John 5 - Sumi Naga CL (Re-edited) Bible (BSI)

Sabbath Tsalani no Shipivi

¹ Hipa thiu Jewmi Ghulhu lakhi lo Jisü no Jerusalem lo iqho.

² Jerusalem lo Ambe Khagho phivilo ayizü lakhi, Aramaic tsauno Bethesda ipikeu ache eno tipau ye Apusho pungu ajoshi ache.

³ Hile alho vimo kemi kutomo ae—anhethi kighichemi, apukhu kinita kemi, anhü kithimi.

⁴ Kughengu ado adolo kungumi no ayizükucho lo iqi azü xukutho tsüche: azü xukuthove kethiu khukhumu atüghüshi ilolu keu ye pa no kiukiu küsü aghimu viluve che.

⁵ Tile ampe shighi tache süve kemi lakhi ae.

⁶ Kughou Jisü no timi tipau no tile ihozü akeu ithulu eno pa ye ado kushuo tile auvae pi ithi keno, pa no pa vilo pi, “No ye viluveni shi anima?”

⁷ Aküsüu no pa khochile, “Akijeu, kughou azü xukuthoni keno, ni ye I sawo azü lo süni kemi khumu kühae, eno I no ilo niye chephi lono kütami no I züuno ilove cheni.”

⁸ Jisü no pa vilo pi, “Ithulo, o züaphi ikhiqhe luvelo, eno alache lo.”

⁹ Paikhavi no timi huye viluve no pa züaphi ikhiqhe luve eno alache wuve. Tipa tsalani ye Sabbath shiae.

¹⁰ Ikehu Jewmi no timi viluve keu vilo pi, “Ishi ye Sabbath ke o züaphi pesü chekeu ye ayezah lo kühae.”

¹¹ Ikemu pa no khochile, “Timi khuu I shipivi keno, pa no I vilo ‘O züaphi ikhiqhe luve no alachelo’ ipike.”

¹² Panongu no pa ighiju, “O vilo ‘O züaphi ikhiqhe luve no alachelo’ ipikeu timi ye khuu kea?”

¹³ Ikemu pa ye khuu no keno mthae, kughengu Jisü no tile aqokitikhi akeu gholo ilove ke.

¹⁴ Athiuno Jisü no achineki lo timi hu ithulu no pa vilo pi, “Julo, no ye vivae! Hinguno hilau ye kiuala alhoksa o shou ighi pemoni ke axine shikithe kevilo.”

¹⁵ Timi huno wuve no Jewmi vilo pa shipivi tsükeu ye Jisü kepi pive.

¹⁶ Hi ghenguno Jewmi no Jisü pishipuju thuve, kughengu pa no Sabbath tsala lono hitoi keu kümla shike.

¹⁷ Ikemu Jisü no Jewmi khochile, “I pu ye itehi kutolo mla ani eno Ni ghi mla anie.”

Jisü ye Alhou sasü Aqhemi

¹⁸ Hi ghenguno Jewmi no alaushi Jisü pithiveni ke phuthuve, kughengu pa no Sabbath hexakeu likhi kumono Alhou pesü papue pi, eno pa ampi pesü Alhou sasü aqhemi shike.

Anu Kükagha

¹⁹ Ikehu Jisü no panoqo vilo pi, “Kuchou no I no nongu vilo piani, Anu ye pa kutoshino kiumu shimlae, ikemu Apu no shiaghi keu pa no ithulu keu likhi shicheni. Apu no kiu shi keno Anu ghi tishi cheni.

²⁰ Kughengu Apu no Anu kimiye cheni eno Pa ampi no shikeu kümtsü pa piye cheni. Eno nongu pelo akichiqhi penike akümla hinguno akijeu pa piye nani.

²¹ Kughengu Apu no kithimi xüputhu no aküxü tsü ketoi, Anu ghi aküxü pesü khuno tsünishi keno tsü nani.

