John 9 - Sumi Naga CL (Re-edited) Bible (BSI)

Anhechemi Shipivi

¹ Pa no wuche kelo apunu lono anhethi icheve kemi ithulu.

² Pa khopemi no ighiju, “Rabbi, timi hipau no keo pa puaza xine ghenguno pa ye anhethi iche ghi punu kea?”

³ Jisü no khochile, “Timi hipau momu pa puaza xine no kumoe, ikemu pa küdau no Alhou kümla pephe piye niye ke.

⁴ Atsala küa lono ningu ye I puwu keu kümla shimasae; khunomu akümla shimlave kepu putho tsala wocheni.

⁵ I no ayeghi lo ake tivilo ni ye ayeghilomi küvüe.”

⁶ Hipa tsa pive no Jisü no ayeghi lo müsüqhi no amiti pesü aniba kunu. Tishino pa no timi nhethi lo nutsü

⁷ eno pa vilo pi, “Wulo, Siloam zükucho lono qhuvelo.” (Siloam kiqi ye Puwu). Timi huno wu püzü pa nhethi qhuve no ithulu ghi ideighi.

⁸ Pa kisüghümi ngo pa no khuchu keu ithulu puakeqo no pi, “Timi hipau ye iqa no khuchu chekeu kumo keshea?”

⁹ Khami no, “Hi ye pake” ipi, kütami no, “Moe, pa kimihiue” ipi. Ikemu pa no pi ae, “Timi huye nike.”

¹⁰ Panongu no pi, “Imaye kishino o nhethi tsükholu kea?”

¹¹ Pa no khochile, “Timi lakhi Jisü ipi chekeu no aniba kunupe I nhethi lo nutsü no I vilo, ‘Siloam lo wuno qhuvelo’ ipi. Ikehu I no wuno qhuve kelo I nhethi tsükho luve.”

¹² Panongu no pa vilo pi, “Pa ye khile ani kea?” Pa no khochile, “Ni ye mthae.”

¹³ Panongu no püzüu anhethi kighicheu sasü Phariseemi lau ighi.

¹⁴ Jisü no aniba kunupe timi nhethi xükho tsükeu ye Sabbath tsala lonoke.

¹⁵ Ikehu Phariseemi no pa vilo kishino pa nhethi ithuluve keno ighiju kithe. Pa no pi, “Pa no aniba pesü I nhethi lo nutsü eno I no qhuqhive kelo ni ye ithulu anie.”

¹⁶ Phariseemi khami no pi, “Timi hipau ye Alhou launo ighimoe kughengu pa ye Sabbath yezah hebide ke.” Ikemu kütami no pi, “Axinemi lakhi ye kishino amchipu hipaqo shiluni kea?” Eno panoqo dolo kijetha ipeghive.

¹⁷ Ikehu panongu no anhethi kighicheu vilo iniju kithe, “Pa no o nhethi xükhove tsüake no ye pa ghili kiu pilu nani kea?” Pa no pi, “Pa ye tungkupue.”

¹⁸ Jewmi no timi tipau puaza kusaghi moke kutolo pa ye anhethi iche ache no tsükholu kepi pülü tsümo

¹⁹ eno pa puaza vilo ighiju, “Hi ye nopu apunu lono anhethi iche keshea? Maye itehi pa ye kishino anhethi tsükho luve akea?”

²⁰ Pa puaza no khochile, “Pa ye nipu kepi nino ithi ani eno pa ye apunu lono anhethi iche.

²¹ Ikemu itehi pa ye kishino ithulu, momu khuu no pa nhethi xükhotsü keno ningu ye mthae. Pa ye kichimi shive ake pa vilo ighiju lo, pa ampi no pi nani.”

²² (Pa puaza ye Jewmi msake ghenguno hipatsa pike, kughengu Jewmi no khukhumu Jisü ye Khristo kepi piphe keu ye sinagog lono hapheveni keu shi xathave ke.)

²³ Tighenguno pa puaza no ishi pive, “Pa ye kichimi shivae; pa vilo ighiju lo.”

²⁴ Ghuthu akiniu panongu no anhethi iche achekeu kuno pa vilo pi, “Alhou jepipi tsülo. Nino ithi anike timi hipau ye axinemie.”

²⁵ Pa no pi, “Pa ye axinemi kemo keno ni ye mthae. Thime lakhi I no ithi ani, ni ye anhethi iche ache ikemu itehi ni ye ithuluvae.”

²⁶ Panongu no pa vilo pi, “Pa ye o lau kiu shitsü kea? Pa ye kishi o nhethi xükhotsü kea?”

²⁷ Pa no khochile, “Ni ye nongu vilo pivae, ikemu nongu no initsü amoe. Nongu ye kushiye chilu kitheni shi ani kea? Nongu ghi pa khopemi shiveni shi ani keshea?”

²⁸ Tileno panongu no pa thaigha ghi pi, “Nou no pa khopemi, ikemu ningu ye Moses khopemie.

²⁹ Ningu no ithi akeu no Alhou ye Moses pütsae, ikemu timi hupau ye pa no khilano ighi keno ningu ye mthae.”

³⁰ Timi huno khochile, “Ya, ti ye akichiqhie! Pa ye khilano ighi keno nongu ye mthae, ikeghi pa no I nhethi xükhove tsüe.

³¹ Ningu no ithi anike Alhou ye axinemi tsa initsü chemoe, ikemu khunono Alhou mlla eno Pa pulou shi cheni keno Alhou no pa tsa initsü cheni.

³² Ayeghiqha lhoke khunomu apunu lono anhethi iche kemi nhethi tsükho luvepe keu chimla aphie.

³³ Timi hipau no Alhou launo ighi püaghimo aye pa ye kiumu shimlani cheke.”

³⁴ Panongu no pa khochile, “No ye axine lo punusü püani püzü nono ningu shikani kea?” Tishino panongu no pa hapheve.

³⁵ Panongu no pa hapheve keu Jisü no chilu, eno pa phulu kelo Jisü no pi, “No ye Timi Nu shou pülübe anima?”

³⁶ Pa no khochile, “Akijeu, pa ye khuue pi ni ye pa shou pülübeni kea?”

³⁷ Jisü no pa vilo pi, “No ye pa ithuluvae eno o pütsa akeu huno pa ke.”

³⁸ Pa no pi, “Ampeu, I no pülübe ani,” eno pa no Jisü mllae.

³⁹ Jisü no pi, “Küghakütha ghenguno ni ye hipa yeghi lo ighi, tishianguno ithumla no akemi pelo ithulupe eno ithulu akemi pelo anhethi icheve peniye ke.”

⁴⁰ Pa phivilo Phariseemi khami akeqo no hipau chilu no iniju, “Ningu ghi anhethi icheve akeshea?”

⁴¹ Jisü no khochile, “Nongu no anhethi icheke aye nongu ye akipimi kühani cheke, ikemu itehi nongu no ‘Ningu ye ithulu ani,’ ipi anike ghenguno nongu kipimi ye aniae.”