John 6 - Sumi Naga CL (Re-edited) Bible (BSI)

Jisü no Timi 5,000 Loji

¹ Hipa thiu Jisü ye Galilee züghi, khikhi Tiberias Züghi keno, ti kukuu wuve.

² Eno aqokitikhi kije no Pa papeche, kughengu pa no küsükinimi shou amchipu jeli shi akeu panongu no ithulu ke.

³ Jisü no naghuto lo iqho no pa khopemi sasü iqa.

⁴ Jewmiw Hechekulu Ghulhu ye punukhoi ae.

⁵ Jisü no pishipuwo aqokitikhi no pa lau chekeu ithulu püzü Philip vilo pi, “Timi hipaqo no chu penike ningu ye khileno asho qhüni kea?”

⁶ Jisü ye pa ampi no kiu shikepu keno ithi pülaghi Philip peju niye hipa tsa pike.

⁷ Philip no khochile, “Atsala 200 jume pesü asho qhünamu timi hujeje gholo ye atachumu tsüwo toni chemoe.”

⁸ Pa khopemi lakhi Peter thiküzüu Andrew no Jisü vilo pi,

⁹ “Hilau itimi lakhi no barleythi shopa pungu eno akha kini ani, ikemu hijeje gholo ye tino kiu shiluni kea?”

¹⁰ Jisü no pi, “Timiqo küghüqave lo.” Tile atsüni kutomo akehu timiqo no iqakhave, kiptimi likhino 5,000 qhalo ae.

¹¹ Tishino Jisü no ashopa ikhilu no shikimthi tsüve kethiu iqa akeqo kijetsü. Titoi akha ghi panongu no lunishi ke thaqhü kijetsü.

¹² Kughou panongu no aghakiqi shi chuve keno, Jisü no akhopemi vilo pi, “Kiumu kilheve monike munomugho ghi kiche kütsülo.”

¹³ Ikehu timiqo no ashopa pungu lono chu püzü chukhamo no qhive keu panongu no kichekütsü kelo ashoghi chighikini chhitoi shilu.

¹⁴ Kughou pa no amchipu shikeu timiqo no ithulu keno, panongu no pi, “Kuchou no khuu ayeghiqha lo ighi niye ani keno Tungkupu hu hi chenie!”

¹⁵ Panongu no ighi püzü anguka lono pa pesü akükau shive peniye akeu pimhe luve no Jisü ye itaghi pa likhi xaidesü naghuto lo wuve.

Jisü no Azü shou Alache

¹⁶ Kughou Kijiliu shive keno pa khopemi ye azüghi lo iqi no,

¹⁷ ashuka lo iku püzü azüghi kathasü Capernaum küdau wuche. Ti ye züghüive kemu Jisü ye panoqo lau ighi mono ae.

¹⁸ Amülhü kümka ighi akehu azü fuchighi ae.

¹⁹ Kughou panongu no ashuka sasü kilometer pungu-tsügho tohilo wuve keno, Jisü no azü shou no alachesü ashuka küdau cheghi keu ithulu no panongu ye shishe msave.

²⁰ Ikemu pa no panoqo vilo pi, “Ni ke msa kevilo.”

²¹ Panongu no alokivishi ashuka lo pa sasü luve, eno paikhavi ashuka ye panongu no wucheke-a tove aghi.

Ni ye Aküxüpu Sho

²² Tishiwo thoghiu aqokitikhi azüghi tüxau ngove keqo no ashuka lakhi likhi akeu ithulu, eno Jisü ye pa khopemi gholo ashuka lo ikumo no akhopemi likhino wuve kepi ithive.

²³ Ampeu no shikimthi tsüno panongu no asho chukeu-a phivilo Tiberias lono ashuka kütauqo ighi.

²⁴ Kughou aqokitikhi no Jisü na pa khopemi namu tilau aghi move keu ithive keno, panongu ampi no ashuka lo iku püzü Capernaum lo Jisü phuwu.

²⁵ Kughou panongu no azüghi kukuu Jisü phulu keno panongu no pa vilo ighiju, “Rabbi, no ye kughou no hilau ighive kea?”

²⁶ Jisü no khochile, “Kuchou no I no nongu vilo piani, nongu no I phu chekeu ye amchipuqo ithulu kehu kumono aghakiqishi asho chulu kehue.

²⁷ Pühave kepu chuqupu ghenguno kumono lhokta küxü kutolo akepu chuqupu, khikhi Timi Nu no nongu tsü nani keno, tipau ghenguno mlalo. Kughengu pa shou Apu no amchipu chishidavae.”

²⁸ Tileno panongu no pa vilo iniju, “Alhou kümla shinike ghenguno ningu ye kiu shimasa kea?”

²⁹ Jisü no khochile, “Pa no khuu puwu keno, nongu no pa pülü luvelo, hi no Alhou kümla ke.”

³⁰ Panongu no pi, “Tishiaye ningu no ithulu no o pülüni ke no ye kiu michipu shicheni kea? No ye kiu kümla shicheni kea?

³¹ Ni puasüqo ye asayeqha lo manna chuke; ti ye ishi yepüake toi, ‘Panoqo pelo chu peniye Pa no kungugha lono asho tsüe.’”

³² Tile Jisü no panoqo vilo pi, “Kuchou no I no nongu vilo piani, Moses no kungugha lono asho nongu tsüke kumoe, ikemu I Pu no kungugha lono kuchou sho nongu tsüe.

³³ Kughengu khuu kungugha lono iqighi no ayeghiqha lau aküxüpu tsü keno, Pa no Alhou no tsükeu shoke.”

³⁴ Tileno panongu no pi, “Akijeu, alhokuthu asho hipau ni tsüalo.”

