John 4 - Sumi Naga CL (Re-edited) Bible (BSI)

Jisü ngo Samaria Limi

¹ John nguno alau Jisü no apapemi kulu eno baptiz shilu akeu Phariseemi no chiluvae pi Jisü no ithive kelo

² (kuchou loye pa khopemi no thono Jisü ampi ye baptiz shitsümoe),

³ Jisü ye Judea qhive no Galilee lo idewove.

⁴ Pa ye Samaria kathasü wu masave.

⁵ Ikehu Pa ye Samaria lo Sychar ipikeu mishiphu lo ighi, ti ye Jacob no pa nu Joseph tsükeu alu phivilo ke.

⁶ Jacob zükikhe tile ache, Jisü ye aghüzüla lo che kehu akulho shive no azükikhe phivilo iqa ae. Ti ye puchomghü shiae.

⁷ Ikelo Samaria lono totimi lakhi azü puniye ighi. Jisü no li vilo pi, “Azü I piyelo.”

⁸ (Kughengu pa khopemi ye achuqupu qhüniye mishighüna lo wuveke.)

⁹ Samaria liu no Jisü vilo pi, “Kishino no, Jewmi no ni Samaria liu vilo azü piyelo piani kea?” (Kughengu Jewmi ye Samariami sasü kühali chemoke.)

¹⁰ Jisü no li khochile, “Alhou no agho tsükeu nono ithi aghi, eno o vilo, ‘Azü I piyelo’ ipi akeu ithi aghike aye, no ye pa vilo aküxüpu zü khuniche eno pa no o tsüniche.”

¹¹ Totimi huno pa vilo pi, “Akijeu, no ye azü shophe kepu kiumu küha eno azükikhe ye thonhei anike khilano aküxüpu zü süghini kea?

¹² Ningu pasü Jacob no azükikhe ningu tsüe, pa ampi ghi, pa tianuli eno atsüaqu kümtsü hileno shocheke no ye pa nguno akijeu keshea?”

¹³ Jisü no li vilo pi, “Hipa zü shokemi kümtsü tüghüthi kitheve nani,

¹⁴ ikemu khunono I no tsükeu zü shoni keno, pa ye khilemu tüghüthi kithemo nani. I no azü pa tsükeu huno pa lolo lhokta küxü züpuki shi qoipeghi nani.”

¹⁵ Totimi huno pa vilo pi, “Akijeu, azü hipau I tsülo, tishianguno ni ye tüghüthi moae eno azü punike hile ighi moae.”

¹⁶ Jisü no pi, “Wolo, o kimi kusasü ighilo.”

¹⁷ Totimi huno pa khochile, “Ni ye akimi kühae.” Jisü no li vilo pi, “Nono, ‘Ni ye akimi kühae’ ipi akeu ye achipi;

¹⁸ kughengu no ye akimi pungu ache, eno nono itehi sasü akeu ye o kimi kumoe. Nono pive keu ye kuchou ke.”

¹⁹ Totimi huno pa vilo pi, “Akijeu, I no kümsüju kelo no ye tungkupue.

²⁰ Ni puasüqo ye naghuto hipau lono Alhou mllache, ikemu nongu no Jerusalem lono mlla kepue picheni.”

²¹ Jisü no li vilo pi, “Totimio, I pülülo, naghuto hipau loke kumono Jerusalem lono mu nongu no Apu mlla moveni keu tüqhüdo cheni.

²² Nongu no kiu mlla cheni keno nongu ye mthae, ikemu ningu ye nino mlla chekeu ithi ani, kughengu xakulupu ye Jewmi launo ke.

²³ Ikemu kuchou kümllami no aghungu eno kuchou lono Apu mllani keu tüqhüdo cheni, eno ti ye itehi ke, kughengu Apu ye hitoi Pa mllani kemi phucheni.

²⁴ Alhou ye Aghungu, eno khunono Pa mllani keno aghungu eno kuchou lono mlla masae.”

²⁵ Totimi huno Jisü vilo pi, “Messiah (khuu Khristo ipi cheni keno) ighi nani kepi I no ithi ani. Kughou pa no ighini keno pa no thokha ni vilo pi nani.”

²⁶ Jisü no li vilo pi, “Ni o pütsa akeu huno Pa ke.”

²⁷ Tishiake lono akhopemi no ideighive. Pa no atotiu pütsa akeu ithulu no panongu ye akichiqhive, ikemu khunomu, “No ye kiu phu cheni kea?” momu “No ye kushiye li pütsa ani kea?” ipimoe.

