JOB 42 - Sumi Naga CL (Re-edited) Bible (BSI)

Job no Piphe eno Xaide

¹ Job no AMPEU khochile:

² “I no ithi anike No ye thokha kümtsü shilu nani, eno kiu nomu O kimji hakhave mlae.

³ ‘Khuu no akighithi kühamu mijekütsü küsü ani kea?’ ipi Nono pike. I ghenguno ighono akümzapu thimeqo, I no vethamla eno mtha pülaghi pivae.

⁴ ‘I no pinike inilo; I no ighijuni, eno nono I khochileni.’

⁵ I kini lo likhino I no chilu kemu itehi ye I nhethi no No ithuluvae;

⁶ tighenguno I no ni ampi ju aghaide ani eno ayevu amkhu shi xaideghi anie.”

AMPEU no Job Küsami Sakiyi

⁷ AMPEU no atsa hi kümtsü pesü Job vilo pive kethiu, Pa no Temanmi Eliphaz vilo pi, “Ni ye no eno o shou pama lau axuide ani, kughengu nongu no I ghili kiu no achipi keno, I qeu Job toi pitsümoe.

⁸ Tighenguno itehi ye amshitsü ngo ambetsü tsünini pesü I qeu Job lau wuno nongu ghenguno akipti kümllagho shilo. Eno I qeu Job no nongu ghenguno inikhu tsünani, I no pa kighini chiluve tsüno nonguw mbomzü qhemi akipimi tsümoveni. Kughengu nongu ye I qeu Job toi I ghili pitsümoe.”

⁹ Ikehu Temanmi Eliphaz, Shuahmi Bildad, eno Naamahmi Zophar pano küthü no wu püzü AMPEU no kiu pi keno titoi shive, eno AMPEU no Job kighini ikhiluve tsüe.

AMPEU no Küakini Tsüchile

¹⁰ Kughou Job no pa küsami ghenguno inikhutsü keno, AMPEU no pa ngukümgha tsüchileve. AMPEU no püzüu nguno ghuthu kinino vekighishe no Job kümghatsü.

¹¹ Tithiu pa thiküzü chelimi eno püzüu pa ithi chekemi kümtsü no pa lau ighi no pa ki lono kümtsa aghulhu shi. AMPEU no pa shou ado lhoksa pukutsü keu ghenguno panongu no amloksa pa piye no pa lokughuno tsü. Eno panongu lakhi khino pisa ngo ameshoyi nguthi pesü pa tsü.

¹² AMPEU no Job küxü hukuthu lo nguno alau ashekhalau no pa kümghatsü. Ikehu pa ye ambe qhethonhe chighibidi, sayeshi 6,000, amshitsü 1,000, eno khurhaqu 1,000 auve.

¹³ Pa ye anu tsüni eno anga küthü ithulu.

¹⁴ Eno pa no anga anoghiu pesü Jemimah kutsü, akiniu no Keziah, aküthüu no Keren-happuch.

¹⁵ Tipa yeghiqha kümtsü lo Job ngaqo toi aju kivimi khumu kühae. Panongu papu no panoqo ghi apelimi gholono amheghi pesü kijetsü.

¹⁶ Hipa thiu Job ye ampe 140 kutolo xüno tiqheli abidiu kutolo pa nhethi no pa tilimi ithulu.

¹⁷ Eno pa ye ighono kitemi shi xükülaye no thive.