³⁵ Jisü no panoqo vilo pi, “Ni ye aküxüpu shoke, khunono I lau ighini keno müzüthi monani, eno khunono I pülüni keno khilemu tüghüthi monani.

³⁶ Ikemu I no nongu vilo pive ake nongu ye ni ithuluve akeghi I pülümoe.

³⁷ I Pu no I tsükeu kümtsü I lau ighi nani, eno I lau ighi keqo ni ye khilemu hapheve monani.

³⁸ Kughengu ni ye I pulou shiniye kungugha lono iqighike kumoe, ikemu I puwu keu pulou shiniye ke.

³⁹ Eno I puwu keu pulou ye hike: Pa no itsü keqo lakhimu pühave mono ashekha tsala lono xüputhu niye ke.

⁴⁰ Kughengu I Pu pulou ye hike: khunono Anu shou jupuku no pa pülübeni keno kümtsü pelo lhokta küxü apeniye ke, eno I no ashekha tsala lo pa xüputhu nani.”

⁴¹ Jisü no, “Ni ye kungugha lono iqighi keu sho,” ipike ghenguno Jewmi ye pa küla thuve.

⁴² Panongu no pi, “Timi hipau ye Joseph nu Jisü, pa puaza ye ningu no ithi anike kumo? Pa ye kishino itehi ye ‘Ni ye kungugha lono iqighie’ ipi ani kea?”

⁴³ Jisü no panongu khochile, “Nongu dolono küla akevilo.

⁴⁴ I Pu I puwu keu no sünhe saghimo keloye khumu I lau ighimlae. Eno ashekha tsala lo I no pa xüputhu nani.

⁴⁵ Tungkupmi kaku lo ishi yepüani, ‘Panongu kümtsü Alhou no shika nani.’ Apu tsa chilu no Pa launo shikalu keqo kümtsü I lau ighi cheni.

⁴⁶ Tipau kiqi ye khuu no Alhou launo ighi keno, pa likhino Apu ithuluve ake thono kümtsü noke kumoe.

⁴⁷ Kuchou no I no nongu vilo piani, khukhumu pülü keu no lhokta küxü ani.

⁴⁸ Ni ye aküxüpu shoke.

⁴⁹ Nongu puasüqo ye asayeqha lono manna chuno thiveke.

⁵⁰ Ikemu asho hi kungugha lono iqighi keu ye chu peniye kethono thive peniye kumoe.

⁵¹ Ni ye kungugha lono iqighi keu aküxüküa shoke. Khuu no hipa sho chuni keno pa ye alholo xü nani. I no ayeghiqha küxüpu ghenguno tsü akeu sho ye I shi ke.”

⁵² Tile Jewmi dolono kighe thuve, “Timi hipau ye kishi püzü ningu pelo chu penike pa shi tsüni kea?”

⁵³ Ikehu Jisü no panoqo khochile, “Kuchou no I no nongu vilo piani: nongu no Timi Nu shi eno aji chusho moke thaqhülo nongu lolo aküxüpu kühae.

⁵⁴ Khunono I shi chuni eno I ji shoni keno lhokta küxü ani eno ashekha tsalani I no pa xüputhu nani.

⁵⁵ Kughengu I shi eno I ji no kuchou chuqu-kusho ke.

⁵⁶ Khunono I shi chuni eno I ji shoni keno I gholo xüküqhape ani eno I no pa gholo xüküqhape ani.

⁵⁷ Apu xüakeu no I puwu eno I no Apu ghenguno xü aketoi, khunono I shi eno aji chushoni keno I vecheo pa ghi xülu nani.

⁵⁸ No puasüqo no chupusü thive keu toi mono hi no kungugha lono iqighi keu shoke. Khunono hipa sho chuni keno alholo xünani.”

⁵⁹ Jisü no Capernaum lo sinagog lo shika akelono hipaqo pike.

Lhokta Küxü Tsa

⁶⁰ Kughou apapemi kutomo no hipa tsa chilu no keno, panongu no pi, “Hi ye mkamghai keu tsake khuu no pekulupu kea?”

⁶¹ Jisü no pa khopemi ye hi ghenguno nhenheshi akeu ithive no panongu vilo pi, “Hino nongu mlo pünave akeshea?

⁶² Imaye Timi Nu no Pa no püzüu acheke-a lo iku chekeu nongu no ithulu aye kishi nani kea?

⁶³ Aküxü tsü chekeu ye Aghungu noke; ashi ye kiumu shimlae. I no nongu vilo pivekeu tsa no aghungu eno aküxüpu ke.

⁶⁴ Ikemu nongu gholo khami ye pülü amoe.” (Kughengu khunono pülümo nani eno khuu no pa thechuve nani keno Jisü ye abothu lono ithi ake.)

⁶⁵ Pa no pi, “Hi ghenguno I no nongu vilo pivae, Apu no azah tsümo keloye milakhi mu I lau ighimlae.”

⁶⁶ Hi ghenguno pa papemi kutomo no idechile wove no pa gholo chemove.

⁶⁷ Ikehu Jisü no pano chighikini vilo pi, “Nonguu ghi wuve nishi ani keshea?”

⁶⁸ Simon Peter no pa khochile, “Ampeu, ningu ye khuu lau wuni kea? Nono lhokta küxüpu tsa ani,

⁶⁹ eno no ye Alhouw Akimtheu kepi nino pülü luve no ithivae.”

⁷⁰ Jisü no panoqo khochile, “I no no chighikini kishelu kekumo? Ikeghi nongu gholo lakhi ye tüghamie.”

⁷¹ Pa ye Simon Iscariot nu Judas vehu piae, kughengu pa no akhopemi chighikini gholo lakhi keghi Jisü thechuni ye akehue.