JONAH 4 - Sumi Naga CL (Re-edited) Bible (BSI)

Jonah Mlokighide eno Ampeu w Kimiyekini

¹ Ikemu tino shishe Jonah loshipüsüve, eno pa ye amloideve.

² Pa no Ampeu lau inikhu no pi, “O Ampeu, hi ye I no I ghakhu lo aphi lono pi akeuke kumo keshea? Tighenguno ni ye mtazü Tarshish lo pove niye shike; kughengu I no ithi ake No ye kimiyekini eno küpükini, amloideni keu lo asheshi eno iqemokeu kikimiye no chhitoi, eno amhekiqi lono süchileve chekeu Lhou ke.

³ Tighenguno O Ampeu, itehi ye kimiyeno I küxüu luve tsülo, kughengu I ghenguno xü akeu ye thiveke pavivae.”

⁴ Eno Ampeu no pi, “No ye amloide küzüpu kiu ani kea?”

⁵ Jonah no mishighüna khalau ipeve no kipelau pa sala apusho lakhi shipe qhi. Pa no tipau kicheqho lo iqa no mishighüna ye kiu shive nani keno ju ghi khea.

⁶ Tilehi Ampeu Alhou no atsünibo lakhi ipeghipe eno tipau no Jonah kütsü shou akicheqho shi thuikughipe, tishianguno alokümgha lono pa süsholu peniye ke. Ikehu Jonah ye atsünibo ghenguno shishe alovive.

⁷ Ikemu kughou thanau vüipeghi keno, Alhou no apithe pelo atsünibo tipau tsaqhipe, ikehu ti ye thizümüive.

⁸ Kughou khetsünhe ipeghi keno, Alhou no kipelau shukuthui keu mülhü puwu, eno khetsünhe no Jonah kütsü yedaqhi, ikehu pa ye thiuve cheghi. Pa pelo thive pelopi pa no khu, “I ghenguno xü akeu ye thiveke pavie.”

⁹ Ikemu Alhou no Jonah vilo pi, “No ye atsünibo ghenguno amloide akepu keshea?” Pa no pi, “Iyei, ni ye amloide akeu pavie, thiveni keu mlokighide pavie.”

¹⁰ Ikehu Ampeu no pi, “No ye atsünibo khikhi nono shosümo momu thuiku pemo keno, kijili lakhi lono ipeghi no tipaji no püghave keu ghenguno amlosa ani.

¹¹ Imaye Ni ye mishighüna kuloghi Nineveh, khile timi lakh lakhi qhethonhe muku shou ani eno pichepighi ghi tijeje ani keno, tipaqo ghenguno amlosa moni keshea? Panongu ye pano u ajeu ngo piyiu ghi mtha kemie.”