JOB 6 - Sumi Naga CL (Re-edited) Bible (BSI)

Job: I Kumchho ye Achipi

¹ Tile Job no khochile:

² O I ghakighide pesü huju lu, eno I nguküsa kümtsü pesü ahu lo pepukulu keaye lae!

³ Tishiaye azüghi lo asaye nguno akimshiu shi aghini che; tighenguno I tsapi ye süchile mono mkamghaive ani.

⁴ Kughengu Akughushuu piji no I philo chhesü püani; I ghungu no tipau tüghü ye ani; Alhou no I kichi kümsa kepu pesü ajoshi kutope ani.

⁵ Aghalo khurha ye atsüni akeghi igha cheni keshea? Momu amshitsü pinamu aghijini akeghi igha cheni keshea?

⁶ Amti sümono isaphai keu chuqupu chulu nani kea? Momu awukhu metsüghoi keu lo kiu michelu cheni kea?

⁷ I müzü-tüghü lomu ni ye tipaqo buchemoe, tipaqo ye küsükinimi chuqupu mihike.

⁸ O Alhou ghi I no qhüiniju keu khochiletsü keaye, eno Iw lakuju shikuputsü keaye,

⁹ I chisheqhini keu no Alhou lopushi aghi keaye, Pa u chhopuwo no I sasü ayigheve keaye lae!

¹⁰ Tino I lokughunopu shiniche; I ghime lomu ni ye tamono alokivishi ilheni cheke, kughengu ni ye Akimtheu tsa milive mphie.

¹¹ I kumto kiu anie pi ni ye ishi khe amasa kea? I küxü shekuho lo kiu aghi nanie pi ni ye kutuu amasa kea?

¹² I kumto ye atu kumto keo, I phiashi ye alazayi kea?

¹³ I kumto tumüzü luvetsü kelo I lolo kiu kukuphu mu anima?

¹⁴ “Khunono aküsami küpü keu süchile luveni keno Akughushuu sükümsa phevae.

¹⁵ I thiküzümi ye mütsü tusho ghoki toi pishikiqhimie, tsütsüghu züno qowuve ketoie.

¹⁶ Tipaqo ye mürasü no tsüngtsüi küzüpe acheni, eno avütsa no tile itshü acheni.

¹⁷ Kughou tsüka tsala ighini keno, tipaqo ye azü ilhouve no tipa-a lono hauve cheni.

¹⁸ Lhidimi no kujojo sayeshi sasü izüche kelo ala pühave no yenguyike-a lono thive cheni.

¹⁹ Sheba lhidimi no kujojo Tema zükhe-a laju phucheni.

²⁰ Panongu no amlo kumto shi akehu itehi ye kujovae; tilehi ighi no alomtshüvae.

²¹ Nongu ghi tipaphi shi kiumu I kuphu mlavae; nongu no Iw küsakusho ithulu no msauve ake.

²² Ni ye nongu vilo, ‘Agho I tsülo’ momu ‘Nongu küakini pesü I züqhushi külügho tsüve tsülo’ ipi keshea?

²³ Ikeo, ‘I ghümi u lono I xaphe tsülo’ momu ‘I ghümi u lono I xachilelu tsülo’ ipi keshea?

²⁴ “I shikalo, eno I no inaqhoiveni; I no kishi ala vepimive akeno I pelo vethalu pelo.

²⁵ Amikucho tsa ye kiutoi sakütü kelae! Ikemu nongu tsapi lo shikümzülu kepu kiu ani kea?

²⁶ Lajupu hauve kemi tsa pesü abokümsa shive tsüno I shikithe tsünike kümsü anio?

²⁷ Nongu ye mighimi ghi luveni ye asaqhi cheni kehu, eno shompami jechuve chenie.

²⁸ “Ikemu itehi ye kimiyeqhiyi I lau jupuwo lo, kughengu ni ye nongu gi thepe mikimo nani.

²⁹ I no qhüiniju anike achipikumo shikevi no tsüghü ighilo, kughengu I no akikhishi chekeu ye pühave mlae.

³⁰ I mili lo achipikumo aphi kea? I taha ye itehimu Iw küsakusho michemla aphi keshea?