John 18 - Sumi Naga CL (Re-edited) Bible (BSI)

Jisü Thechu eno Küghaluve

¹ Jisü no atsa hipaqo pive kethiu pa ye akhopemi sasü ipeve no Kidron ghokiti kathasü aghutu lakhi akeu lo akhopemi sasü ilove.

² Judas khuu Jisü thechuve keno, pa ghi tipa-a ithi ae, kughengu Jisü no pa khopemi sasü ghuthu kutomo tileno kusho cheke.

³ Ikehu Judas no achinetomi ngo Phariseemi launo ghüshimi amqo lakhi eno kijemi khami sasü amizükulu ngo akuluqhe eno azüta angu pesü tile wu.

⁴ Jisü ye pa shou kiu shinani keno thokha ithi akehu pa no azüu ipeghi no panoqo vilo pi, “Nongu ye khuu phucheni kea?”

⁵ Panongu no khochile, “Nazarethmi Jisü.” Jisü no panoqo vilo pi, “Ni ye pake.” Pa thechuve keu Judas ye panoqo sasü kümtsa puthugho ae.

⁶ Kughou Jisü no panoqo vilo, “Ni ye pake” ipi keno, panongu ye athiu idewove eno ayeghi lo iluqive.

⁷ Ikehu Jisü no panoqo vilo itaghi iniju, “Nongu ye khuu phucheni kea?” Panongu no pi, “Nazarethmi Jisü.”

⁸ Jisü no khochile, “Ni ye pa kepi I no nongu vilo pivae. Ikehu nongu no I phucheni aye, timi hipaqo pelo wuve pelo.”

⁹ Hi ye pa no pi püakeu tsa shikupu niye ke: “Nono I tsü keqo gholo ni ye lakhimu pühamoe.”

¹⁰ Tile Simon Peter, khuu azütakikihi peche keno, pa ti süjope achinetou qeu kini ajeu küsave tsü. (Aqeu je ye Malchus.)

¹¹ Jisü no Peter vilo pi, “O azütakikihi pesü asükhi lo süvelo. Ni ye Apu no I pelo shope niye tsükeu jukhu shomoni keshea?”

Annas ngo Caiaphas Zülo

¹² Jewmi ghüshimi eno panongu shou kepten ngo kijemi no Jisü küghape tshüluve.

¹³ Panongu no atüghüshi pa sasü Anna lau wu, kughengu pa no achinetou Caiaphas pangu kishiu ke.

¹⁴ Caiaphas no Jewmi mije no, milakhi no timiqo ghenguno thive keu pavi kepi pike.

Peter no Jisü Milive

¹⁵ Simon Peter ngo akhopeu lakhiu pama no Jisü papeche. Akhopeu tipau ye achinetou sasü kilethi akehu Jisü gholono achinetou küghaki lo ilove,

¹⁶ ikemu Peter ye khalau ahukikha lo puthugho ae. Akhopeu khuu achinetou sasü kilethi akeno pa no khalau ipe ahukikha khe akeu aqeliu pütsa no Peter sasü alou iloghive.

¹⁷ Ahukikha lo akeu aqeliu no Peter vilo pi, “No ghi timi hipau khopemi lakhike kumo?” Pa no khochile, “Ni ye kumoe.”

¹⁸ Süthi akehu aqemi ngo kijemiqo no amiyi pesü ami shino puthughope ti pügha ae. Peter ghi panoqo gholo ngono pa phi pülü ae.

Achinetou no Jisü vilo Iniju

¹⁹ Tishino achinetou no Jisü vilo pa khopemi ngo paw shiküka vehu ighiju.

²⁰ Jisü no khochile, “Ni ye ayeghiqha zülono piche. Ni ye sinagog ngo achineki khile Jewmi kümtsü no kumqo cheni keno, tile kütsüche; ni ye küsüuno kiumu pi püamoe.

