John 17 - Sumi Naga CL (Re-edited) Bible (BSI)

Akhopemi ghenguno Inikhu

¹ Jisü no hipaqo pive kethiu pa gi peqhepe kungugha lo juno pi, “Apu, atüqhüdo ye ighivae, O Nu pelo O juküvüpu shilu penike O Nu juküvüpu shitsülo.

² Kughengu Nono khunoqo pesü pa tsü keno tipaqo lau lhokta küxü tsü peniye timi kümtsü shou no aküka pa tsüvae.

³ Lhokta küxü ye hike: panongu no kuchou Lhou O likhi akeu ithi, eno Nono puwukeu Jisü ithikeu noke.

⁴ Nono I pelo mla peniye pichebe keu kümtsü shikhave no I no ayeghi lo O juküvüpu shive tsüae.

⁵ Apuo, ayeghiqha lhophe mphilo I no O gholo akelo ajuküvü achekeu pesü itehi O nhethe lono I juküvüpu shitsülo.

⁶ “Ayeghiqha lono Nono khunoqo ikhiphepe I tsü keno tipaqo lau I no O je pephe piyevae. Panongu ye Ow, Nono panongu pesü I tsü, eno panongu ye O tsa peluvae.

⁷ Itehi panongu ye Nono I tsükeu kümtsü O launo ighie pi ithivae.

⁸ Kughengu Nono atsa I tsükeqo pesü I no panoqo tsüvae, eno panongu ye tipaqo ikhiluve no kuchou no ni ye O launo ighi kepi ithivae; eno Nono I puwu kepi panongu no pülü luvae.

⁹ Ni ye panoqo ghenguno inikhu ani. Ni ye ayeghiqha ghenguno inikhu amoe ikemu Nono I tsüve kemi ghenguno inikhu ani, kughengu panongu ye Ow ake.

¹⁰ Iw kümtsü Ow, eno Ow kümtsü Iw ke, panoqo vecheo I juküvü shivae.

¹¹ Ni ye ayeghi lo ngomae, eno O lau cheae, ikemu panongu ye ayeghi lo aphie. Apu Akimtheu, O je lono Nono I tsükeqo khe tsülo, tishianguno nikujo no lakhi ketoi panongu ghi lakhi shi penie.

¹² I no panoqo gholo akelo ni ye O je lono Nono I tsükeqo khekuto cheke. I no panoqo süsho che, eno Kuchoyesü shikupu niye kütsakungo nu no kumo aye panoqo gholo lakhimu pühamoe.

¹³ Ikemu itehi ni ye O lau chea, eno ayeghi lo akelo I no hipaqo pikeu ye panongu pelo I lokivi panongu lolo kupulu peniye ke.

¹⁴ I no O tsa pesü panoqo tsüe, eno ayeghilomi no panoqo mithi, kughengu I no ayeghi laumi kumo ketoi panongu ye ayeghi laumi kumoe.

¹⁵ Ni ye O vilo ayeghiqha lono panoqo ikhiphe luve tsülo piamoe, ikemu alhoksau launo Nono panoqo khe tsülo piani.

¹⁶ I no ayeghi laumi kumo ketoi panongu ye ayeghi laumi kumoe.

¹⁷ Kuchou pesü panoqo qhukimthe tsülo, O tsa ye kuchou ke.

¹⁸ Nono ayeghiqha lo I puwu ketoi, ni ghi ayeghiqha lo panoqo puwuvae.

¹⁹ Eno panoqo ghenguno I no ni ampi kishekimthe ani, tishianguno panongu ghi kuchou lono pano qhukimthe peniye ke.

²⁰ “Ni ye hipaqo ghengu likhino inikhu anike kumoe, ikemu panongu tsa vecheo I pülüni kemi ghengu ghi inikhu ani,

²¹ tishianguno No, Apu no I lolo eno I no O lolo aketoi panongu kümtsü lakhi shilu peni, eno panongu ghi nikujo gholo apeni, tishianguno Nono I puwu kepi ayeghiqha no pülülu penie.

²² Nono ajuküvü I tsükeu I no panoqo tsüvae, tishianguno nikujo no lakhi ketoi panongu ghi lakhi shipeni,

²³ I no panongu lolo, eno Nono I lolo, tishikeu lono panongu ye kupukülai kubocholu peni, tishianguno ayeghiqha pelo Nono I puwu eno Nono I kimiye ketoi panoqo kimiye cheni kepi ithi penie.

²⁴ Apu, ni ye Nono khunoqo I tsü keno panoqo pelo Nono I tsükeu juküvü ithulu peni kehu I no khile ani keno I gholo apenishi ani, kughengu Nono ayeghiqha boqha ghomphi lono I kimiye ke.

²⁵ O amikucho Papu, ayeghiqha no O mtha namu I no No ithi ani, eno Nono I puwu kepi hipaqo no ithi ani.

²⁶ I no panoqo pelo O je ithive ape eno I no tishi anani, tishianguno Nono I kimiye keu kikimiye no panoqo lolo apeni, eno ni ghi panoqo lolo anani.”