John 8 - Sumi Naga CL (Re-edited) Bible (BSI)

¹ ikemu Jisü ye Olive Toghi lo wuve.

² Thanau inaqhe itheno pa no achineki lo ideighi. Timi kümtsü no pa lau ighi, pa no iqave no panoqo kütsü.

³ Ayezah shikükami ngo Phariseemi no totimi lakhi salha aghi kelono küghape ighi no panongu mta lo qhino

⁴ pa vilo pi, “Shikükau, totimi hipau ye salha aghi kelono küghalue.

⁵ Ayezah lo totimi hikithipu ye atu pesü veqhi lopi Moses no azah ningu tsüpüani. Ike no ye kiu pi nani kea?”

⁶ Panongu no pa vilo hipa tsa pikeu ye pa peju no akipimi pa shou beniye ke. Jisü no pishiqhope pa uloti pesü ayeghi lo yepuku.

⁷ Panongu no pa iniju kichichi auve kehu pa no puthughove no pi, “Nongu gholo khuu no axine shipüamo keno pa paghino li shou atu vepukulo.”

⁸ Pa no itaghi pishiqhope pa uloti pesü ayeghi lo yepuku.

⁹ Ikemu kughou panongu no hipa tsa chilu keno panongu gholo kichimi no atüghü shino lakhikhi no wokhave, eno Jisü likhi atotiu no pa zülo puthughope aghive.

¹⁰ Jisü no ithughi no li vilo pi, “Totimi, panongu ye khila khave akea? Khumu akipimi o tsümove akeshea?”

¹¹ Li no khochile “Ampeu, khumu kühavae.” Tile Jisü no pi, “Imaye ni ghi akipimi o tsüamoe; wovelo, eno axine shikithe kevilo.”

Ni ye Ayeghiqha Küvü

¹² Jisü no itaghi timiqo vilo pi, “Ni ye ayeghiqha küvüe. Khunono I papeni keno aküzü lo chemo nani ikemu aküxüpu küvü anani.”

¹³ Ikehu Phariseemi no pa vilo pi, “No ye o sala thopi shi auvae, o shepe ye kuchou kumoe.”

¹⁴ Jisü no khochile, “I no ni ampi shepe shi aghi namu, I shepe ye kuchoue, kughengu ni ye khilano ighi eno khila wucheni keno I no ithi ani. Ikemu ni ye khilano ighi momu khila wucheni keno nongu ye mthae.

¹⁵ Nongu ye ashi lono küghatha cheni; ni ye khuu shoumu küghatha chemoe.

¹⁶ Tsala I no küghatha namu, Iw küghakütha ye kuchou, kughengu ti ye I likhino küghatha anike kumoe, ikemu ni eno Apu khuu I puwu keno nikujo noke.

¹⁷ No Yezah lo mikini no thopi shikeu no kuchoue pi yepüani.

¹⁸ I no I ghili ashepe shi ani eno Apu I puwu keu no I shepe shitsü ani.”

¹⁹ Ikehu panongu no pa vilo pi, “O pu ye khile ani kea?” Jisü no khochile, “Nongu ye ni eno I Pu mu mthae. Nongu no ni ithike aye I Pu ghi ithini cheke.”

²⁰ Hi kümtsü pa no achineki lo kütsü akelono akümllagho kiqhi-a phivilo no pike; ikemu khunomu pa küghamoe kughengu pa do ye ighi mono ae.

²¹ Pa no itaghi panoqo vilo pi, “Ni ye wuve nani eno nongu no I phuju nani, eno nongu ye no xine lono thive nani. I no khila wucheni keno nongu ye ighimlae.”

²² Ikehu Jewmi no pi, “Pa no, ‘I no khila wucheni keno nongu ye ighimlae’ ipi ani keke pa ye pa ampi pithiveni cheni keo?”

²³ Pa no panoqo vilo pi, “Nongu ye aqhou no ighi, ikemu ni ye kunguu no ighi. Nongu ye hipa yeghi lomie, ikemu ni ye kumoe.

²⁴ I no nongu vilo pike nongu ye no xine lono thive nani, kughengu nongu no ni ye Pa kepi pülümo kelo nongu ye no xine lono thive nani.”

²⁵ “No ye khu kea?” ipi panongu no pa vilo ighiju. Jisü no pi, “Abothu lono I no nongu vilo pi akeu huke.

²⁶ Ni ye nongu ghili pikepu kutomo ani eno küghathabe kepu kutomo ani, ikemu khuu no I puwu keno Pa ye kuchou, eno Pa launo kiu chilu keno tipau pesü I no ayeghiqha lau sheshu cheni.”

²⁷ Pa no Apu ghili pesü panoqo vilo piakeu panongu ye vethamlae.

²⁸ Ikehu Jisü no pi, “Kughou nongu no Timi Nu ikhiqheni keno, tileno nongu no ni ye Pa kepi ithi nani; eno ni ye kiumu I küka lono shichemo, ikemu Apu no kiu I shika keno ti likhi pichenie pi ithi nani.

²⁹ Khuu I puwu keno Pa no I gholo ani, Pa ye I likhi qhive mphie kughengu I no alhokuthu pa lokiqipu shi acheni.”

³⁰ Pa no hipaqo pi akelo kutomo no pa shou pülü luve.