²⁸ Atotiu huno azühu qhive no aphughi lo wu püzü timiqo vilo pi,

²⁹ “Milakhi khuu no I no shipüakeu qhoi pivetsü keno ighi no julo. Hi no Messiah keo lae?”

³⁰ Panongu no aphughi lono ipeve no Jisü lau cheghi.

³¹ Ikelo akhopemi no ishi pa qhüiniju ae, “Chulo, Rabbi.”

³² Ikemu pa no panoqo vilo pi, “I no chuniye akeu chuqupu nongu ye kiumu ithiamoe.”

³³ Ikehu akhopemi ye lakhino lakhi vilo iniju, “Khuana no achuqupu süwo pa tsüve keo lae?”

³⁴ Jisü no panoqo vilo pi, “I chuqupu ye khuu no I puwu keno Pa pulou shini keu eno Pa kümla shiqhive tsüni keue.

³⁵ Nongu no aholetsa, ‘Aqhi bidi aghi no ghile hunani’ ipi chenike kumo? I no nongu vilo piani, nongu nhethi tsükhope julo, aluza ye ayegha ipeghive no ghile huthuvae.

³⁶ Ghile kuhuu ye ajume ithulu ayae eno lhokta küxü ghenguno athi pekütsü ani, tishianguno apiti kiveu ngo ghile kuhuu pamagha alovi küqha niye ke.

³⁷ Kughengu ishi pi chekeu ye kuchou ke, ‘Milakhi no xusü cheni eno lakhiu no ghile hucheni.’

³⁸ Nongu no mlasümo keu lulo ghilehu peniye I no nongu puwue. Kütami no aghime kümla shi, eno nongu no pano ghime lono ala shilu ani.”

³⁹ Atotiu no, “I no shi chekeu qhoi pa no I vilo pitsüe” ipi ashepe shikeu lono aphughi tipau lo Samariami kutomo no pa pülüve.

⁴⁰ Ikehu kughou Samariami no pa lau ighi keno, panongu no Jisü vilo pano gholo ngo lopi qhüiniju, eno Jisü ye tilau atsala kini ngove.

⁴¹ Pa tsa vecheo kutomo no pülülue.

⁴² Panongu no atotiu vilo pi, “Nono pike ghengu likhino ningu ye pülü anike kumovae, kughengu ningu ampi no pa no pikeu chiluvae, eno kuchou no Pa ye ayeghilomi Xakuluu kepi nino ithivae.”

⁴³ Ghulo kini thiu Jisü ye Galilee lo wuve.

⁴⁴ (Kughengu Jisü ampi no tungkupmi ye pa punugha loye agigihu kühae pi ashepe shi püake.)

⁴⁵ Kughou pa no Galilee lo ighi keno, Galileemi no akivishi pa sasü, kughengu panongu ghi Jerusalem lo Aghulhu lo wuno tipa ghuloki lo pa no kiu shikeno thokha ithulu püake.

Hiyampemi Nu Shipivi

⁴⁶ Jisü no Galilee cheaxü Cana, khile azü pesü atsaizü kughulhotsü keno tile ighi. Ikelo Capernaum lo hiyampemi lakhi nu sü ae.

⁴⁷ Timi hipau no Jisü ye Judea lono Galilee lo ighi anipi chilu kelo pa no wuno Jisü vilo ighi no pa nu shipivi tsülopi qhüiniju, kughengu pa ye akithi kumlhoshi ake.

⁴⁸ Jisü no pa vilo pi, “Nongu no amchipu eno akümzapu ithumla ke kutolo nongu ye pülümo nanie.”

⁴⁹ Pa no khochile, “Akijeu, I nu thimphi lono ighi tsülo.”

⁵⁰ Jisü no pa vilo pi, “Wolo, o nu ye xü nani.” Timi huno Jisü no pa vilo pikeu tsa pülüve no wuve.

⁵¹ Pa no alalo chephi lono pa qemiqo no pa nu ye vi ayae pi pa vilo pi ighi.

⁵² Ikehu pa nu ye kiu ghuloki lono aküsü lono alouve keno pa no iniju eno panongu no, “Ighina ayi lakhi kihe lono aghakimki ye pa qhivae” ipi khochile.

⁵³ Apu no ithikeu no ti ye Jisü no pa vilo, “O nu ye xü nani” ipikeu ghuloki shiae. Pa eno pa kibolomi kümtsü no pülüluve.

⁵⁴ Jisü no Judea lono Galilee lo ighi kethiu amchipu kümla hi no akiniue.