moses no nongu vilo ishi pikeu kümsü lulo, ‘Ampeu nongu Lhou no nongu kulhoqhi tsüno a-a hipau nongu tsü anie.’

¹⁴ Nongu nipu anuliqo eno now pichepighi ye Jordan katha ikumo no hilau xüniae, ikemu nongu dolo aghütomi thaqhü ye nongu thiküzümi züu shino kathasü ikuno panongu kuphu masae,

¹⁵ eno Ampeu no nongu kulhoqhi tsüke toi, nongu thiküzümi kulhoqhi tsülu kemtsa eno Ampeu no panongu tsü akeu yeghi leluve kethiuno nongu ye Ampeu qeu Moses no Jordan kipelau ayeghi nongu tsükeu lo ideighi no ngolu nani.”

¹⁶ Panongu no Joshua khochile, “Nono azah ningu tsükeu kümtsü nino shini eno ni vilo khile wulo pi keno wunie.

¹⁷ Ningu no thokha lo Moses gholu cheke toi o gholuni. Ampeu o Lhou pelo Moses gholo acheke toi o gholo ghi apeniu.

¹⁸ Khuu no nono azah tsükeu ghechile eno o tsa pape moni keno, pa ye pithiveni. Qeti akumto shilo eno amlo kuloghi shilo.”