JOB 9 - Sumi Naga CL (Re-edited) Bible (BSI)

Job: Küghaküthau Kühae

¹ Tileno Job no khochile:

² “Ti ye kuchoue pi I no ithi ani: Ikemu timi ye kishino Alhou zülo achipiu shiluni kea?

³ Khuana no Alhou sasü kütsalani shi aye pa no qhethonhe piqi iniju kelo ghuthu lakhimu khochile mla nani.

⁴ Pa ye alokütsü eno aküka kughushu ke khuu no Pa mjochile no toluve akea?

⁵ Khumu ithi mono Pa no naghuto pekiqeve cheni, Pa mlokighide lono Pa no tipaqo tukideve tsü cheni.

⁶ Pa no ayeghi süküghütha kelo atsükuchoqo no ithauve cheni;

⁷ Pa no khetsünhe azah tsüve aye tino ipeghi move cheni; eno ayepuqo nhape qhive cheni;

⁸ Pa likhino atsütsü xakhope qhi, azü fukukucho shouno alache;

⁹ Pa no ahuu yepu mqo Ayis eno Püghüno süpemi, Ayenokilimi eno apeu yepu mqo kümtsü mlaphe;

¹⁰ Pa no akümzapu kije mlakeu ye phuphe eno kihi khamlae.

¹¹ Julo, Pa no I vechesü wuvemu ni ye Pa ithulu chemoe; Pa no cheghi namu ni ye vethalu chemoe.

¹² Pa no mxape wuve namu khuu no Pa hachilepe, ‘No ye kiu shi ani kea?’ ipi luni kea?

¹³ “Alhou ye Pa mlokighide süchilemo nani; Rahab saphu chekemi no Pa qholo itsaqie.

¹⁴ Tishiaye, ni ye kishino Pa khochile luni, kiu tsa kishepe Pa ghechile luni kea?

¹⁵ I no achipi lo apülaghi Pa khochile mla keke I nguku akeu vilo I kimiyetsü penike qhüiniju masavae.

¹⁶ Tsala I no Pa ku kelo Pa no I khochile püaghi namu, Pa ye I sütsa initsü akepi ni ye pülümo nani.

¹⁷ Kughengu Pa no pasapagha pesü I hepungo eno akiqi kühano pimhi lono I ghüzaku kighishe tsüke;

¹⁸ Atuthukishe do mu I tsümono Pa no kukhukimji pesü I tsüke.

¹⁹ Tsala hi no aküka kukuxu shiaghi aye Pa no Akumtoue! Eno achipiu tsakükügha shiaghi aye khuu no Pa kuluni kea?

²⁰ I no achipi lo anamu I kichi no akipimi I tsüve nani; I no akipimi kühamu Pa no I tuchighiveni aphie.

²¹ Ni ye akipimi küha keghi I kihi movae; I küxü jumithi auvae.

²² Hi ye aphiphi kehu I no pi ani, ‘Alhou no pimimo kemi ngo kixikilami aphiphishi kütsave cheni.’

²³ Kughou küsakusho no züleshi akithi süghini keno, Alhou no pimimo kemi mhekiqi thaigha junu cheni.

²⁴ Ayeghi pesü küsaküghami u lo süvetsü cheni; Pa no küghaküthami nhethi kiyikhave tsücheni, Pa no kumo aye khuu no kea?

²⁵ “I küxü tsala ye akupomi nguno akümthüu shi ani, tipaqo ye akivi ithumla no yewu khavae.

²⁶ Tipaqo ye ayeghübo shuka toi mthüthei pove ani, alhuqu no lhoxü pewu niye yeiqighi ketoie.

²⁷ Tsala I no, ‘Ni ye I kumchho kümsümaveni, amloghime gi qhive no alophaleiveni’ ipi aye,

²⁸ ni ye I ghimekitikhi msauvae, kughengu ni ye akipimi kühae pi nongu ye pimo nani.

²⁹ I küghape pimiveni ake ni ye kushiye adou lono imeni kea?

³⁰ I no mürasü pesü ni ampi qhuve no ayevu no I u mütsüve namu,

³¹ Nono aqo lo I tukulu süve nani, eno I likhi I phimini thotsü I ju kuchhube nanie.

³² Pa no I toi timi kumoye kethono ni ye Pa sasü kitighe luniche, eno nikujo kümtsa küghakütha-a lo ighini cheke.

³³ Alhou nikujo dolo mtakiphiu aghi penishi nolae, nikujo shou aghibiu lono pa küka peitha penishie.

³⁴ I launo Alhou qheküsü ikhipe wuve tsülo, tishikeu lono Pa jupe msa chekeu huno I shithüghüi monani.

³⁵ Tileno I no Pa msa mono atsa pi nani kughengu itehi kutolo ni ye tishilu mphie.