²¹ No ye kushiye I vilo ighiju ani kea? Khunoqo no I tsa chilu püani, eno I no panoqo vilo kiu pi keno ighiju lo, kughengu I no kiu pi keno panongu no ithi ani.”

²² Kughou Jisü no hi pi keno, tile puthugho akemi kijemi lakhi no pa u pesü Jisü gha püzü pi, “No ye hipa gholau no achinetou khochile nani keshea?”

²³ Jisü no pa khochile, “I no pikeu no akumou shiaghi aye, kiu no akumou keno hileno thopi shilo; ikemu I no pikeu no achipi shiaghi aye, no ye kushiye I he ani kea?”

²⁴ Tishino Annas no pa tshüpe achinetou Caiaphas lau puwuve.

Peter no Itaghi Jisü Milive

²⁵ Simon Peter ye puthugho no ami pügha ae. Panongu no pa vilo pi, “No ghi pa khopemi gholo lakhi kekumo keshea?” Pa no ti milive no pi, “Ni ye kumoe.”

²⁶ Achinetou qemi gholo lakhi, Peter no akini küsave tsükeu no bolomi no itaghi iniju, “Aghutu lo no ye pa gholo akeu I no ithulu püanike kumo?”

²⁷ Peter no itaghi milive, eno tipamtsa awudu no ighave.

Pilate zülo Jisü Sawu

²⁸ Tishino panongu no Caiaphas ki lono Jisü sasü Anghw oking lo wuve. Ti ye inaqhe noke. Panongu ampi ye sholokuu ilomoe kughengu panongu ye kitiqemo no Hechekulu Ghulhu chuniye ke.

²⁹ Ikehu Pilate no khalau ipeghi no pi, “Timi hipau shou kiu nguku kepu süghi ani kea?”

³⁰ Panongu no khochile, “Timi hipau no alhoksa shiaghimo aye, ningu ye o lau pephetsü moni cheke.”

³¹ Pilate no panoqo vilo pi, “Nonguu pa sawuve no nongu yezah kiqi lono pa shou küghathave lo.” Jewmi no khochile, “Ningu ye timi khumu pithive kepu yezah kühae.”

³² Hi ye Jisü no pa ye kiu ghola lono thive nani keno pi püakeu shikupu niye ke.

³³ Ikehu Pilate no oking lo ideilove no Jisü kupüzü pi, “No ye Jewmi Kükau keshea?”

³⁴ Jisü no khochile, “Hi ye o lolono ipeghi no iniju ani keo, kütami no I ghili pesü o vilo pi kea?”

³⁵ Pilate no khochile, “Ni ye Jewmi keshea? No likhi no shiye eno achinetomi no o pesü I u lo süve tsüae. No ye kiu shive kea?”

³⁶ Jisü no pi, “I yekipe ye hipa yeghi lo yekipe kumoe. I yekipe no hipa yeghi lo yekipe keaye, I küghape Jewmi u lo sümoni ye I khopemi no aghüshi aghini cheke. Ikemu I yekipe ye hipa yeghi lo yekipe kumoe.”

³⁷ Tile Pilate no pa vilo pi, “Tishiaye no ye akükau keshea?” Jisü no khochile, “Ni ye akükau kepi nono piani. Hi ghenguno I punue eno hi ghenguno ni ye ayeghi lo ighie— ti ye kuchou lau thopi shiniye ke. Khunono kuchou laumi keno I sütsa ini cheni.”

³⁸ Pilate no pa vilo pi, “Kiu no kuchou kea?” Pilate no hi pive no khalau Jewmi lau ideipe panoqo vilo pi, “Ni ye pa shou akipimi phulu amoe.

³⁹ Ikemu nongu khuaye lono Hechekulu Ghulhu lo I no akughumi lakhi nongu lau kuqhophe masa keu acheni. Ikehu nongu ye I pelo Jewmi Kükau nongu kuqhophe penishi anima?”

⁴⁰ Panongu no itaghi ighamku pi, “Timi hipau kumono Barabbas!” Barabbas ye süxakulumi ke.