JOB 41 - Sumi Naga CL (Re-edited) Bible (BSI)

¹ “No ye akhakümsüpuyi pesü Leviathan fuphelu, momu akighi pesü pa mili tshüdaqhilu nanio?

² No ye akighi pesü pa nigipe lo sülu momu ayikuho pesü pa mükhü jiphelu nani keshea?

³ Pa ye o qhüiniju ananio? Pa ye mtshaminhei keu tsa pesü o pütsa nani keshea?

⁴ Pa ye alhokupuju o qeu shive nike o sasü puloshoqhi shi nani keshea?

⁵ No ye aghau pemgha keshi pa sasü ili momu o qelimi tsünike pa kuo lo akighi tshülu nani keshea?

⁶ Küqhükilimi ye pa ghenguno alhi kügha nanio? Panongu ye no pano dolono ghekijeve nani keshea?

⁷ No ye angupa kije pesü pa yiko momu pa kütsü lo chesülu nanio?

⁸ O u pesü pa shou bejulo; pa mjokeu kümsü lulo, no ye ti shikithe mo nani!

⁹ Julo, pa theqhive nike laju akeu ye kichileke; timi ye pa ithulu aphi lono alomtshüve cheni.

¹⁰ Khumu ayiküsa shi pa xukutho puthu luni keu kühae. Imaye khuu no pa ye khuue pi I zülo puthugho luni kea?

¹¹ Khuu no kiu I tsüe pi I no pa tsüchile masa kepu ani kea? Kiu kiumu atsütsü qhakuchho qholo aghikeu ye Iw ke.

¹² “Ni ye pa pukhu, pa küka kumto, momu pa hi kivi ghili pesü pimono inaqhoi ngovemo nani.

¹³ Khuu no pa yiko lha luni kea? Khuu no pa yiko ayi mlaküxa toikeu chhexü luni kea?

¹⁴ Khuu no pa gi hukikha khaqhi luni kea? Akümsapu no pa hu homxape anie.

¹⁵ Pa mqa ye azüto pesü ala-ala shi mla püani, eno atupikiye toi kütsape mekha püani.

¹⁶ Ighono kibikhoipe akehu tipaqo dolo amülhü mu ilomlae.

¹⁷ Panongu ye lakhi no lakhi sasü kimeve kehu ishikimeve no kiu nomu tipaqo süjo kütüta shimlae.

¹⁸ Pa no hachhi shikelo aküvü phaphashi ipeghi cheni, pa nhethi ye khetsünhe ipeche kelo huchuyi ketoie.

¹⁹ Pa kichi lono akuluqhe iqü ipeghi no ami kümpa no sasashi yeiku cheni.

²⁰ Azü kumqho li eno tipau shipiti keu mi lono ipeghi akeshi pa nigipe lono amchhi phoipeghi.

²¹ Pa tuthu no amibalu küiqü eno pa kichi lono ami mili ipeghi cheni.

²² Pa kumto ye akuo lo ani, eno shithüghüi keu no pa zülo achenie.

²³ Pa yiko küghülha ghi tsatsai pa philo kimepe acheni kehu lhaqhilu chemoe.

²⁴ Pa mlo ye atuqu toi mkamghai, athi kütsüghü tuqu aqhou mihie.

²⁵ Pa no shohe ithughi kelo akumtomi no msauve no imeve mphi lono pove cheni.

²⁶ Pa shou azütakikihi ghipuku namu kiumu akiqi kühae, tikumo no angu na, apiji na, ayighasü namu avehu kühae.

²⁷ Ayi ye pa no aghijini toi kihi eno alazayi no asüküma paphie.

²⁸ Apiji ye pa hapupove mlae; pa ghenguno hevülatu ye khauteni kimihie.

²⁹ Akulosü pesü aghijini shi kihi cheni; ayighasü sütsa chilu aye pa no junu cheni.

³⁰ Pa puqho ye alitsa kughupo toi tsüghaminhei, akhuwo no aniba xule keshi pa no itiwuke lalo aye hetha cheni.

³¹ Pa no azüghi pesü ali mqhole akeshi xukutho cheni, ayizü pesü atsüni belekeu li toi mlaghubei tsücheni.

³² Pa no itiwuke la michi azü lo mlaghubei ipeghi cheni; ikehu azüghi ye asa mpamiyei kepi kümsü cheni.

³³ Ayeghi lo pa kimihi akümsa kühakeu lhoxü kühae.

³⁴ Akiqheu lhoxü kümtsü pa no jukünatha cheni, tüghashi kümtsü shou akükau ye pa ke.