JOB 39 - Sumi Naga CL (Re-edited) Bible (BSI)

¹ “Achuyi ye kughou no piti cheni keno no ye ithi anima? No ye ashe no pitikeu chheju ama?

² Tipaqo ye aqhi khije ati pucheni keno no ye kihiju kema, eno kughou no piti cheni keno no ye ado ithi anima?

³ Panongu no itsaqi ihozü no ati piti keu, ati no kishi ipeghi cheni keno ithulu kema?

⁴ Pano ti no mtotoi ilhouve no aghasa lono thuwuve cheni; panongu no tipa-a lono itsü wuve no ideighi move cheni.

⁵ “Khuu no aghalo khurha kuqho puwuve cheni kea? Khuu no pa kütsügha kighi kuqhotsü kea?

⁶ Pa pelo ngo penike I no agha itsümoke-a pa tsüe, eno amti-a pesü pa kungo-a shitsüe.

⁷ Pa no aphughi lo mbumghu keu junu acheni, pa ye akümla kughukütsüu sütsa chilu chemoe.

⁸ Pa no naghuto lo itsü pa chuqupu mzachu cheni, eno aqha kümtsü lo atsüni küxü phuwu cheni.

⁹ “Aviala ye o kümla shinike pulo nanima? Pa ye putho lo o mishiki lo ngo nanima?

¹⁰ No ye pa pelo apo hokide penike pa tshülu momu pa ye o pape o lu hokidetsü nanima?

¹¹ Pa küka kumto kije ghenguno no ye pa pükhülu, eno o kümlapu pesü pa lau kulhuqhi tsülu nanima?

¹² Pa ye o sala athi ghokütsü pe aniqa lo qhitsülu nanie pi no ye pa lau aküpülü ani keshea?

¹³ “Ostrich ghau no alokivishi achishibo xakho cheni, ikemu ti ye azüghau chishibo eno pa mhi toi kushuo keshea?

¹⁴ Pa ye ayeghi lo yikhu süve no tipa külü no vapülü cheni kehu

¹⁵ timi momu tüghashi no nephove tsüni keu kümsülu chemoe.

¹⁶ Li no pa tiqo ye paw kumo toi ayiküsa shicheni; eno li ghime ye adou shiveni keghi akümsa kühae,

¹⁷ kughengu Alhou no li pelo alokütsü kühave peke, eno vethakulupu saje kitilamu tsümove ke.

¹⁸ Kughou li no poniye shohe ithughini keno, li no khurshi eno tipa küsau thaigha junu cheni.

¹⁹ “Nono aküka kumto pesü khurshi tsü keshea? Nono asa lülüshi keu pesü pa kuo küzütsü keshea?

²⁰ Nono pa pelo tülhaqu toi ilhewu lupe cheni keshea? Pa nigipe lono aghügha ipeghi keu ye amüghü ani.

²¹ Pa pukhumtsü no ayeghi tiphe no pa kumto lono ilhe aghü küpüghü nike azüu pocheni.

²² Pa no akümsa junu cheni eno pa ye azüzüve chemoe; pa ye azüta angu zülono shochileve chemoe.

²³ Apijibo no pa mqa lono ghoghoshi igha, eno angu ngo ayighasü no kulophapha shike.

²⁴ Pa no thüthüshi ayeghi chipele amülhü toi pocheni; afuko sütsa chilu kethiu pa ye a-a shilu moae.

²⁵ Kughou afuko ighani keno pa no, ‘Aha!’ ipi igha cheni. Pa ye putou no aghükishi, kijemi zakütsü eno igha asheshu keu tsüngü luve cheni.

²⁶ “Alhaqü ye o lokütsü vecheo yewulu eno pa chishibo sükhope apeu yeiqive cheni kea?

²⁷ Alhuqu ye o zakütsü lono akuchuqu-a lo yeikuve no pa püsü mla cheni keshea?

²⁸ Pa ye atuqu shou ngo cheni, atuxu kighipe no pa liwo shino tilehi pa ki mla cheni.

²⁹ Tilehi no pa no chukepu shi miqe cheni, pa nhethi no putou no ti jukuto cheni.

³⁰ Pa tiqo no aji müsüye cheni, eno khilehi akithi kumo ani keno, pa ye tile acheni.