JOB 36 - Sumi Naga CL (Re-edited) Bible (BSI)

Elihu no Alhou Küka Sheqhe

¹ Elihu no kibeghi pi:

² “I gholo kitila kutuu tsülo, I no o vilo pini, kughengu ni ye Alhou züqhushi kiuala pikepu aphike.

³ I no putou ala jeli lono I kighithi tsa süghini eno I lhoküsüu no amikucho kepi piyeni.

⁴ Kughengu kuchou no I tsapi ye kichile kumoe; khuu akighithi lo kupukülai ani keno, pa no o gholo ani.

⁵ “Julo, Alhou ye akumto eno khumu jukünatha chemoe; Paw vethakulu ye mtotoi ke.

⁶ Pa ye kixikilami püxü chemoe, ikemu ijuime akemi chipiu pesü pano tsücheni.

⁷ Pa ye amikuchomi launo Pa nhethi sükiqeve chemoe, ikemu alhokupuju ghenguno Pa no panoqo süsü no kükami gholo iqa no ayepe eno sheqhe achenipe.

⁸ Tsala ayikichhe no pano tshüluve eno aghime kighi no tsügha luve aghi aye,

⁹ Pa no pano kutokumo piphetsü, eno pano qheküza lhoaye pesü panongu piye cheni.

¹⁰ Pa no panoqo pelo akükütsütsa inipe no alhoksa lono ideighive penike azah tsü cheni.

¹¹ Pa tsa chilu no Pa huthu aye, panongu ye kinikülü shi aküxü kupukülai lunani, eno alokughuno shi pano küxü mpe puwolu nani.

¹² Ikemu panongu no chilu move aye ghüyi lono wonani eno akighithi kühano thive nani.

¹³ “Amlo lono Alhou ithimo kemi ye axuide acheni, Pa no panoqo ghime mu kuphu lopi ighamku chemoe.

¹⁴ Pano ye alhothe lono thive cheni, eno pano küxü ye küsalhami gholono kishekhave cheni.

¹⁵ Pa no aghimeshi chekemi xaphe cheni eno pano ghime lono pano kini xükhotsü cheni.

¹⁶ Pa no nou ghi akijiksapu lono müsü saipe khile a-a ililai akeno aqa kivi lo qhi, eno o ghulhu lüpa lo ashiaji küdapu chuqupu qhitsüe.

¹⁷ “Ikemu kixikilami shou iku kepu ghime nono xapu auvae; küghakütha ngo achipiu xakütha no o tsüqü luvae.

¹⁸ Kutokupuike kumo aye kinikülü no o müsü sawuve nosa, eno külügho no o saküghüzüve nosae.

¹⁹ Akijiksapu lono o xaphelu penike nono ighamku o küka kumto pephe akeu ye o kuphulu nanima?

²⁰ Putho laju kevilo, hipa ghuloki lono ashiayeqo ghi pano-a lono hauve aghi chenie.

²¹ Kutokupui lo; alhoksa lo tsüghü wuve kevilo, kughengu aghime züqhulo nono hiu kisheluve akehu.

²² Julo, Alhou ye Pa küka lono akiqheu-a lo süqhe püani; Pa toike shikükau khuu ani kea?

²³ Khuu no Pa laghi kichepe Pa tsüju, momu, ‘No ye akumou shivae’ ipi luni kea?

²⁴ “Alhou kümla ghili khikhi timi no shipili acheni keno ti akishe tsüni keu kümsülu lo.

²⁵ Timi kümtsü no tipau shou jupuku acheni; ikemu putou likhino ju acheni.

²⁶ Julo, Alhou ye kije kemu ningu no ithi chemoe; Pa mpe kikihi ye phuilo tomlae.

²⁷ Kughengu Pa no azü kighijiqo sünhe saiku tsütsüghu zü kughulho cheni,

²⁸ atsütsü no tipau leqhitsü kelo timi kümtsü shou kupukuno shi ijiqighi chenie.

²⁹ Khuana no khüngküsü ye kishi qhawo cheni, momu Pa ki lono tsütsüsü keu ghili ithikuthulu nanio?

³⁰ Julo, Pa no tsütsüpha pesü atsütsü kupuju qhawo cheni, eno azüghi kutho kümtsü küzüluve cheni.

³¹ Kughengu Pa no tsütsüghu puwu no timi loji cheni; eno pofushi achuqupu tsücheni.

³² Pa u no tsütsüpha pesü amchipu lo chhepuku penike azah tsücheni.

³³ Tipau ghügha no Pa ampi chekeu sheshu cheni; pichepighiu ghi ti chekeu pesü kilethitsü chenie.