John 21 - Sumi Naga CL (Re-edited) Bible (BSI)

Akhopemi Tsüni lau Ipeghi

¹ Hipa thiu Jisü no itaghi Tiberias Züghi lono pa khopemi lau ipeghi. Pa no hitoi panongu lau pephe piye.

² Simon Peter, Thomas (Didymus ipi chekeu), Galilee Cana lomi Nathanael, Zebedee nu pama, eno akhopemi kütami kini ishi kümtsa ngoae.

³ Simon Peter no panongu vilo pi, “Ni ye akha khawuni cheni.” Panongu no pa vilo pi, “Ningu ghi o gholo wuni.” Panongu no wuno ashuka lo ikuve ikemu tipaji puthotsü panongu ye kiumu khamlae.

⁴ Tsütho ipeche kelo Jisü no amkü lo puthugho aghi, ikemu akhopemi ye Jisü kepi ithimoe.

⁵ Jisü no panoqo vilo pi, “Anuliqo, nongu ye akha anima?” Panongu no “Moe” ipi khochile,

⁶ Pa no panoqo vilo pi, “Ashuka ajeu küdau nongu khame vesülo, tishiaye nongu no hami khalu nani.” Panongu no akhame vesü kelaye akha kütsasa velu kehu akhame sünhephe mlave.

⁷ Ikehu Jisü no kimiye chekeu akhopeu no Peter vilo pi, “Hi ye Ampeue!” Kughou Simon Peter no ti ye Ampeu kepi chilu keno pa no pa kuuphi uluve, kughengu pa ye akümla ghenguno xave no ake, eno azü lo ilhe ilove.

⁸ Akhopemi kütamiqo no akhame lono akha chhitoi sünhesü ashuka lono ighi, kughengu panongu ye amkü lono kushuo lo kumono aunhekipshe 300 tohilo ake.

⁹ Kughou panongu no amkü lo ipeghi keno, amiyi no ami shikeu shou akha pügha püaghi eno asho ishi panongu no ithulu.

¹⁰ Jisü no panoqo vilo pi, “Nongu no itehi kha süghi akeu hami saghilo.”

¹¹ Simon Peter no ashuka lo ilo no akhame amkü lo sünhephe, akha kijeje likhino 153 aghi. Tijeje keghi akhame ye ixüvemoe.

¹² Jisü no panoqo vilo pi, “Ighi no amzüvekütha chulo.” Akhopemi gholo khunomu pa vilo, “No ye khuu kea?” ipi ighiju moe, kughengu pa ye Ampeu kepi panongu no ithive.

¹³ Jisü no ighi no asho ikhipe panoqo tsü eno titoi akha ghi pesü tsüe.

¹⁴ Akithi lono xüputhuve kethiu Jisü no akhopemi lau ipeghi keu hi no ghuthu aküthüue.

Jisü ngo Peter

¹⁵ Panongu no amzü vethave kethiu, Jisü no Simon Peter vilo pi, “John nu Simon, no ye hipaqo kümtsü nguno alau I qhuivü anima?” “Iyei, Ampeu, I no o kimiye keu nono ithi ani,” ipi pa no khochile. Jisü no pa vilo pi, “I mbetiqo lojilo.”

¹⁶ Pa no ghuthu akiniu Peter vilo pi, “John nu Simon, no ye I qhuivü anima?” “Iyei, Ampeu, I no o kimiye keu nono ithi ani,” ipi pa no khochile. Jisü no pa vilo pi, “I mbeqo tucholo.”

¹⁷ Jisü no ghuthu aküthüu pa vilo pi. “John nu Simon, no ye I kimiye anima?” Peter ye amlo shimove kughengu Jisü no pa vilo ghuthu aküthüu “No ye I kimiye anima?” ipi ighiju ke. Pa no Jisü vilo pi. “Ampeu, nono thokha ithi ani, eno I no o kimiye akeu nono ithi anie.” Jisü no pa vilo pi, “I mbeqo jukuto lo.

¹⁸ Kuchou no I no o vilo piani, kughou nono apumi shiche keno, o kutoshino aphimini pepusü khile khilemu nono pulo keu lo wuche, ikemu kughou nono kichimi shiveni keno, nono o u xachho no kütami no aphi o puu nani, eno nono khile pulomo keno tilau o sawu nani.”

¹⁹ (Pa no hipau pikeu ye Peter ye kiu gholau no Alhou juküvüpu kithi shinani keno pitsüe.) Ti pive kethiu, Jisü no pa vilo pi, “I papelo.”

Jisü ngo Pa Qhuu Akhopeu

²⁰ Peter no ighowo Jisü no kimiye chekeu akhopeu no pama pape cheghi keu ithulu, akhopeu huye aghulhu lo Jisü mungupe ngono, “Ampeu, khuu no o thechu niye ani kea?” ipi ighiju keu ke.

²¹ Kughou Peter no pa ithulu keno, pa no Jisü vilo pi, “Ampeu, timi hipau ye kishi nani kea?”

²² Jisü no pa khochile, “I no ighi moke kutolo pa pelo aghipe namu no ye kiu pikepu ani kea? No ye I papelo!”

²³ Ikehu akhopeu hipau ye thini chemoe pikeu tsa no athiküzümi gholo veküpha wove; Jisü ye, pa ye thimo nani kepi pa vilo pimoe, ikemu, “I no ighi moke kutolo pa pelo aghipe namu no ye kiu pikepu ani kea?” ipike.

²⁴ Akhopeu hipau no hi kümtsü thopi shiani, eno hi kümtsü yepe qhitsüe, eno pa shepe ye kuchou kepi ningu no ithi ani.

²⁵ Jisü no shikeu kütau ghi kutomo aphie. Ti kümtsü yepe qhini kelo, I no kümsüju kelo ayeghiqha kupuju mu ti yekeu kakuqo qhikhamla nani.