JOB 5 - Sumi Naga CL (Re-edited) Bible (BSI)

¹ Itehi kujulo, o khochileni kemi khuana aghi nanio? Akimthemi dolo khikhiu lau tsüghü wuni kea?

² Mtsüqheino amloide kalo keu no mbomzümi pithive cheni, eno anhekushu no itikütüpa kemi ghiqhive cheni.

³ Mbomzümi no akuhu qüsü keu I no ithulu ikemu I no paikhavi akibo tipau ghushove.

⁴ Pa nuliqo ye sükusho kühae; khagho lo atsakügha kelo panongu qodave cheni, eno panongu xapheni kemi khumu kühae.

⁵ Akhüavami no pa lulo pekighi chuvetsü cheni, asahuli lo aghimu luve cheni, eno tüghüthi kemi no pa küakini phucheni.

⁶ Kughengu aghime ye ayeghi lono ipeghi chemo, momu aveküsa ye ayeghi lono lhoipeghi chemo,

⁷ ikemu ami no kunguu mpa iku ketoi timi ye aveküsa lo punusü cheni.

⁸ I müzülo ni ye Alhou phu nani, eno I kumchho pesü Alhou lau kulhuqhi tsü nani.

⁹ Pa ye lheilo tomlakeu akümzapu kümla kihikhakümla shicheni:

¹⁰ Pa no ayeghi lo tsüghuqhitsü eno aluza lo azü puwutsü cheni;

¹¹ Pa no akuchunimi pesü akuchuqu lo süqhe cheni, eno akumlomi sükusho tsücheni.

¹² Pa no mqümghami kukughu hexavetsü cheni, ikehu pano no mlaitha keu kiu nomu tolu chemoe.

¹³ Pa no amqükinimi küghape pano lichhe lono meluve cheni, eno chighichilai kemi kukughu ke-i kishekhave tsü cheni.

¹⁴ Panongu ye puchou aphi lono aküzü lo ilove cheni, eno puchomghü lono putho lo toi kükaju cheni.

¹⁵ Ikemu pano kichi lo azütakikihi akeu eno akumtomi u lono Pa no athokhami xaphelu cheni.

¹⁶ Ikehu kumlhomi ye lajupu ani, eno achipikumo no akichi kujukha luve cheni.

¹⁷ Julo, Alhou no khuu sakiyini keno pa kümghapue; ikehu Akughushuu no shikümzü keu milive kevilo.

¹⁸ Kughengu Pa no ghüzave namu itaghi khavetsü cheni, Pa u pesü heqhi cheni, ikemu Pa u no shipivitsü cheni.

¹⁹ Pa no aküküpna tsügho lono o xaphe luve nani; iyei akütsüniu loye alhoksa no o bumo nani.

²⁰ Püqümiye ighi kelo Pa no akithi lono o xachilelu nani, eno aghüshi lo azüta angu kumto lono o xachilelu nani.

²¹ Pighizü mili launo o peküsü luve nani, kütsakungo ighi kelo no ye msavemo nani.

²² Kütsakungo eno püqümiye ighi kelo nono junu nani, no ye ayeghi lo tüghashiqo msa akepu küha nani.

²³ Kughengu o lulo atu akeqo ye o pünaqhimo nani, eno aluza lo tüghashiqo no o sasü külakishi lono anani.

²⁴ Tileno o phiki ye aloinoqhiyi ani kepi nono ithi nani, eno nono o tsüaqu xuju kelo pühamo no aghi nani.

²⁵ Itaghi o ji lo kiyighi no kutomo shini keu nono ithi nani, eno o polo kughuko no ayeghi lo atsaneghu toi qhawo nani.

²⁶ Ghile lo aghi nimzü ketoi no ye ateasü shi o kumo lo ilo nani.

²⁷ Nino phukide juve ake; hi ye kuchou ke inilo, eno o kivipu ghenguno ithilo.