JOB 7 - Sumi Naga CL (Re-edited) Bible (BSI)

Job: Ni ye Lajupu Kühavae

¹ “Ayeghi lo timi küxü ye ghüshimi ghime toi kushokütsüpu, eno pa tsala ye aqekiqemi tsala toike kumo?

² Aqemi lakhi no avela kicheqho khelho aketoi, aqekiqemi no ajume laju aketoi,

³ aqhi atsütsü I saje ye abokümsae, eno putho mloghuju no I saje shitsüke.

⁴ I no zü akelo ishi picheni, ‘Ni ye kughou no ithuve nani kea?’ Ikemu putho do ye kushuo kehu, ni ye tsütho moke kutolo hula hila tsüghüwo zü cheni.

⁵ I phiashi ye apithe ngo apiyikola no küzü luvae; I yiko no mkamghaive no ani pholeke.

⁶ I tsala ye aghikughomi züngü nguno akümthüu eno lajupu kühano ashehove ani.

⁷ “I küxü ye atuthukishe lakhi kepi kümsülu lo; I nhethi ye khilemu idewo akivi tsala ithulu moae.

⁸ Ni ithulu chekeu nhethi huye ni ithulu moae; nono I juche kelo ni ye cheve aghiniae.

⁹ Khüngküsü no hailove no kühave keshi khuu no Kithigha kutho lo iqiveni keno pa ye ideighi chemoe;

¹⁰ pa ye khilemu pano kilo ideighi chemo, tike kumono paw timiqou ghi pa ithimoae.

¹¹ “Ikehu ni ye I kichi kujukhave moni, I nguagha no iju ake lono I no pini; I küxü kukhukimji lono I no muchhoni.

¹² Ni ye azüghi momu azüghi ghawu kesheno aghukheu pesü I khe anipe kea?

¹³ Kughou I no, ‘I züa no I lokughunotsü nani eno I lakhü no I kumchho küghüqü tsü nani’ ipini keno,

¹⁴ nono asamou no I shikümsa eno züxou no I shithüghüi cheni,

¹⁵ tishianguno asaghi kümsa likhi akepu ye tsüqüqhi pithive keu mu kishelu peniye ke.

¹⁶ Ni ye I küxü jupe angavae; ni ye alholo xüanike kumoe. I qhivelo, kughengu I küxü tsala ye atuthukishe lakhi ke.

¹⁷ Timi ye kiue pi Nono kümsü pivi eno O mlo kümtsü pa shou bepe

¹⁸ ina atsütsü pa xuju no atüqhüdo kümtsü lo pa peju acheni kea?

¹⁹ I launo kughove mono No ye khitohi I juani aphi, imaye I no amiti munoqhilu kepu do likhimu tsümo keshea?

²⁰ Timi hikujuu, I no pimive aye ni ye O lau kiu shilopi kea? Kushiye I küghape Ow vemijipu shi ani kea? Ni ye kishino O ghenguno amakho shive aghi kea?

²¹ No ye kushiye I kutokumo eno I kipimi qhive tsümla kea? Kughengu itehi ni ye ayeghi lo züuve niae, nono I phuche namu ni ye aghi moae.