Kuchou huno Nongu khaqhiphe nani

³¹ Ikehu Jewmi khunono Jisü pülülu keno tipaqo vilo pa no pi, “Nongu no I tsa papelu aye nongu ye kuchou no I khopemi,

³² nongu no kuchou ithi nani eno kuchou huno nongu khaqhiphe nani.”

³³ Panongu no pa khochile, “Ningu ye Abraham laghami eno khuno qüaxemi mu shimphi. Ike kishino no ye ‘Nongu khaqhiphe nani’ ipi ani kea?”

³⁴ Jisü no panoqo vilo pi, “Kuchou no I no nongu vilo piani, khuu no axine shini keno pa ye axine qüaxemi.

³⁵ Aqüaxemi ye alholo akibo lo auve chemo, ikemu Anu ye alholo achenie.

³⁶ Ikehu Anu no nongu khaqhiphe aye, nongu ye kuchou no kuqho phevae.

³⁷ Nongu ye Abraham laghami kepi I no ithi ani, ikeghi nongu lolo I tsa ngokepu küha kehu nongu ye I pithini ke phucheni.

³⁸ I Pu no kiu I piye keno I no picheni, ikemu nongu ye nongu papu no kiu piye keno ti shicheni.”

Nongu Papu Tüghami

³⁹ Panongu no Jisü khochile, “Ningu papu ye Abraham ke.” Pa no panoqo vilo pi, “Nongu no Abraham tianuli keaye pa no mlakeu nongu ghi shiniche,

⁴⁰ ikemu Alhou launo kuchou kiu chilu keno nongu vilo pikeu timi hu pithiveni ye nongu no phucheni. Abraham ye hitoi shipüamoe.

⁴¹ Nongu ye nongu papu no shikeu kümla shiani.” Panongu no khochile, “Ningu ye tüqhanu kumoe. Ningu ye Apu lakhi likhi ani, ti ye Alhou ke”

⁴² Jisü no panoqo vilo pi, “Alhou no nongu papu keaye nongu ye I kimiyeni cheke, kughengu ni ye Alhou launo ighi eno ni ye hile ani. Ni ye I kutoshi no ighike kumoe ikemu Pa no I puwuke.

⁴³ Kushiye I no pi akeu nongu ye vethamla kea? Ti ye nongu no I no pikeu tsa inini shimo kehue.

⁴⁴ Nongu ye nongu papu tüghami laumi eno nongu papu gho-apulou shitsüni keu no nongu pulou ke. Pa ye abothu lono ghikiqhiu, eno kuchou küdau aju mphi kughengu pa lolo kuchou kühake. Kughou pa no mikini keno ti ye pa lhoaye kuchou piye ani, kughengu pa ye akimkiu eno akimki kümtsü papu ke.

⁴⁵ Ikemu I no kuchou tsa pike ghenguno nongu ye I pülümoe.

⁴⁶ Nongu gholo khuu no akipimi I tsülu nani kea? I no nongu vilo kuchou tsa pi aghi aye kushiye nongu ye I pülümo kea?

⁴⁷ Khunono Alhou laumi keno pa no Alhou tsa chilu cheni. Nongu no chimla keu kiqi ye nongu ye Alhou laumi kumoe.”

Ni ye Abraham Züuno Ache

⁴⁸ Jewmi no pa khochile, “No ye Samariami eno o lolo tüghami anie pi ningu no pikeu ye achipi kumo keshea?”

⁴⁹ Jisü no khochile, “I lolo tüghami kühae, eno ni ye I Pu gihu cheni kemu nongu ye I gihu chemoe.

⁵⁰ Ikeghi ni ye I likhi I jekipi phuchemoe; tipau phu chekeu lakhi ani eno pa ye küghaküthau ke.

⁵¹ Kuchou no I no nongu vilo piani, khuu no I tsa peluni keno pa ye khilemu thimo nani.”

⁵² Jewmi no pa vilo pi, “No ye tüghami o lolo anie pi itehi ye nino ithivae! Abraham ye thivae, eno tungkupmiqo ghi thivae, ikeghi nono, ‘khuu no I tsa peluni keno khilemu akithi michemo nani’ ipi ani.

⁵³ No ye ni sü Abraham nguno akijeu keshea? Pa eno Tungkupmiqo ghi thivae. No ye o küghape khuue piani kea?”

⁵⁴ Jisü no khochile, “I no I jekipipu shi aye I jekipi ye kiumu kumoe, Ikemu nongu no, ‘Pa ye ni Lhou’ ipiche keu I Pu huno I je pipitsü cheni.

⁵⁵ Nongu ye pa mthae ikemu ni ye pa ithi ani. Tsala I no ni ye pa mthae pi aye ni ye nongu toi kimkimi, ikemu ni ye Pa ithi ani eno Pa tsa pape cheni.

⁵⁶ Nongu pasü Abraham ye I tsala ithuluni chenie pi alovi che, eno pa no ti ithulu no amlokiqi shie.”

⁵⁷ Tileno Jewmi no pa vilo pi, “No ye ampe lhopungu mu tomphi püzü Abraham ithuluve akeshea?”

⁵⁸ Jisü no pi, “Kuchou no I no nongu vilo piani, Abraham züuno ni ye acheghivae.”

⁵⁹ Ikelo panongu no pa veniye atu ikhilu, ikemu Jisü no itshüve no achineki lono ipeve.