JOB 33 - Sumi Naga CL (Re-edited) Bible (BSI)

Elihu no Job Sakiyi

¹ “Ikemu itehi I tsapi ini tsülo, eno I tsa kümtsü inilo, O Job.

² Julo, ni ye I kichi xükhope I mili no pithuvae.

³ I mlo no kiu toi müzüchoi keno I tsapi lono piphe cheni, eno I kichi no kiu ithi ani keno atho tsa pichenie.

⁴ Alhou ghungu no I lhophe, eno Akughushuu tuthu no aküxüpu I tsüke.

⁵ Nono shilu aye I khochile julo; o tsa kithipe I zülo ighi no mtütüi tipau shokha julo.

⁶ Ni ghi o toi Alhou küdau anie; ni ghi aghani lono ipeghi ke.

⁷ I jupe msakeu no o shikichi akelau kumoe; ni ye ihulo o qaqhimo nani.

⁸ “Kuchou no nono I kini lo pisü tsükeu I no o sütsa chiluvae.

⁹ Nono pike, ‘Ni ye mqhamqhiyi akipimi kühae, ni ye mithemithei I lolo axine kühae.

¹⁰ Julo, Alhou no I kipimi phuniye ajeku shi ani, I küghape Pa ghümi toi kihi ani,

¹¹ Pa no I pukhu lo apukhukhasü süvetsü, eno I laghi kümtsü jukuto ani.’

¹² “Ikemu no ye hipau lo achipishi amoe, I no o khochileni, kughengu Alhou ye timi nguno akijeue.

¹³ Kushiye, ‘Pa ye timi tsa kiumu khochile tsümo nani’ ipi no ye Pa sasü kighe ani kea?

¹⁴ Kughengu timi no pimhe lumo namu Alhou ye aghola lakhi momu kini lono picheni.

¹⁵ Putho lo kughou timi no züchei akeno azüa lo ihozü akelono asamo, züxou no,

¹⁶ Pa no timi kini xükhotsü cheni, eno kütüghü keu pesü pa shithüghüi cheni,

¹⁷ tishianguno pa lhoksa kümla lono tsüghüve eno aqheküza peve peniye ke;

¹⁸ tishikeu lono Pa no aqokutho lono pa ngulho pükhatsü eno azütakikihi zülono pa küxü xaphetsü cheni.

¹⁹ “Timi shikümzülu chekeu ye aküsü züa lo ijukeu, eno tamomithe pa ghi anhü no pitipüzaqhi keu lono ke,

²⁰ ikehu pa ye achuqupu ghi alole, eno pa no chunishi chekeu ghi kikhekile shicheni.

²¹ Pa shipiti no qhoi hailove no kiumu ithulu move, eno pa saghi likhi kamghoi ipeghive cheni.

²² Pa küxü no aqokutho kupunu eno akithi süghi chekemi kupunu wuve cheni.

²³ Tsala pa ghenguno kungumi, qhethonhe dolo lakhi, lacheu, timi vilo kiu no achipi keno pini keu aghi aye,

²⁴ pa no timi hu küpüqhiyive no, ‘Aqokutho lo ilo chekeu xaphe luvelo, pa xakipheme I no ithuluvae,

²⁵ pa phiashi no xüthilei lhothemi toive pelo; pa lhothe shiaji kumto lo idewolu pelo,’ ipi aye;

²⁶ tile timi huno Alhou lau inikhu kelo Pa no ikhilu tsücheni; pa no Alhou gi ithulupe alovi igha cheni, eno Alhou no pa chipiu pesü tsüchile cheni.

²⁷ Pa no timiqo zülo alokivishi alephe pi nani: ‘I no axine shive no achipiu pesü tuchighive kemu tipau lame I tsüchile moke.

²⁸ I ngulho no aqokutho lo iloche kelono Pa no I xachilelue, ikehu I küxü ye aküvü küdau jupuku anani.’

²⁹ “Julo, hi kümtsü Alhou no timi lau anguno anguno mla achenie,

³⁰ aqokutho lono pa saideghi no aküxüpu küvü no pa yepüvü luve peniye ke.

³¹ O Job, tsaqütsalei I tsa inilo; I no pinike inaqhoi shilo.

³² Nono kiuala tsa aghi aye, I khochile lo; pijulo, kughengu ni ye o küghape achipiu shi tsünishi ani.

³³ Tikumo aye, I tsa inilo; I no alokütsü pesü o shika nike inaqhoi shilo.