John 11 - Sumi Naga CL (Re-edited) Bible (BSI)

Lazarus Kithi

¹ Timi lakhi Lazarus ipikeu ye süae, pa ye Bethany noghami, ti ye Mary ngo li tsünipu Martha pama phuke.

² Mary hipau ye tsüngqüikeu thazü pesü Jisü nu püzü li sa pesü pa pukhu isütsü keu, eno sü akeu Lazarus ye li peuke.

³ Ikehu pama atsünipu no Jisü lau pi puwu, “Ampeu, nono kimiye chekeu ye sü anie.”

⁴ Ikemu ti chilu kelo Jisü no pi, “Aküsü hi ye akithipu kumoe. Hi ye Alhou jekipipu ghenguno ke, eno hipau vecheo Alhou Nu jekipipu shiniye ke.”

⁵ Jisü ye Martha eno li tsünipu ngo Lazarus kimiye che.

⁶ Kughou Lazarus ye sü anie pi Jisü no chilu keno, pa no khile akeno tile ghulo kini ngo kitheve.

⁷ Tithiu no pa no akhopemi vilo pi, “Ningu itaghi Judea lo wuni nolo.”

⁸ Akhopemi no pa vilo pi, “Rabbi, Jewmi no atu pesü o veqhi niye shikeu kushuo kumphi püzü no ye itaghi tilau wuni keshea?”

⁹ Jisü no khochile, “Tsüküvü do ayikihedo chighikini acheni ke kumo? Khuana no puchou no cheche aye pa ye küpxalu monani kughengu pa ye hipa yeghi lo küvü ithulu anie.

¹⁰ Ikemu khuu no putho lono checheni keno pa ye küpxalu cheni, kughengu pa lolo aküvü kühake.”

¹¹ Pa no pive kethiu panoqo vilo pi, “Ningu küsau Lazarus ye zühuvae, ikemu ni ye pa küdani ke wuni.”

¹² Akhopemi no pa vilo pi, “Ampeu, pa no züaghi aye ithughive nani.”

¹³ Jisü ye Lazarus kithi pi akemu panongu no kümsü keu no pa ye akulhoqhi zü akeu ghili piani küghashi ae.

¹⁴ Tileno Jisü no shoboi panongu vilo pi, “Lazarus ye thivae,

¹⁵ eno nongu ghenguno I no tilau aghimo keu pavivae, tishianguno nongu no pülülu nani. Itehi ningu pa lau wunie.”

¹⁶ Ikehu Thomas, khuu Didymus ipiche keno pa no aküsami akhopemi vilo pi: “Ningu ghi pa gholono thive kepushi wuni nolo.”

Ni ye Xüchilekuluu eno Aküxüpu

¹⁷ Kughou Jisü no ighi keno, Lazarus ye akümoki lo atsala bidi ngovae pi chilu.

¹⁸ Bethany ye Jerusalem lono kilometer küthüa ke,

¹⁹ eno Jewmi kutomo no Martha ngo Mary pama peu ghenguno pama lokughuno tsüniye ighi ae.

²⁰ Kughou Jisü chenie pi chilu keno Martha ye wuno pa sasü kusho, ikemu Mary ye aki lo iqa ae.

²¹ Martha no Jisü vilo pi, “Ampeu, nono hilau aghike aye I peu ye thimoni cheke.

²² Ikemu itehimu I no ithi anike nono Alhou vilo kiu kiumu khuaye Pa no o tsü nani.”

²³ Jisü no li vilo pi, “O peu ye ithughive nani.”

²⁴ Li no pa vilo pi: “I no ithi anike pa ye ashekha tsala xüchilekulu lo ithughive nani.”

²⁵ Jisü no li vilo pi, “Ni ye Xüchilekulu eno aküxüpu ke, khunono I shou pülübeni keno, pa ye thive namu xüluve nani,

²⁶ eno khunono I gholo xüani eno I shou pülübe ani keno, pa ye khilemu thimo nani. No ye hi pülü anima?”

²⁷ Li no pa vilo pi: “Iyei, Ampeu; no ye Alhou Nu, Khristo, ayeghi lo chekeu kepi I no pülü ani.”

Jisü no Qa

²⁸ Li no hi pive no wuve eno li tsünipu Mary ku püzü lomoshi pi, “Shikükau ighi no o ku ani.”

²⁹ Kughou Mary no ti chilu keno, li no mtazü ithuve no pa lau wu.

³⁰ Jisü ye aphu lo ilomo no khile Martha no pa sasü kusho keno tile ngoae.

³¹ Kughou aki lo Mary lokughuno tsü akeqo Jewmi no li no mtazü ithu khalau ipeve keu ithulu keno, panongu no li ye akumoki lono qaniye wucheni küghashi kümsüve no li papewu.

