John 3 - Sumi Naga CL (Re-edited) Bible (BSI)

No ye Punu Kithe masae

¹ Phariseemi gholo Nicodemus ipikeu ache, pa ye Jewmi yepemi lakhi.

² Pa no putho lono Jisü lau ighi no pi, “Rabbi, nino ithi anike no ye Alhou launo ighikeu shikükami, kughengu Alhou aghimo keloye khunomu nono amchipu kümla shi akeqo shimlae.”

³ Jisü no pa khochile, “Kuchou no I no o vilo piani, timi lakhi no punu kithemo keloye Alhou yekipe ithumlae.”

⁴ Nicodemus no pi, “Kishino kichimi shive no punu kithe luni kea? Pa ye paza polo akiniu ilo no punu kithe luni keshea?”

⁵ Jisü no khochile, “Kuchou no I no o vilo piani, milakhi no azü eno Aghungu lono punu kithemo keloye Alhou yekipe lo ilomlae.

⁶ Ashi lono kiu punu keno ti ye ashi, eno Aghungu lono kiu punu keno tino aghungue.

⁷ I no o vilo ‘Nongu ye punu kithe masae’ pi kelo mzaqhiyi kevilo.

⁸ Amülhü no khila mülhü wunishi keno tila wucheni eno nono tipau sütsa chilu cheni, ikemu ti ye khilano ighi momu khila wucheni keno no ye mthae. Aghungu lono punuve kemi ye titoike.”

⁹ Nicodemus no pi, “Hi ye kishino shilu nani kea?”

¹⁰ Jisü no khochile, “No ye Israelmi shikükau keghi hipaqo vethalumo keshea?

¹¹ Kuchou no I no o vilo piani, nino keu ithi keno picheni, eno kiu ithulu keno thopi shicheni, ikemu nongu no ni shepe ikhilumoe.

¹² I no ayeghi lo vehu pike thotsü nongu no pülümo aye, kungugha vehu pi kelo nongu ye kishino pülüni kea?

¹³ Kungugha lono milakhi iqighi keu, Timi Nu thono khunomu kungugha lo ikuju mphie.

¹⁴ Moses no asayeqha lo alazayi pighi ikhiqhe keshi Timi Nu ghi ikhiqhe masae,

¹⁵ tishianguno khunono Pa pülü keno lhokta küxü ithulu nani.

Alhou no Ayeghiqha Kimiye

¹⁶ “Kughengu Alhou no ayeghi lomi kimiye kütüke ghenguno Paw thili Nu pesü tsüve, tighenguno khunono Pa pülü keno pühave monani, ikemu lhokta küxü ithulu nani.

¹⁷ Kughengu Alhou ye ayeghi lomi shou küghathabeni ye Pa Nu puwuke kumoe, ikemu Pa vecheo ayeghi lomi xalu niye ke.

¹⁸ Khukhumu Pa pülü keu ye küghathabe movae; ikemu Pa pülümo kemi ye küghatha bevae, kughengu Pa no Alhou Nu lakhi likhi akeu pülübe moke.

¹⁹ Küghakütha ye hike: ayeghiqha lo aküvü ighivae, ikemu timiqo no aküvü kimiye ke kumono aküzüu kimiyeve, kughengu pano kümla no küsakügha ke.

²⁰ Alhoksa kümla shi chekemi kümtsü no aküvü mithi cheni eno pano kümla ithuluve nosa kehu aküvü lo ipeghi chemoe.

²¹ Ikemu khukhumu kuchou shi chekemi no aküvü lo ighi cheni, tishianguno pa kümla ye Alhou pulou lono mla püanie pi mtsümishei ithulu cheni.

Jisü ngo Baptiz kishiu John

²² Hipa thiu Jisü ngo pa khopemi ye Judea ghakhu lo wuve, eno pa ye tilau panongu sasü ngove no baptiz shiae.

²³ John ghi Salim phivilo Aenon lono baptiz shiae, kughengu tilauno azü boghi shia eno timiqo no ighi no baptiz shilu ae

²⁴ (hi ye John pesü akughu shimphi lono ke).

²⁵ Ikelo John khopemi khami ngo Jewmi lakhi dolo qhukimthe keu chineye vehu ghenguno kütsala ipeghive.

²⁶ Panongu no John lau wuno pi, “Rabbi, Jordan kukuu milakhi o gholo akeu, khuu vehu nono thopi shi keno—julo, pa ye baptiz shitsü ani eno kümtsü no pa lau wuve ani.”

²⁷ John no khochile, “Kungugha lono tsümo kelo milakhi ye thime lakhimu ithumla nani.

²⁸ I no, ‘Ni ye Khristo kumoe, ikemu pa züuno I puwue’ ipikeu nongu ampi no thopi shipüani.

²⁹ Khuu no külaliu sa ani keno, pa no külapuu ke; külapuu küsau khuu puthugho no atsa ini cheni keno, pa no külapuu sütsa chilu no shishe alovi cheni. Tihutoi itehi I lokivi hipau ye kupu luvae.

³⁰ Pa no chuqumghai ikuve masa eno I no chuni iqive masae.”

³¹ Kunguu no ighikeu no kümtsü nguno akiqheu. Ayeghi lomi no ayeghi laumi eno ayeghi lo gholau no picheni. Kungugha lono ighikeu no kümtsü nguno akiqheu.

³² Pa no kiu ithulu eno chilu keno tipau thopi shi, ikemu khunomu pa shepe ikhilu tsümoe.

³³ Khunono pa tsape ikhilu keno Alhou ye kuchou kepi mtsüqhei ithivae.

³⁴ Alhou no khuu puwu keno pa no Alhou tsa pesü pike, kughengu Alhou no Pa Ghungu kupukuno shi pa tsüe.

³⁵ Apu no Anu kimiye eno thokha kümtsü pesü pa u lo süvetsü.

³⁶ Khunono Anu pülüni keno lhokta küxü ani; khunono Anu gholu moni keno aküxü ithumla nani, ikemu pa shou Alhou loghu anani.