JOB 34 - Sumi Naga CL (Re-edited) Bible (BSI)

Elihu no Alhou Chipiu Süsho

¹ Tishino Elihu no khochile:

² “Nongu alokütsümi eno ithisheve keqo, I tsa inilo eno I lau nongu kini kughopuwo lo;

³ kughengu ataha no achuqupu miche chekeshi akini no atsapi piqhiju cheni.

⁴ Ningu kiu no achipi keno kisheni nolo; kiu no akivi keno ningu dolono ithivenie.

⁵ Kughengu Job no ishi pi anie, ‘Ni ye achipie, ikemu Alhou no I chipiu luve tsüae;

⁶ I chipiu akeghi I küghape akimkiu shiauvae; I kipimi küha keghi I ghüzaku ye vikümlapu shivae.’

⁷ Job ye kiutoi kemie pi azü tsüye akeshi küthakügha tsa pi,

⁸ alhoksa kümlami gholo chokive eno kixikilami sasü apukhune lakhi shi ani kea?

⁹ Kughengu pa no pivae, ‘Alhou züküvüpu shikeu lono timi ye kiumu ala shilu chemoe.’

¹⁰ “Ikehu nongu amlokütsümi, I tsa inilo: Alhou no kixikila kümla shinie pikeu ye alatsae, eno Akughushuu ye khilemu küqüni chemoe.

¹¹ Kughengu milakhi kümla kiqi lono Pa no tsüchile nani; eno pa küxü laghi kiqi lono Pa no ajume tsünani.

¹² Kuchou vehulo Pa ye khilemu küsakügha shimo nani, eno Akughushuu ye khilemu achipiu tuchighi monani.

¹³ Khuu no ayeghi shou ayepeni keu küka pesü Pa tsü, khuu no ayeghiqha kümtsü kulhuqhipe Pa tsü kea?

¹⁴ Tsala Pa no timi launo Pa tuthu eno Pa ngulho ikhichile luve aye,

¹⁵ aküxüküa thime kümtsü kümtsa thive nani eno timi ye ayeghimkhu lo idewove nani.

¹⁶ “Nongu no vethakulu aghi aye, I no kiu pi ani keno inilo.

¹⁷ Achipiu mithi chekemi ye ayepe lunani keshea? Akipimi pesü Achipiu eno Akumtou tsüni keshea?

¹⁸ Pa no ayeghi lo kükami vilo, ‘Amekükühau,’ eno kijemi vilo, ‘Kixikilau’ ipi cheni,

¹⁹ yepemi lau mu agiju chemo, momu kumlhomi nguno alau kinimiu kihi chemoe, kughengu panongu kümtsü Pa u lo kümla ke.

²⁰ Panongu ye paikhavi no thive cheni; zübumta lono panongu sükuchoqhi no thive cheni, akumtomi ghi timi no pano shou au bemo namu hauve cheni.

²¹ “Kughengu Pa nhethi no timi shou jupuku acheni, eno pa pukhune kümtsü Pa no ithulu achenie.

²² Alhoksa kümlami no itshülu kepu-a züchiyi keu momu aküzü kutho khilehi mu kühae.

²³ Kughengu Alhou ye timi tsa küghathani ke Pa zülo ighi peni keu do kihithatsü chemoe.

²⁴ Pa no phujumo no akumtomi hephopinyive no pano-a lo kütami süsüve cheni.

²⁵ Pano kümla ithi ani kehu, Pa no putho lono pano ikhive no kütsave cheni.

²⁶ Pano kixikila ghenguno Pa no kümtsü no ithulu kepu-a lono heqhi cheni,

²⁷ kughengu panongu no Pa papemo no tsüghüve eno Pa laghi phi-gihu tsümo ke,

²⁸ pano ghenguno kumlhomi no ighamku Pa lau wu kelo Pa no aghimemi ghügha chilu tsüe.

²⁹ Pa no iqünheive namu khuu no akipimi Pa tsüluni kea? Pa no Pa gi küsüluve kelo shiye na lüthü namu khuu no Pa ithuluni kea?

³⁰ Ikehu Alhou kümthami ye ayepelu pemo niye ke, tikumo aye pa no timi müsü sawuve nosake.

³¹ “Khuana no Alhou vilo, ‘I no aghime xapu luvae; ni ye akumou shikithe moae;

³² I no kiu ithuluamo keno I shika tsülo; akumou shi püaghi aye, ni ye shikithe moae’ ipi püani nio?

³³ Nono Alhou milive püzü Pau no o pulou lono tsüchile peni kea? Kughengu ti ye nono kishe nani thono I no kumoe, ikehu nono kiu ithi ani keno piphelo.

³⁴ Vethakulumi eno alokütsümi I tsa chilu kemi no I vilo pi nani:

³⁵ ‘Job ye akighithi kühano atsa picheni, pa tsa ye akiqi kühae.’

³⁶ Job no kixikilami paphishi khochile kehu pa vehu hipau ye ashekha kutolo süpushu peju apenishie na.

³⁷ Kughengu pa ye hekibide pesü pa xine gholo küpha ani; ningu zülo pa u kukhu pa no küthakügha shiani eno Alhou shou pa qheküza tsa küghüsü anie.