³² Jisü no khile akeno Mary no tile ighi no pa ithulu kelo li no Jisü pukhu philo itsaqi no pi: “Ampeu, nono hilau aghike aye I peu ye thimoni cheke.”

³³ Kughou li no qa keu eno li gholo Jewmi ighi keqo no qa keu Jisü no ithulu keno, pa ye ighono pa mlo kighishi shive eno kütakihive.

³⁴ Pa no pi, “Nongu ye khile pa qhopüani kea?” Panongu no pi, “Ampeu, ighi no julo.”

³⁵ Jisü no qa.

³⁶ Ikehu Jewmi no pi, “Pa ye kishi Lazarus kimiye chekeno julo!”

³⁷ Ikemu panongu khami no pi, “Khuu anhethi kighicheu nhethi xükhove tsü keno, pa ye timi hipau ghi akithi lono püxü luve kepu shiake kumo keshea?”

Jisü no Lazarus Xüputhu

³⁸ Tishino Jisü ye itaghi pa lo khümüi kitheve no akumoki lo ighi. Ti ye atuki eno atuqu no nha püaghi.

³⁹ Jisü no panoqo vilo pi, “Atuqu ikhivelo!” Akithiu Lazarus pafo Martha no pi, “Ampeu, pa qhokeu atsala bidi shive ake itehi ye münashuive aghi niae.”

⁴⁰ Jisü no li vilo pi, “Nono pülü aye Alhou juküvü ithulu nanie pi ni ye o vilo pike kumo?”

⁴¹ Ikehu panongu no atuqu ikhive. Eno Jisü no kunguu jupuku no pi, “Apu, Nono I tsa chilu tsüke ghenguno I no O shikimthi ani.

⁴² No ye alhokuthu I tsa initsü cheni kepi I no ithi ani, ikemu I no hi pi akeu ye timi hile puthugho akeqo pelo Nono I puwue pi pülülu peniye ke.”

⁴³ Pa no hi pive no asütsa kuloghi lono ighamku pi, “Lazarus, ipeghilo”

⁴⁴ Thive keu timi huno aphi no pa u ngo pa pukhu eno pa gi chijepe khalau ipeghi. Jisü no panoqo vilo pi, “Pa kuqhophe puwuve lo.”

Jisü Pithiveni ke Kuchughu

⁴⁵ Mary papesü ighi kemi Jewmi kutomo no Jisü no kiu shi keno ithulu püzü pa shou pülübe luve.

⁴⁶ Ikemu panoqo gholo khami no Phariseemi lau wuno Jisü no kiu shikeno pive.

⁴⁷ Ikehu Achinetomi ngo Phariseemi hoho no kumqo no pi, “Ningu ye kiu shikepu kea? Kughengu timi hipau no amchipu kümla kutomo shi auvae.

⁴⁸ Ningu no pa pelo hitoi shiauvepe aye, timi kümtsü no pa pülüveni cheni, eno Rommi no ighi no ni kimthe-a eno ni shiye leluve tsüni cheni.”

⁴⁹ Ikemu panoqo gholo Caiaphas, tipa mpe lo achinetou shi akeu no pi, “Nongu ye kiumu ithiamoe.

⁵⁰ Shiye qhoi pühave kepu ye milakhi no timi züqhushi thive keu pavie pi nongu ye vethalu amoe.”

⁵¹ Hi ye pa kutoshino pike kumoe, ikemu tipa mpe lo achinetou shi akehu pa no Jisü ye shiye ghenguno thive nani kepi tungkuptsa pi,

⁵² eno shiye ghengu likhi kumono Alhou nuli apanagha akeqo kumqo sawo lakhi shini keu ghengu ghike.

⁵³ Ikehu tipani no panongu ye Jisü pithiveni ke kuchughu thuve.

⁵⁴ Tighenguno Jisü ye Jewmi gholo pekipheshi iqhoiqi move ikemu chesü asayeqha cheaxü phivilo Ephraim ipikeu phughi lo wuno akhopemi sasü tile ngove.

⁵⁵ Jewmiw Hechekulu kupunuve eno timi kutomo no Aghulhu züuno pano ampi shikimthe niye aphu lono Jerusalem lo iqho.

⁵⁶ Panongu ye Jisü phuche eno achineki lo puthugho ghi lakhino lakhi vilo piae, “Nongu ye kiu kümsü ania? Pa ye mtsüqheino Aghulhu lo ighimo nanio?”

⁵⁷ Achinetomi ngo Phariseemi no Jisü kügha luveni ke ghenguno khukhumu pa no khile ani keno ithi aye panoqo pithi penike azah tsüve.