JOB 37 - Sumi Naga CL (Re-edited) Bible (BSI)

Elihu no Alhou Nguagha Sheshu

¹ “Tipau ghügha chilupe I mlo no ashou ilhe ipeghini ketoi kukushive.

² Paw tsütsüküsü sütsa eno Pa kichi lono kokoshi ipeghi keu inialo.

³ Pa no tipau pesü atsütsü qholo aqha kümtsü lo puwu, eno Paw tsütsüpha no ayeghi cheku kutolo puwuke.

⁴ Tithiu Pa sütsa no vekipighi eno mghachhoi igha, Pa sütsa chilu namu Pa ye tsütsüpha süchile lumoe.

⁵ Alhou no akümzapu shi mghachhoi igha cheni, ningu no ithikuthu mla keu kümla kije shicheni.

⁶ Kughengu Pa no mürasü vilo, ‘Ayeghi lo iqighilo’ picheni, titoi tsütsüghu vilo ghi tsüqhu-tsüghulo picheni.

⁷ Pa no tsütsüghu vecheo timi khasüpe qhive cheni, tishianguno Pa no lhokemi pelo Pa ithi peniye ke.

⁸ Tishino tüghashiqo ghi pano kilo ilove cheni, eno pütüta ki lo ngove cheni.

⁹ Apeu mülhü no pasapagha miyitsü süghi cheni eno ahuu no akumkogha ighi cheni.

¹⁰ Alhou tuthu no avütsa kughulho tsücheni eno khepucho keu zü no mtazü chethove cheni.

¹¹ Pa no thoni-tsanyi keu pesü khüngküsü lo sütsü cheni; eno akimhi no aqha kümtsü lo Paw tsütsüpha puwu cheni.

¹² Paw mijekütsü kiqi lono tipaqo no Pa no azah tsükeu shikupu tsüniye timi akeu yeghi kümtsü vehoide acheni.

¹³ Shikithe tsüniye keo, Pa yeghi ghenguno keo, kikimiye ghenguno keno, Pa no tishipe chenie.

¹⁴ “Hi inilo, O Job; inaqhoi shino Alhouw akümzapu kümlaqo kümsüju lo.

¹⁵ Alhou no kishi tipaqo azah tsü cheni, khüngküsü lono tsütsüpha pelo yepüvü chenipe keno no ye ithi anima?

¹⁶ No ye khüngküsü no aphiphi shi tshüqhipe achekeu, akighithi kupukülai keu, Pa kümzapu kümlaqo ithi anima?

¹⁷ Apeu mülhü no tave kethiu kishi ayeghi no inaqhoive eno akülü no o phimini ghaqhi cheni keno ithi anio?

¹⁸ No ye Pa kimihi shi ayipa kümka pesü ahiju toi phuphushi atsütsü kupuju qhawolu nani keshea?

¹⁹ Pa vilo kiu pini keno ni shikalo; kughengu ningu ye aküzü no mhoqhipe kiumu pilu amoe.

²⁰ I no atsa pinie pi Pa vilo pikepu keshea? Khuu no ithithai no pa munove penishi ani akea?

²¹ “Kughou atsütsü lo khetsünhe küvü no vüqai; eno amülhü no khüngküsü fukimthe khaveni keno khunomu aküvü julu chemoe.

²² Ameshoyi mülapui keu toi ahuu no Alhou kükanguagha no Pa vehope ighie.

²³ Ningu ye Akughushuu phumlae; Pa küka ye ighono kije; Pa ye kuchou xakütha eno kupukuno mikucho hexavemo nani.

²⁴ Ikehu timi no Pa sümsa cheni; Pa ye alikhi ampi pesü alokütsüe piche kemi kihi chemoe.