JOB 40 - Sumi Naga CL (Re-edited) Bible (BSI)

¹ Itaghi AMPEU no Job vilo pi:

² “Akipimi kuphuu ye Akughushuu sasü kigheni aphi kea? Khuu no Alhou sasü kighe ani keno pa no khochilelo.”

Job no Inaqhoi nike Piqhi

³ Tileno Job no AMPEU khochile:

⁴ “Julo, ni ye amekühae; ni ye kiu O khochileni kea? I no I u pesü I kichi kujukhave niae.

⁵ I no ghuthu lakhia pivae, ikemu khochile moae; iyei, tinguno alaumu pivae, ikemu itehi ye pimoae.”

AMPEU no Job Khü

⁶ Tileno AMPEU no miyitsü lono Job khochile:

⁷ “Kiptimi toi kutope ngolo; I no o vilo ighijuni, eno nono I khochileni.

⁸ No ye I küghape akumou lo qhini kea? Nono achipiu shiniye akipimi I tsüni keo?

⁹ No ye Alhou u kumto toikeu ani keo, eno Pa sütsa toi mghachhoi ighalu nani keshea?

¹⁰ “Akükanguagha eno agigihupu pesü no ampi pipeju lo; ajekipi eno jukighilepu pepujulo.

¹¹ O xukighide kümtsü pepheju lo, eno aqheküzami shou jupuku no sünheqhi julo.

¹² Aqheküzami kümtsü shou jupuku no pa sünheqhi julo eno kixikilami no khile aghini keno qoda julo.

¹³ Panongu kümtsü ayeghimkhu lo kümtsa jonhavelo; panoqo tsüghape kithimi yeghi lo qhivelo.

¹⁴ Tishianguno no ye o u ajeu pesü o xaluve nanie pi Ni ghi no ikhiluni.

¹⁵ “Behemoth, khikhi I no o toi pa ghi lho keno, ti julo; pa ye amshitsü toi atsüni mzachu cheni.

¹⁶ Pa yiku lo aküka akeu, eno pa kive lo akumto achekeu julo.

¹⁷ Pa no pa shomhi pesü cedar toi mtotoi shive cheni, pa luko lo aküka ye ghoküna püani.

¹⁸ Pa saghi ye alazayi yihuke, eno pa pukhu ye ayikhumu ke.

¹⁹ “Pa ye Alhou kümla gholo atüghümie; Khuu no pa lho keno Pa likhino pa kuo lo azüta belo!

²⁰ Naghuto khile tüghashiqo no ili cheni keno tipaqo no pa ghenguno achuqupu süghi cheni.

²¹ Azü xamunu qholo, aniba lo, ayeghü kicheqho lo pa no ihozü cheni.

²² Azü xamunubo no pa kushoshi khonhape acheni; eno aghoki mkülo mulosübo no pa sühope acheni.

²³ Aghoki no mqhumza qoighive namu pa ye msa chemoe; Jordan no pa kichi vesü ikughive namu pa ye amlo mto cheni.

²⁴ Khuana no ayikuho pesü pa nhethi lono fuluve, momu nigipe fuluve nanio?