JOB 8 - Sumi Naga CL (Re-edited) Bible (BSI)

Bildad: Job no Xaidelo

¹ Tileno Shuahmi Bildad no khochile:

² “No ye khitohi hipa tsa pi anani, eno o kichi lono abokümsa tsa kuloghi zale anani kea?

³ Alhou ye kuchou xakütha tuchighiveni keshea? Momu Akughushuu ye achipiu tuchighiveni keshea?

⁴ O tianuliqo no Pa shou axine shive aghi aye, Pa no panoqo küghape pano xine lo ikhipheve tsüae.

⁵ Tsala nono Alhou phuju no Akughushuu lau küpüqhiyi tsü penike qhüiniju aye,

⁶ tsala nono tsüghükhüi eno müzüchoi aghi aye, mtsüqheino Pa ye o ghenguno ilhethughi nani eno inahuu o-a lo sachile sawo athoputho tsü nani.

⁷ Eno o küxü bothu no kitila lono ithughi püaghi namu, athiu o tsala chekeu ye ighono kije shinani.

⁸ “Wovekeu tiqheli ghili kimiyeno kighinikile julo, eno apuasüqo no kiu phulu keno kümsükuto julo.

⁹ Ningu ye ighina timi aphi kehu kiumu ithiamoe, kughengu ayeghi lo ni küxü ye yekükhü ke.

¹⁰ Panongu ye o shika eno o vilo pitsümo nani kea? Panow vethakulu kiqi lono atsa pimoni keshea?

¹¹ “Akhiji-a küha keloye asalebo ipeghilu nani kea? Azü küha keloye ayeghübo nibonilei ipeghi luni keshea?

¹² Akhuni shi eno miche thumphi lono azü hauve aye, tipaqo ye kütau sütsüni züuno ighüi thi-ilove cheni.

¹³ Alhou kümsümave kemi laghi ghi tipaphie, Alhou kümthami lajupu ye hauve nani.

¹⁴ Pa mlo kuloghipu ye ayethi toi süthave cheni, pa küpkhü ye thalaxü ta toike.

¹⁵ Pa no pa ki mungupe anamu tino puqhe mlave cheni; ti mtupe anamu ilaqive cheni.

¹⁶ Pa ye khetsünhe küvü lo atsüni no thuwu ake toi, aghutu kuchopu qhawove cheni.

¹⁷ Pa kuhu no atuqo küxa luve no qüilo tipaqo dolo xü acheni.

¹⁸ Ikemu tileno pa kütsave aye, ‘Ni ye khilemu no ithumlae’ ipi tipa-a huno milive cheni.

¹⁹ Hi no küsaküghami laghi kepi ithilo, kütami no pa-a lono lhoipeghive nani.

²⁰ “Julo, Alhou ye tukutiye küha kemi kileve chemoe, momu alhoksa kümlami mu kuphu chemoe.

²¹ Tishimu Alhou no kunuvüqai keu pesü o shepichhi tsü, eno alokivi ghügha pesü o kichi lo sütsüni aphie.

²² Khunono o mithi cheni keno akukujopu pepipe nani, kixikilami phiki ye hauve nanie.