JOB 4 - Sumi Naga CL (Re-edited) Bible (BSI)

Eliphaz: Pimihami no Ikoishe Cheni

¹ Tileno Temanmi Eliphaz no khochile:

² Khuana no atsa pisü küpha kelo no ye kutuulhove nanio? Tishinamu khuu no atsa pimono ngoa kulupu kea?

³ Julo, no ye timi kutomo kütsü shika ighiva eno miqemlei kemi shikumto ighivae.

⁴ Küpxape iluqi cheghi keqo o tsa no xaqhe puthuvae, eno miqemlei kemi khonhe nono shikumtove tsüae.

⁵ Ikemu itehi o sheamzü lo ighi kelo no ye kutuulhove ani; tino o bu kelo no ye thibuivae.

⁶ Nono Alhou sümsa chekeu huno o mlo kuloghipu eno o küxü lo akikhi shikeu no ow lajupu ke kumo?

⁷ Kümsüjulo: pimihami pühave pikeu khileala ithi anio? Momu khileno akümzümi sasü ayigheve kea?

⁸ I no ithuluve ketoi, khunono axine hokide cheni eno aküküpna xusüni keno athoshi xolu chenie.

⁹ Panongu ye Alhou tuthukishe lakhi lono pühave cheni, eno Pa xukighide mülhü no panongu kütsave cheni.

¹⁰ Abongshuu ghügha, ayiküsa bongshuu no ighakeu, abongshuu lhothew ahu kümtsü helavetsü cheni.

¹¹ Abongshuu kumto ghi ashi kühave kelono thive cheni, eno pa tiqo ye apanaghave cheni.

¹² Ghuthu lakhi lo küsüu no atsa lakhi I kini lo mükhano pisü tsü.

¹³ Timi no züchei ake lono asamosa ithughi ketoi,

¹⁴ akümsa no I lolo iloghive, ni ye khokho shive no I phimpi kümtsü süküthü thuve.

¹⁵ Aghawu lakhi no I gi lo fupuku ghi yeighi; I philo asa kümtsü puthughove.

¹⁶ Tishino tshümu shimono I zülo puthughove kemu ni ye akivishi pa jukimchi mlano ae. Akoghe lakhi no I zülo inaqhoi ake lono asütsa lakhi chilu:

¹⁷ “Thiveni küau ye Alhou zülo amikucho ipilu nani kea? Timi ye pa Lhokeu zülo mqhamqhiyi lunani keshea?

¹⁸ Alhou no Pa ghinimi shoumu pükhübe chemo eno Paw kungumi kipimi phucheni aye

¹⁹ kishino aghani kilo kungomi, ayeghimkhu no aboqha shikemi, amimi toi chunudave chekemi shou pükhübe luni kea?

²⁰ Panongu ye inaqhe ngo avelau dolono hetha pinyive cheni; khunomu alomsü tsümo no panongu ye hauve cheni.

²¹ Pano no akeu phiki kighi itave eno pano ye alokütsü kühano thive chenike kumo keshea?”