²² Apu ye khuu shoumu küghathabe chemoe, ikemu küghakütha kümtsü pesü Anu tsüvae,

²³ tishianguno Apu gihu ketoi kümtsü no Anu gihu peniye ke. Khunono Anu gihu moni keno, pa puwu keu Apu hu gihu movae.

²⁴ Kuchou no I no nongu vilo piani, khunono I tsa chilu no I puwu keu pülüni keno lhokta küxü anani. Pa ye küghakütha lo ilomo nani, ikemu akithi lono aküxü lo wuluvae.

²⁵ “Kuchou no I no nongu vilo piani, kithimi no Alhou Nu sütsa chilu, eno pa sütsa chilu kemi no xüluni keu ghuloki wocheni, eno ti ye ighivae.

²⁶ Kughengu Apu no Pa lolo aküxüpu aketoi, Pa no Nu pelo ghi aküxüpu pa lolo apenike tsüvae.

²⁷ Pa no Anu pelo küghatha penike kükagha tsüvae, kughengu pa ye Timi Nu ke.

²⁸ Hipau lo akichiqhi kevilo, kughengu aghuloki wocheni, akumo lo akemi kümtsü no pa sütsa chilu no

²⁹ ipeghi nani, khunono akivi mla püaghini keno aküxüpu lo xüputhu nani, eno alhoksa mla püakeqo no küghakütha lo xüputhu nani.

Jisü Thopimi

³⁰ “Ni ye I ka-agha loye kiumu shimlae. I no chilu no küghatha cheni, eno Iw küghakütha ye achipie, kughengu ni ye I gho-apulou kumono I puwu keu gho-apulou shicheni.

³¹ Tsala I no ni ampi shepe shi aye, I shepe ye kuchou kumoe.

³² I shepe shiakeu lakhi ani, eno pa no kiu I shepe shiani keno ti ye kuchou kepi I no ithi ani.

³³ Nongu no John lau aghinimi puwu, eno pa no kuchou thopi shive tsüae.

³⁴ I no ashepe ithulu keu ye timi launo ke piamoe, ikemu nongu xalu peniye ni ye hipaqo piani.

³⁵ John ye iqü akeu eno vüqai akeu kulu eno nongu no pa küvü lo ado hami alovini ke puloe.

³⁶ Ikemu I no ashepe akeu ye John shepe nguno akijeu ke. Kughengu Apu no I pelo mlakupu peniye I tsükeu, akümla khikhi I no shiani keno, tipaqo no Apu no I puwu kepi thopi shiani.

³⁷ Apu I puwu keu Pa ampi no Iw thopi shitsüke. Nongu ye khilemu Pa sütsa chimla aphi, Pa koghe khilemu ithumla aphi,

³⁸ eno nongu lolo Pa tsa kühae, kughengu Pa no khuu puwu keno nongu no pülümo ke.

³⁹ Nongu no Kuchoyesü phuju cheni, kughengu nongu no tipau lono lhokta küxü ani kepi kümsü cheni. Kuchoyesü tino Iw thopi shicheni,

⁴⁰ ikeghi nongu ye aküxüpu ithuluni ke I lau ighi chemoe.

⁴¹ Ni ye timi launo agigihu laju chemoe.

⁴² Ikemu I no ithi anike nongu ye alolo Alhou kikimiye kühae.

⁴³ Ni ye I Pu je lono ighi ani, ikemu nongu no ni ikhilumoe. Tsala kütami no pa ampi je lono ighi aye, nongu ye pa ikhilu nani.

⁴⁴ Nongu no lakhino lakhi launo akishe kütsü lucheni, ikemu Alhou khuu Pa likhi keno, Pa launo ighikeu shekiqhe ye phumoke kishino pülü luni kea?

⁴⁵ Ni ye Apu zülono nongu nguku nanie pi kümsü kevilo. Nongu ngukuni keu ye Moses ani, nongu no now lajupu pa shou becheni.

⁴⁶ Nongu no Moses pülüke aye nongu ye I pülüni cheke, kughengu pa no I ghili yeke.

⁴⁷ Ikemu nongu no pa kiyeqo pülümo keno kishino I tsa pülüni kea?”