JOB 35 - Sumi Naga CL (Re-edited) Bible (BSI)

Elihu no Job Kipimi Shuphe

¹ Tishino Elihu no khochile:

² “No ye hipau pesü achipie pi kümsü ani keshea? Nono pi püanie, ‘Alhou zülo ni ye I chipiu ani,’

³ tighenguno nono iniju ke, ‘I kivipu kiu ani kea? I no axine shi püaghimo namu I la kiu shiluni chekea?’

⁴ No eno o küsami lau I no khochile küqhani.

⁵ Atsütsü lo khüngküsü khikhi o nguno qhemghai ani keno julo.

⁶ Nono axine shipüaghi aye, tino Pa vehu kiu ani kea? O xine no küghüsü aghi aye, tino Pa vehu kiu ani kea?

⁷ Nono amikucho shi aghi aye, no ye kiu Pa tsülu ani kea? Momu Pa ye o u lono kiu ithulu ani kea?

⁸ O lhoksa no o shou ikughina thono o mikucho huye kütami lau wuve nanie.

⁹ “Nedaqoda keu ihulove kehu timi no ighamku cheni; akumtomi launo kuphu peniye pano no igha cheni.

¹⁰ Ikemu khunomu ishi pi chemoe, ‘I lhokeu Lhou, putho lo alovilupe chekeu ye khile ani kea?

¹¹ Tüghashi nguno alau ningu shika chekeu, aghau nguno alau ni lopütsü tsü chekeu ye khile ania?’

¹² Panongu no ighamku anamu alhoksami qheküza ghenguno Pa no khochile moe.

¹³ Kuchou no Alhou ye abokümsa ghügha initsü chemoe, Akughushuu ye ti kihi chemoe.

¹⁴ Imaye nono Pa zülo kügha kepu ani eno Pa khe animu Pa ithulu chemoe pi akelo kishi o tsa initsü nani kea?

¹⁵ Tinguno alau, Pa no axukighide lono ghimemo eno timi kutokumo juzüvetsü kehu,

¹⁶ Job ye adou lono pa kichi xükho ani eno akiqi kühano pa tsa kighishe auvae.