JONAH 3 - Sumi Naga CL (Re-edited) Bible (BSI)

Jonah no Nineveh lo Wu

¹ Tithiu Ampeu tsa akiniu Jonah lau ishi ighi,

² “Ithulo, mishighüna kije Nineveh lo wulo, eno I no o vilo pikeu tsa pesü panongu lachile pilo.”

³ Ikehu Ampeu tsa kiqi lono Jonah no ithu Nineveh lo wuve. Nineveh ye shishe akuloghi ghüna, akijelau atsala küthü lache ke.

⁴ Jonah no tile ilo atsala lakhi lache lo wuve, eno pi, “Atsala lhobidi thiu Nineveh ye kütsaleve nani!”

⁵ Nineveh lo timiqo no Alhou pülüve. Panongu no kümvüni ke asheshu, eno akijeu lono akitilau kutolo yeqhiyephi pepuve.

Ninevehmi no Xaide

⁶ Atsa huno Nineveh kükau tove, eno pa no aküka lakhü lono ithuve, pa kükaphi lhaqhive, yeqhiyephi pesü pa küzüluve, eno ayevu lo iqave.

⁷ Eno pa no ashekushu lakhi tsüpuwu no Nineveh lo asheshupe, “Akükau eno paw yepemiw xaküthaza kiqi lono: timi na tüghashi na, pichepighi jeli namu, kiumu miche moni. Khunomu chusho moni,

⁸ ikemu timi eno tüghashi ghi yeqhiyephi pepuni, eno Alhou lau akumtoshi ighamkuni. Kümtsü no paw küsakügha laghi eno kütsakungo keu lono xaideghi lo.

⁹ Khuu no ithi ani kea? Alhou ye xaide luvi eno Pa yiküsa mlokighide süchile luvi, tishi keu lono ningu ye pühamo luvike.”

¹⁰ Kughou panongu no küsakügha laghi lono xaide ighi akeu Alhou no ithulu keno, Pa no panoqo lau amhekiqi süghini piakeu süchileve, eno Pa ye tipau shimove.