JOB 38 - Sumi Naga CL (Re-edited) Bible (BSI)

AMPEU no Job Khochile

¹ AMPEU no miyitsü lono Job khochile:

² “Khuu no akighithi kühano atsapi lono Alhou kimji shipuqove ani kea?

³ Kiptimi toi kutope ngolo; I no ighijuni, eno nono I khochileni.

⁴ “I no ayeghi boqha gho akelo no ye khile akea? Nono vethakulu aghi aye, I vilo pilo.

⁵ No ye mtsüqheino ithi masae, khuu no akimghipu pesü ayeghi mighiju, momu khipahi shinie pi xatha kea?

^6-7 Ti choqhepe akeu tsükucho ye kiu shou bepe ani, momu inaqhe yepuqo no alephe no Alhou nuliqo no alovi igha akelo khuu no akhetsü tuqu shosü kea?

⁸ “Momu azüghi no ayeghi po lono phole ipeghi kelo khuu no azü hukikha khavetsü kea?

⁹ I no khüngküsü pesü azüghi phimini shitsü eno aküzü kutho pesü tipau puu,

¹⁰ eno azüghi ghenguno alughi hethape qhino ahukikha ngo akhadu sütsü,

¹¹ eno ishi pi, ‘Hikuto likhi thono hinguno alau ye ighi moni, eno ow fukukucho kümka ye hileno kishekhani.’

¹² “O punuke no ye azah pesü inaqhe tsüju eno tsükutho pelo pa-a ithi penike kichetsü juama?

¹³ Tishikeu huno tsükutho pelo ayeghi phishe tsüqüpe kixikilami tileno kilhe pheve peniye ke.

¹⁴ Kughou no vüipeghini keno ayeghi kogheküghü no aghani lo amchipu chishida ketoi ato-akutho piye cheni.

¹⁵ Kixikilami küvü ye pano launo ikhiluve tsücheni, eno pano u peqhepe akeu ye hephove tsücheni.

¹⁶ “No ye azüghi züpuki lo iloju, momu azüghi ghüza qha püakeu lo chesü wujuve akea?

¹⁷ Akithi khagho pesü o piyeju, momu no ye aküzü kutho hukikha ithulu juvao?

¹⁸ Ayeghi ye khipahi keno no ye ithikuthu luve akeshea? Nono hi kümtsü ithi aghi aye piphelo.

¹⁹ “Aküvü no acheke-a lo wunikeu laghi, eno aküzü-a ye khile ani kea?

²⁰ No ye tipaqo sasü pano kümla-a lo wulu nanio eno pano ki laghi lo sachile sawulu nani keshea?

²¹ No ye ithi anie, kughengu hipa ghuloki loye o punuvae, eno o punu mpe ye ighono kutomo shivae!

²² “No ye mürasü pekütsü ke-a lo iloju, momu apüghü pekütsü cheke-a ithulu juama?

²³ Tipaqo ye aveküsa ghuloki eno aghüshi tsala ghenguno I no pekütsüpe püani.

²⁴ Aküvü kijepuwu cheke-a lo wunikeu laghi khile ani, momu kipela mülhü ye khileno puwu cheni kea?

²⁵ “Khuu no atsütsü lo tsütsüghu iqighi kepu züla hetsü, eno tsütsüküsü kuwula ghephe tsü kea?

²⁶ Timi no ngochemo ke-a lo, asayeqha lo tsüghuqhi tsü,

²⁷ qhaikeu züha yeghi pütsü tsüno ayeghi lo atsaneghu itsü ipeghi lupe keu ye khuu no kea?

²⁸ “Tsütsüghu ye apu anio, momu khuu no atsüzü punu kea?

²⁹ Khuu po lono avütsa ipeghi eno khuu no avü paza kea?

³⁰ Azü no atu toi mkamghaive eno azüghi gi huno chethove.

³¹ “No ye ayenokilimi yikichhe tsüghalu momu Püghüno süpemi kütsügha kighi kuqholu nani keshea?

³² No ye atsütsü ahuu ayepu mqo laghi kiche tsülu, momu Ayis yepumqo eno pa tiqo saphelu nani keshea?

³³ No ye atsütsü lo pimheye ithi anima? Tipaqo yepesü ayeghi lo peithalu nanima?

³⁴ “No ye khüngküsü vilo ighamku tsüghuqhi no o zaqhi penike pilu nanima?

³⁵ No ye tsütsüpha kupuwu no tipaqo no ighi püzü o vilo, ‘Ningu hi chenie’ ipilupe nani ma?

³⁶ Khuu no aqho lo alokütsü sütsü, momu akükümsü lo vethakulu sütsü kea?

^37-38 Achepo momu ayeghimkhu no tsatsai amqo shive kelo khuu no atsütsü lo azütughuko tukulolu, momu alokütsü lono khüngküsü kihikhalu nani kea?

^39-40 “Abongshuuqo no atuki lo zü akelo momu aghasa lo itshüpe miqe akelo, no ye tipaqo ghenguno ashi hatsülu momu pano tiqo müzü-tüghü ghapiqi tsülu nani keshea?

⁴¹ Abagha tiqo no achuqupu küha kelauno yeiqho-iqi Alhou pelo kuphu penike igha chekelo, khuu no tipaqo chuqupu kutotsü cheni kea?