JONAH 2 - Sumi Naga CL (Re-edited) Bible (BSI)

Jonah Kighini

¹ Tile Jonah no akha po lono Ampeu, pa Lhou lau inikhu,

² eno pi, “I no I ghime lono Ampeu lau ighae, eno Pa no I khochile tsü; Kithigha po lono I no ighamku, eno Nono I sütsa chilu tsüe.

³ Kughengu Nono akuthoku, azüghi mta lo I vesüve, eno züqozü no I süho luve; O zü fukucho eno fuchighi keu no I shou ikughie.

⁴ Ikehu I no pi, ‘O nhethe lono I küghape hapupovae; ikeghi O kimthe chineki shou I no jupuku anani.’

⁵ I küxü luve tsüniye azüghi eno akuthoku no I süho luve; alupiqo no I kütsü küzüphove

⁶ naghuto kuhu lono ni ye ayeghi qhou iqive, tilau akhaduqo no alholo ghenguno I khathave; ikeghi O Ampeu I Lhou, Nono akuthoku lono I saipeghie.

⁷ Kughou I küxü hau cheghi keno, I no Ampeu kümsülu, eno I kighini no O lau, O kimthe chineki lo ighie.

⁸ Khunono adou julho gihu cheni keno pano ye iqemokeu kikimiye lajupu phevae.

⁹ Ikemu I no shikimthikütsü sütsa pesü O lau aghakishi shini; I no kiu tushoqhive akeno ti tsüni. Xakulupu ye AMPEUw ke!”

¹⁰ Tileno Ampeu no akha pütsa, eno tino qhaike yeghi lo Jonah puqule pheve.