John 15 - Sumi Naga CL (Re-edited) Bible (BSI)

Ni ye Atsaibo Kuchou

¹ “Ni ye atsaibo kuchou eno I Pu ye atsailu kichiu ke.

² I loka khijehi axathi pithi moni keno Pa no micheve cheni eno axathi pithikeu loka kümtsü alau pithi penike Pa no kixiphe cheni.

³ I no nongu vilo pive keu tsa vecheo nongu ye mithe anie.

⁴ I lau kimepe lo, eno I no nongu lau kimepeni. Aloka lakhi no atsaibo lo kimepe mokelo pa kutoshi ye axathi pithimla ketoi nongu no I lau kimepe moke loye athi pithimlae.

⁵ Ni ye atsaibo; eno nongu no alokaqo ke. Khunono I lau ani eno I no khuno lau ani keno, pa no axathi kutomo pithi cheni, kughengu I sümo keloye nongu ye kiumu shimlae.

⁶ Khunono I lau kimepe moni keno aloka lakhi toi ikhipe peve cheni eno thizümüive cheni; aloka tipaqo ye xukumqope ami lo vesü no pitive cheni.

⁷ Nongu no I gholo kimepe eno I tsa no nongu lolo aye, nongu no kiu pulo keno khulo, eno nongu ghenguno tipau shitsü nani.

⁸ Nongu no axathi kutomo pithi keu lono I khopemi kepi pephe piyekeu no I Pu jekipipu shitsü cheni.

⁹ Apu no I kimiye ketoi, ni ghi nongu kimiye cheni. Iw kikimiye lo kimepe alo.

¹⁰ I no I Pu zakütsü papelu no Paw kikimiye lo kimepe ache ketoi, nongu no I zakütsü papelu aye Iw kikimiye lo anani.

¹¹ I no nongu vilo hipaqo piakeu ye I lokivi nongu lolo apeniye, eno nongu lokivi chhitoilu peniye ke.

¹² “I zakütsü ye hike, I no nongu kimiye ketoi nongu lakhino lakhi kimiye kilelo.

¹³ Timi lakhi no pa küsami ghenguno aküxü tsüve keu nguno kikimiye akijeu kütau kühae.

¹⁴ I no kiu azah tsü keno nongu no pape aye, nongu ye I küsami ke.

¹⁵ Itehi ni ye nongu pesü aqemi ipi moae, kughengu aqemi ye pa mpeu no kiu shicheni keno mthae; ikemu I no nongu pesü aküsami shivae, kughengu I Pu launo chilu keu kümtsü I no nongu vilo pivae.

¹⁶ Nongu no I kisheluke kumoe, ikemu I no nongu kishelu eno nongu pelo wuno ighive moni keu xathi kutomo pithi peniye süsüe, tishianguno nongu no I je lono Apu vilo kiu kiumu khu aye Pa no nongu tsünani.

¹⁷ Nongu pelo kimiye kile penike I no azah hipaqo nongu tsü ani.

Ayeghilomi no Mithi

¹⁸ “Ayeghiqha no nongu mithi aye nongu mithi mphi züuno I paghi mithi kepi ithilo.

¹⁹ Nongu no ayeghiqha laumi keaye, ayeghiqha no pano laumi toi nongu kimiyeni cheke; ikemu ayeghiqha launo I no nongu kisheluve ke ghenguno ayeghiqha no nongu mithi ani.

²⁰ I no nongu vilo pikeu tsa kümsü lulo: ‘Aqemi ye pa mpeu nguno akijeu kumoe.’ Panongu no I pishipuju aye, nongu ghi pishipuju nani. Panongu no I tsa pelu aye, nongu tsa ghi pelu nani.

²¹ Ikemu nongu no I laumi kehu panongu no nongu shou hi kümtsü shinani, kughengu panongu ye khuu I puwu keno Pa mthake.

²² I no ighimo no panoqo vilo pimo keaye, panongu ye axine shikeu lo küqü moni cheke, ikemu itehi ye panongu xine ghenguno ajeku kiumu kühavae.

²³ Khunono I mithi keno, I Pu ghi mithi cheni.

²⁴ Khunomu shichemo keu kümla I no panongu gholo shimo keaye panongu ye axine shikeu küküqü kühani cheke, ikemu itehi ye panongu no ithuluve akehu, ni eno I Pu nikujo mithi ani.

²⁵ Ikemu panongu Yezah lo yepüakeu tsa ye shikupu masae: ‘Jekujeli kühamu panongu no I mithike.’

²⁶ “Ikemu kughou I no Apu launo puwu keu Akukuphuu ighini keno, Kuchou Ghungu, Apu launo ipeghi keu, huno I shepe shitsü nani.

²⁷ Eno nongu ghi thopi shitsü nani, kughengu nongu ye abothu lono I gholo acheae.”